مفتاح الاوبترا بالريموت بـ 500 جم و العادى بـ 100 جم

[TAMERSHAFIK509]

السلام عليكم اهل المنتدى الكرام...
عندى معلومة احب اضيفها..اولا بما انى اشتريت العربية بالتقسيط فده معناه ان شركة كونتكت تاخذ نسخة من المفاتيح و الحمد له اخذوا النسخة الفاضية و سابولى نسخة الريموت فقلت لازم اتصل بالوكيل علشان اطلع نسخة ثانية.اولا اتصلت بمركز صيانة معتمد بالقرب منى حيث انى من قاطنى المعادى و هو العوض جروب فسئلتة عن السعر اجاب ان المفتاح العدى بــــــ90 او 95 و اللى بالريموت بـــ 490 كما ان الخامة مش عنده يعنى لازم اتصل اخر الأسبوع علشان اتاكد ان الخامة عندة و بعد كده هخدها و اروح اخرطها بره عند بتاع مفاتيح ثم ارجعله علشان يبرمج الكونتكت على النسخة بصراحة مصدقتش الكلام و اتصلت بفرع منصور فى الكيلو 4و5 قالى نفس الكلامتقريبا لكن الاسعار ارخص حوالى 20 جم و لما سالتهم هو انتو مسترخصين تجيبوا ماكينة نسخ مفاتيح قالولى هو كده.طبعا مبلغ كبير جدا دا انا ب ال500 ممكن ادبخ خروف صغير ..المهم سالت واحد زميلى فى الشغل عن الحكاية دى و هو عندة يارس قالى انهم عملوا نفس الحكاية ان الكونتكت لازم يتبرمج و الحركات دى بس هو جرب و طلع مفتاح عادى و اشتغل و قالى متجرب مش هتخسر غير 12 جم دا غير ان المفتاح كده كده هيفتح الأبواب.مكدبتش خبر و عملت النسخة ب 10 جم و كانت المفاجئة ان باب العربية اتفتح و الكونتكت و الشنطة يعنى شوية النصابين و موضوع البرمجة طلع كله كلام فارغ..فيا جماعة اللى عندة اى تويوتا او لانسر او شيفورلية لا تستسلموا للوكيل و اعملوا نسخة عند بتاع مفاتيح عادى و مش هتخسروا كتير.....ويا ريت لو حد عنده فكرة بخصوص مفتاح الريموت يشاركنا بيها.....وشكرا

[د.محمود صلاح]

المشكلة انه هو الوحيد اللى بيشغل الانذار .... انا باذن الله هعمل واحد جديد يشغل الانذار عند الكهربائى الفنان اللى انا بتعامل معاه

[mina_ramsis]

معلش فيه جزء مش فاهمه يعنى انت لما تقفل العربية بالريموت و تيجى تفتحها بالمفتاح اللى انت عامله بتفتح عادى و الموتور يدور عادى و لا ليه بالضبط

[أبو عمار]

يا جماعة المفتاح بتاع الأوبترا ما فيهوش برمجة ، ما هو إلا خامة حديد سواء النسخة اللى بالريموت أو النسخة العادية
فقط الريموت هو اللى بيشغل الإنذار وما فيش حاجة هتشغل الإنذار غيره و المفتاح العادى اللى بـ 10 جنيه زيه زى المفتاحين الأصليين ما فيش فرق ،يفتح الباب أو الشنطة ( و عند ذلك يفصل الإنذار )و يشغل المحرك أيضا
على فكره انا عامل مفتاح بـ 10 جنيه و خليت الراجل ينزع البلاستيك منه و بكده بقدر أحطه فى المحفظة لزوم الطوارئ

طبعا ده مختلف عن مفتاح التويوتا اللى لازم يتبرمج عشان يفتح الأبواب أو يشغل المحرك

[aguenena]

فى طريقة لعمل نسخة بالرموت أخرى برة التوكيل؟
اذا كان بيعملوا المفتاح بتاع اوكتافيا و اوبل (بالبرمجة ) ب 150 جنيه ؛ يبقى أكيد ممكن ده يتعمل بس فين؟

[TAMERSHAFIK509]

مفتاح التويوتا غير مبرج ايضا