الحمد لله على كل شئ ,, الاوبترا اتخبطت و عاوز مساعده

[kimo_kiko]

هذا قضاء الله

العربيه مستلمها من اسبوعين و عملت 1000 امبارح بس

و انا واقف فى اشاره و حتى بعد ما جبت N يعنى عدى وقت

لاقيت مره واحده حاجه رزعت العربيه من ورايا

سواق تكسى لادا ,, منه لله

هو بيقول ان الفرامل قطعت منه ,, بس المؤكد انه كان داخل الاشاره بسرعه عاليه نظرا للخساير التى تمت :

الفنوس اليمين و الفنوس الشمال
الاكصدام الفيبر + الاطار الحديد الداخلى للاكصدام
غطاء الشنطه
ظهر العربيه ( الحته اللى متشال فيها الاستبن ) الكرتيره

كل ده طبعا اتكسر و دخل لجوه

بعد اللمه و الهيصه ( الساعه 8.30 و انا رايح الشغل ) جت طبعا الشرطه و عملو معاينه و خدو الرخص

بتاعه العربيتين و قالو شوفوا هتحلوها ازاى و لا محضر

سواق التاكسى عمل طبعا فيها شهيد الطريق و قلى ربنا يعوض عليك مكنش قصدى معلش و مش هدفع ولا مليم

المهم رحنا القسم : و طبعا قللنا حاولو تاخدو منه اى حاجه لان المحضر هيترمى فى الزباله بعد ما تمشوا و كأن لم يكن ,, المهم الراجل قرر يدفع 500 جنيه و انظرنا صديقه 3 ساعات لحد ما جاب الفلوس


و من هنا بدأت رحله العذاب القاسيه جدا .. اتصلت بالمعارف قلولى روح التوكيل عشان هو اضمن حاجه و هيظبطها تمام و يرجعها زى الاول و كمان عشان العربيه زيرو


رحت التوكيل فى الكيلو 4 مصر اسكندريه الصحراوى ,, و كانت الصدمه

بص المهندس كده بعين ثاقبه و راح اعد يحسب التكاليف دا بعد ما قال انها ممكن تتعمل اول الشهر عشان مش فضين

بص على كل التفاصيل و قال الحمد لله مفيش حاجه فى الشاسيه و راح قلى الخبر الصاعقه

العربيه تتكلف حوالى 10.000 جنيه 5000 قطع غيار و 5000 مصنعيه

الحمد لله على كل شئ ,, بس طبعا قلت فى نفسى دوول مجنين يا عم

طبعا هو قال كدا لان مفيش حاجه عندهم بتتصلح ( بيشيل و يركب جديد )

المهم طلعت قسم قطع الغيار اسأل على الاسعار و كانت مفاجئه لى ( حسيت انها مبالغ فيها و غاليه جدا )

يعنى مثلا الفنوس الخلفى الواحد ب 475

و الاكصدام الخلفى ب 2200

و غطاء الشنطه ب 1600

و الكرتيره ب 1200

يعنى حوالى 6000 اجمالى دا غير المصنعيه و الدهان


طبعا بالشكل ده انا مجبر اصلح بره معظم الحجات اللى ممكن تتسمكر زى الكرتيره و غطا الشنطه

لاكن المشكله فى الفونيس و الاكصدام عاوز اعرف اقل سعر ليهم كام و منين

و الله يا جماعه انا عمات اللى ربنا يقدرنى عليه من اول يوم استلام و خرجت حاجه لله

الله اعلم ,, دى عين و لا ابتلاء المهم الحمد لله و كل اللى يجيبه ربنا خير


اتمنى من اللى عندهم معلومه او يكونو مروا بظروف مشابه ان ينصحونى ايه احسن تصرف و احسن سعر

[mina_ramsis]

ربنا يعوض عليك ده نصيبك انا حصلى زيك كده برده بعد اقل من اسبوعين كمان بس الحمد لله جت فى رفرف امامى و شرخ الفانوس روحت التوكيل غيروا الرفرف و دهنوه بحوالى 900 و كسر مش فاكر بالضبط و سبت الفانوس لما يأخد وقته
بس الصراحة شغلهم نظيف جدا و طلعت فابريكة زى ما كانت مع ان اسود الاوبترا فيه برونز و صعب يتجاب الدرجة بتاعته

[اسلام المصرى]

ربنا يعوض عليك خير ان شاء الله , قدر الله و ما شاء فعل , قضاء أخف من قضاء. المؤمن مصاب يا أخ kimo_kiko معلش مش هقدر أفيد حضرتك "من قال لا أعلم فقد أفتى" ان شاء الله الأخوة هنا فى المنتدى يساعدوا حضرتك. أزمة و تعدى على خير ماتزعلش نفسك المهم أنك بخير!

[mohaismail]

ربنا يعوض عليك قول قدر الله وما شاء فعل انا برضه الفانوس الخلفى اتكسر بعد ما جبت عربيتى زيرو باسبوع بالظبط وغيرته فى التوكيل الواحد الاول بيكون زعلان بعد كده عادى جدا والله ده الطبيعى فى مصر

[إسلام شاهين]

لا حول ولا قوة إلا بالله أنا والله بيجيلي أرتيكاريا لما بشوف أو أعرف إن عربية زيرو اتخبطت ، عموما قدر الله وماشاء فعل .

بص يا سيدي أنا لو مكانك عمري ما هروح التوكيل بالأسعار ديه إلا لو كنت وارث أو معايا فلوس حسبة 100 ألف كده زيادة مش لازمني أنا طبعا هروح أشوف الفوانيس ديه تجاري أو أصلي بس بره التوكيل وهتلاقيهم إن شاء الله في التوفيقية أرخص مليون مرة ولو نزلت بور سعيد والله أعلم برضه ممكن تجيبهم هما والإكصدام استيراد وعلى أكبر وا<عص سمكري فيكي يا مصر ولا عمر الكلام ده ما هيكلفك ربع المبلغ بتاع التوكيل ال.........................................

[Karim_Monir]

لا حول ولا قوة الا بالله العلي العظيم
معلش يا كيمو ربنا يعوض عليك اصبر واحتسب
شوف يا سيد تعلالي الحرفيين وانا اعرف بدل الصنايعي 100 وكلهم ايديهم تتلف في حرير لدرجة ان التوكيلات ساعات بتعبتلهم الحاجات الصعبة
انا الكرولا بتاعتي وهيا زيرو برضة دخل في تاكسي لادا من ورا وكان اللي زقة كمان دبابة نص نقل يعني كانت القوة مضاعفة
والحمد لله كل حاجة رجعت زي الفل بس عندي ماوصلتش للاستبن
معلش اسحبها من التوكيل عشان حرام الرقم ده وبعون الله نعملهالك احسن منهم وباقل من نص الرقم ده
ده تليفوني كلمني يوم وتعالي الحرفيين عشان انا ساكن هناك ونوريها لوليد دبوس وكمان نسالك على كل قطع الغيار المطلوبة واصلية وبعون الله تتطلع احلى من التوكيل
يار يت تصورها وتبعتهالي

ده تليفوني
كريم منير
0101263030

[Ahmed Anwer]

ربنا يعوضك خير إنشاء الله ، و يجعله في ميزان حسناتك

بص يا باشا لسه واحد صاحبي عامل حادثة جامدة بأوبترا 2007علي المحور و العربية مكنتش كملت 2000 كم

راح التوكيل قالوله 16 ألف جنية ،

عملها بره بعد ما سأل و تأكد إم كل حاجاتها متوفرة بره صاج وفوانيس و كل حاجة فلا تقلق إنشاءالله

اكلفت 6000 جنية و طلعها كأنها جديدة و مفيش أي رش للدواخل و زي الفل

بس السمكري ضيعله المفتاح الكمبيوتر و اضطر يعمل واحد جديد بشفرة جديدة ب 1000 جنية عشان ميضمنش السرقة

لو عايز اديلك تليفون المعرفة صاحب الأوبترا يدلك علي الناس اللي عاملوهاله ابعتلي علي الخاص

[Sharky]

لا حول و لا قوة إلا بالله
قدر الله و ماشاء فعل و إن شاء تتصلح و ترجع زى الأول بأقل التكاليف

[fahd_628]

لا حول و لا قوة إلا بالله
ان شاء الله تتصلح و ترجع زى الأول و احسن كمان

[OsKaR]

لا حول و لا قوة إلا بالله
ان شاء الله تتصلح و ترجع زى الأول و احسن كمان

[Hatem Sallam]

فداك يا باشا ... و تيجى فى العربية أحسن من اى حاجة والهى ....يا ريت تيجى فى العربية على طول ف ولا تزعل نفسك

أنا بقى الموضوع ده حصل معى مرتين و الحمد لله ...نفس الخبطة كل مرة و الفرق بينهم سنة بالضبط ...كل مرة فى العشرة الأواخر من رمضان ....المهم أول مرة التوكيل قاللى 120000 فصلحتها بره عند امير و جوزيف اللى فى شارع ابو داودالظاهرى م نصر واتكلفت 3500 بس والحقيقة كان شغلهم نضيف

تانى مرة كنت مأمن عليها فوديتها توكيل العبور و اتكلفت 8000 المرة دى و الله يسامحهم شغلهم زى الزفت
اعتقد انهم رشوا الشنطة و مش عارف اعمل فيها ايه ( يا ريت النصيحة من الأعضاء فى الجزء ده)
و كمان جرحوا الباب و ادونى ورقة عشان ابقى اصلحه بعد كده و قعدت شهر كامل و لسه مستلمها من كام يوم
و والهى انا اتعقدت من السواقة خلاص فى البلد دى و سايبها تحت البيت و مبخرجش بيها الا للشديد القوى

أنصحك بالآتى
1- وديها لأمير و جوزيف و شوف هيقول ايه ...هما عن تجربة كويسين
2-لازم تأمن على العربية فى البد دى
3-أنا عن نفسى انشاءالله عمرى ما هاجيب زيرو تانى و هاجيب مستعمل و كمان 4*4 أو هاقعد فى البيت و بلا قرف


و ربنا يوفقك و يعوض عليك .....و اكيد فدا حاجة تانبة

[Ahmed Anwer]

التوكيل قاللى 120000 فصلحتها بره عند امير و جوزيف اللى فى شارع ابو داودالظاهرى م نصر واتكلفت 3500 بس

ايه ده من 120 الف ل 3.5 ألف !!!!!!!!!!!!!!!!!

120 الف ترميها و تجيب ياريس زيرو و لا كورولا الشكل الجديد !!!!!!

[kimo_kiko]

الاخوه الافاضل :

hoko_mosha

mohaismail

إسلام شاهين ,,, ان شاء الله هروح التوفيقية اسأل على الحجات

Ahmed Anwer الف شكر ليك يا باشا و ان شاء الله لو احتجت حاجه هقولك

sharky

fahd_628

OsKaR

Hatem Sallam كلامك كله مظبوط 100 فى الميه و يارب ما يتكرر اى حاجه وحشه تانى و ان شاء الله عحاول اعمل اللى قلت عليه

بجد انا سعيد بمداخلاتكم جدا جدا و دا حسسنى انى مش واقف لوحدى و طمنى كتير فعلا هونتم عليا كتير بكلامكم المشجع ليا

و يا رب ما يحط حد فى حاجه وحشه ابدا

و طبعا انا ان شاء الله هعملها بره التوكيل نظرا للمغالاه الرهيبه فى التكلفه

و بالنسبه للاستاذ
karim_monir

و الله مقدر جدا كلامك و انا سعيد ان فى ناس زيك كده عندهم استعداد للوقوف بجانب الاخرين بهذه الطريقه و انا معايا الموبايل و ان شاء الله لو احتجت حاجه هكلمك بدون تردد لانى عارف الناس اللى زيك اخلاقهم بتبقى ازاى و ربنا يحفظك من كل سؤ .

[أبو عمار]

ربنا يعوض عليك و يقدرك على تصليحها و الحمد لله إنها جت على قد كده فداك ز فدا أولادك

[Hatem Sallam]

عذرا يا باشا 12000 غقط مش 120000 طبعا