Tweet
انا ماشى بالعربية حوالى 650 كم فى 15 يوم تقييمى المبدئ :
طبعا الشكل الخارجى مش محتاج شرح ... بس اللون الفاتح فى العربية موضح كل التفاصيل و سحبة الكبوت و الفوانيس الامامية و اضحة ( ده اذواق)
-الكرسى بتعها مريح جداً و فيه لمسة جمالية و موضوع ان كرسى السائق بيعلى ده مفيد جداً, فى الاول على اساس ان الكبوت كبير جدا فبترفع الكرسى فى الاول عشان تظبط الابعاد .. و طبعا لو حد قصير حيبقى ممتاز ليه .
- المرايا الجانبية تحس انها مراية نص نقل و حطينها فى ملاكى كبيرة جداً
-‘الكاسيت انا شايف انه عادى يمكن اللى مخليه مميز موضوع العزل للصوت فى العربية , تقفل الشباك متحسش بالشارع .. فا الاستريو واضح و الصوت نقى
-المالتى فانكشن اختراع لذيذ بس عايز تعود
-التكييف مجربتوش قوى عشان احنا فى عز الشتا فمش حعرف احكم عليه قوى
- الباور ستيرينج , باور هيدروليك قريب جدا من الكهربا و خفيف جدا و لسع مجربتوش على السرعات العالية
-نيجى بقى لنقطتين مهمين قوى
-اول نقطة موتور العربية و الفتيس
العربية تقيلة يعنى اللى ساق الاوكتافيا حيفهم انا قصدى ايه ,, لو حد بيحب الجرى و الشقاوة و الحوادث يبقى ميخترش الكروز , و موضوع الفتيس ال 6 سرعات بيخلى العربية صوتها واطى جدا الا ر ب م مش بيعدى 1000-1500 فى السواقة العادية .. لدرجو ان كنت فاكر ان فى مشكلة فا نقلت على المانيوال وانا على 70 كم /س لقيت العربية ماشية على الخامس !@!@!
اقصى سرعة جيتها 100 كم /س و جيتها فى وقت طويل ( انا مش بتاع جرى اصلاً) ف مش عارف العيب منى ولا من العربية هههه
- الفرامل ممتازة لما بحتجها بلاقيها و بزيادة كمان
الفتيس التيبترونيك ظريف للى بيحب يجرى و يحرق على العربية و فيه ميزة انك لو كنت بتجرى و بعدين فرملت هو بيسقط النقلة لوحدوا حسب سرعتك عشان تتطلع تانى بسهولة.(مش عارف ده حاجة عادية ولا ايه )
-نيجى لتانى موضوع اللى هو العافشة
-العربية فيها جنوط 16 كاوتش 205/60 فطبعا العربية فيها stability محترم انا مجربتوش فى السرعات العالية بس واضح فى ملفات طريق البحر عندنا و ده اهم ميزة فى الكروز.
بس العفشة بتعتها مش ناعمة قوى يعنى بتحس بالطريق بس ارحم من عربيات كتير و لانى جربت الكروز بعجل ال 15 من غير جنط سبور فا الفئة الاقل انعم منها جدا.
الاضاءة بتعتها ماشاء الله عليه فظيعة فوجات او واطى او عالى حتى الاضاءة الداخلية ممتازة و التابلوه منور الصبح و بليل .
انا كنت راكب قبل كدا تويوتا 2004 مانيوال و اصلا مش بحب السواقة بس الكروز خلتنى احب السواقة. و شايف الكروز فيها لمسات تكنولوجيا كدا بالنسبة لعربيتى القديمة عجبانى جدا
مش حقولها عشان متتطلعش حاجات عادية و تقولوا عليا جاهل هههه
نقطة اخيرة استهلاك العربية من البنزين عالى نسبياً التانك 60 لتر ماشاها معايا 490 كم و مش عارف لسه حتظبط ولا حتفضل على كدا
عيوب العربية :
1- العافشة ناشفة شوية بس لسه بعدد التليين ممكن تتحسن العجل انا عملوا على 32 زى الباب ما بيقول
2- العربية مش بتاعت شباب و جرى ... يمكن فى السرعات العليا بتسحب زى الالمانى
مزايا العربية :
1- الشكل الخارجى و الداخلى
2- وسع الشنطة و الصالون الداخلى
3-فرامل ممتازة سواء ب abs او من غير
4- الفتيس الست سرعات ممتع جدا على المانيوال( جربتو على خفيف عشان التليين) و بيخلى العربية هادية جداً على الاوتوماتيك
5- عزل قريب جدا من العربيات الاعلى فئة
6- مش بحس انى راكب عربية كورى(اللى حتزعلوا الكلمة ده يعتبرنى مش بفهم وانا مسامحة)
انا انصح بالعربية للشخص اللى عايز يستمتع بالعربية و السواقة العاقلة و توصلوا بسلام للمكان اللى هو عايزو . و لو بيسافر حتبقى مريحة جدا اكيد.و ماشاء الله بتخطف العين جداً.
و انا متقبل اى اعتراض على التقييم لان ده تقييم واحد اشترى العربية و بس ولا من مصلحتى ان العربية تتباع او متتبعش انا قولت الكلام من وجهة نظرى و حاولت ابعد عن اى مقارنة مع عربيات تانية و ان شاء الله بعد ال 2000 حعمل تقييم تان لو فى حاجة جديدة ظهرت
و انا تحت امركم فى اى استفسار
انا عارف انى اتأخرت فى التقييم بس كنت مستنى العربية تاخد العين و خدتها فى الباب الورا شمال و الحمدلله :)))
.gif "Majd(4)")
Comment