مشكلة في دريكسيون الأوبترا

[سعد]

عندي مشكلة غريبة شوية في دريكسيون الأوبترا (مانيوال 2007). المشكلة ان الدريكسيون بيزيق بعد 10 دقائق من السواقة. يعني أول ماسوق بيبقي مفيش مشكلة ... بعد كدة ب 5 أو 10 دقائق تلاقى الطارة و هي بتلف بتزيق معاااك !!!!
سألت عند أوتو ماستر قالولي عادي ... بس أنا شايف ان الصوت عمال يزيد ... حد يعرف ايه هي المشكلة

[د.محمود صلاح]

فعلا فى الصبح لا أجد هذا الصوت .... ولما أركن جنب البيت بالليل وفى الهدوء أسمع هذا الصوت وهو صوت مماثل للأزيز مع لف الدريكسيون لليمين والشمال ... سألت واحد فاهم فى العربيات قال لى ده صوت البلف , أنا مش مقتنع وسأعرض هذه المشكلة على التوكيل فى أقرب زيارة ان شاء الله

[osman hisham]

المشكله دى عيب شائع فى علبة الريكسيون فى الأوبترا
و أنا غيرت العلبه مرتين فى التوكيل بالهرم وكان صوت التزييق هوه باية المشكله فى الحالتين.
العمليه مش صوت بس لكن أنت حتلاقى أن الركسيون تقيل و أنت مش حاسس علشان أتعودت عليه و كمان لو حركت الدركسيون و أنت واقف يمين و شمال حتلاقى فيه خبط .
أنصحكم تروحوا الهرم علشان هما اللى عارفين المشكله دى ومن غير كلام كتير حيغيروها على طول.
أخر مره قالوا ان مشكلة علبة الدركسيون فى موديلات 2006 بس لكن الواضح أنها برضه فى 2007 !!!!!!

[سعد]

يعني التوكيل اللي في الهرم فاهم الموضوع ده ؟؟ ربنا يكرمك ... انا ان شاء الله هاروح و اقوللكم الاخبار؟؟ تعرف حد معين هناك اروحله وللا الموضوع معروف عند كل المهندسين اللي هناك؟؟

[osman hisham]

أى مهندس هناك بس لازم تحجز بالتليفون الأول و تروح بدرى يعنى الساعه تسعه صباحا لأن العمليه دى بتاخد حوالى 3 ساعات .
وربنا معاك ........
وبالمره قول لهم يكشفوا على المساعدين كمان .

[أبو عمار]

الموضوع ده أنا حسيت بيه من يومين و أنا بركن العربية باليل جنب البيت (صوت تزييق خفيف جدا ما يقلقش بس كنت أول مرة أسمعه) لدرجة إنى فكرت إنه يكون صوت الطارة اللى أنا جايبها للدريكسيون بتحك فى أى حاجة بس لقيت إعتقادى خطأ .
الأخ عثمان هشام لو هى بداية مشكلة يا ترى الصوت ده هيعلى و تبتدى المشكلة تظهر إمتى (أنا عامل دلوقتى 7000ك)
و يا ريت الأخ سعد يقولنا أخبار التوكيل إيه
و بإذن الله تكون الأمور بسيطة

[سعد]

انا ان شاء الله مسافر الحج و بعد كدة هاروح الوكيل و اطمنكم .... دعواتكم
علي فكرة ... المشكلة ان الصوت هاتلاقية يزيد مع الوقت

[د.محمود صلاح]

وكان صوت التزييق هوه باية المشكله فى الحالتين.

هوه ايه ؟؟؟
يا جماعة انتم قلقتونى .... الصوت ده عندى والعربية عاملة 21 الف كم حتى الآن وكنت لا أعيره اهتماما وهو بيبدأ منخفضا ويرتفع عند نهاية مشوارك , والدركسيون ثقيل مثل ثقل أى باور ميكانيكى مقارنة بالباور الكهربائى

[mostafabakry]

ايه يا جماعة هي المشكلة كبيرة ولا ايه و في موديلات 2006 و 2007 بس و لا كمان في 2008
و هل دا عيب في علبة الدركسيون ولا في عمود نقل الحركة من طارة الدركسيون للعلبة ولا عيب باور
يا ريت لو وصلتوا لحل تقولونا عليه

[osman hisham]

هيه الحقيقه دى فعلا مشكله شائعه و الحقيقه هما فى التوكيل ما بيتكلموش و بيغيروا علبة الدركسيون على طول من غير مشاكل .
وزى ما قولتلكم أن الباور حتحسوا بنعميته بعد تغيير العلبه وأنكم أتعودتم على تقله مع الوقت .
المشكله أنهم أخر مره غيرته قالولى أن العيب ده كان فى 2006 بس وأن جى م عدلت علبة الدركسيون من 2007 و أنى كده خلاص أخدت العلبه المعدله بس الظاهر أن المشكله قائمه فى موديلات 2007 برضه.
الحقيقه أنا مش عارف المشكله فى عمود الحركهو لا أيه بس هما بيغيروا العلبه بالكامل .

م.هشام عثمان

[mostafabakry]

يعني ايه الكلام دا
طيب ما هو كدا بيغير علبة جديدة بتاعة موديل 2007 و هيظهر فيها العيب من تاني و نبقي ما عملناش حاجة و هتبوظ تاني بعد شوية و تروح تغيرها طب و بعدين
و ايه هو العيب اللي في العلبة يخليها تعمل كدا انا اللي اعرفة ان علبة الدركسيون لما تبوظ بتعمل صوت خبط و رزع لما العربية تمشي في طريق ترابي و غي ممهد
اما حكاية التزييق دا فانا شايف انه يا اما في الباور او في العمود اللي بنقل الحركة من الركسيون للعلبة تحت
يا جماعة انا من اشد المعجبين بالعربية دي و كنت خلاص ناوي اشتريها باذن الله قريب جدا بس كدا انتو قلقتوني
يا ريت كل اللي معاه اوبترا يدخل و يقول ايه ملاحظاته علي علبة الدركسيون جايز يكون العيب دا مش في كل العربيات

[د.محمود صلاح]

الصوت ده بأسمعه وأنا فى داخل العربية فقط وغير مسموع وانا خارجها ولازم اكون وانا واقف وفى مكان هادى والزجاج مغلق وانا حاسس ان الصوت ده وراء الدركسيون على طول ومالوش علاقه بالاسكتره ولا التيش والحاجات دى

[أبو عمار]

أيييييييييوه كده الله ينور عليك وصف دقيق جدا يا دكتور هو ده إللى بيحصل معايا بالضبط

و فى الحقيقة إحنا فى المرحلة دى ما ينفعش نروح التوكيل لأنه بمنتهى البساطة هيقول ده خيال علمى و حله إن إنت تنام بدرى و تقوم أعصابك هادية
عشان كده أنا كنت بسأل المهندس عثمان تقريبا ظهر معاك العيب بشكل ملحوظ على كام ألف

[osman hisham]

يا جماعه أنا الى بقول الحقيقه و روحوا التوكيل و أكشفوا عليها و ده مش خيال علمى ولا حاجه روح و أنت حتعرف أنهم حيغيروها و مع العلبه الجديده حتحس أن الباور كان تقيلل جدا و انت مش حاسس ...................
ممكن يكون العيب فى عمود الحركه أو .... أو .... بس هما مشكورين بيغيروا العلبه بالكانل .
أنا أول مره غيرت العلبه كنت عامل 10000 كم كنت سمعت صوت التزييق وأنا فعلا قافل الزجاج باليل و الجو هادى و رحت لهم علشان أقولهم يزيتوا لى الدركسيون بس ... لكن هما عرفوا العيب على طول و هما اللى قالولى أننا لازم نغير العلبه و كمان سمعوا لى صوت خبطه بسيطه مع حركت الدركسيون يمين وشمال بسرعه والعربيه واقفه ما كنتش حاسس بيها.
أما المره التانيه بعد سنه كنت عامل حوالى 22000 كم أول ما سمعت نفس الصوت برضه باليل و الجو هادى ورا الدركسيون رحتلهم و برضه علطول و من غير كلام غيروه و قالوا لى دى العلبه المعدله و مفيهاش عيوب أن شاء الله و دى اللى راكبه فى مودلات 2007 .
أنا مش شايف أنها حاجه مقلقه ليـــه :
1- التوكيل محترم و بيغيرها من غير كلام
2-كان ممكن يقولوا أنها عادى و أهى العربيه ماشيه و الصوت ضعيف
3-كان ممكن يقولوا ده عيب سواقه وأنك نتسوق فى شوارع مكسره أو فوق عين القطط.

[osman hisham]

على فكره أنا واحد زميلى فى المكتب معاه صنى اليابانى مش المصرى و برضه غير علبة الدركسيون و المساعدين الاماميين .
وأنا فى عربيتى السابقه كانت سيفيا غيرت العلبه برضه بعد شهر من أستلام العربيه و غيرت الطنابير 4 مرات .
و على فكره أنا بعد ما غيرت العلبه فى السيفيا (وده كان بالعافيه فى الضمان) حسيت بنفس المشكله بعد بعض أشهر بس سكت و كملت بيها 5 سنين لأن الضمان كان سنه واحده .
يعنى المشاكل دى عادى بس المهم أنك تأخد حقك فى فترة الضمان و يكون التوكيل محترم وأنا شايف أن منصور أحسن وكالة فى مصر .
وبعدين أكم من ناس عندها فى عربيات تانيه نفس المشاكل و مش حاسه نتيجة قلة الخبره و ان ودنهم مش فى العربيه على طول .