تقييم اولى للاوبترا

[mina_ramsis]

نبدأ اول حاجة بعيوب العربية :-
صجها خفيف شويه - استهلاك البنزين عالى شويه يمكن علشان انا لسه بلين - نشفة شويه فى المطبات من ورا
نيجى بقى للمميزات :-
صوت الموتور غير مسموع بالمرة - سحب العربية اكثر اكثر من ممتاز جدا !!!! الاوتوماتك رائع على عكس ما متوقع البعض ان الاوتوماتيك بتاعها مش حلو او هو هو بتاع النوبيرا-تكييف قوى جدا و فعال - عزل الكابينه الداخليه اكثر من ممتاز ممكن تنام جوه العربية و انت قافل الزجاج - التقفيل ممتاز - ثبات العربية رائع تحس انك راكب دبابة فى الثبات بس :D العربية عاليه من ورا و المساعدين اقويه جدا و ده اللى بيفسر انها ناشفة شويه فى المطبات من ورا - تقفيل الموتور ممتاز ز مش ببالغ لما تفتح الكبوت تحس بنظافه التقفيل على عكس الصنى مع الاححترام الكامل لاصحاب الصنى - العربية واسعة جدا من جوه
فى حاجة كنت عاوز اقولها بالنسبة للاوتوماتك بتاع الاوبترا : تسارع العربية من 0 الى 100 فى 11.5 ثانية و ده رقم ممتاز بالنسبة لعربية اوتوماتك فى نفس الفئة اللترية
مثال تسارع الجين 2 من 0 الى 100 للاوتوماتيك فى 13.5 ثانية
اه نسيت اقول حاجة ان الكاسيت بتاعها حاجبنى اوى هو الكاسيت الاصلى للعربية مش متركب فى مصر

[osstv]

الف مبروك يا باشا
والله انا كده اتشجعت وربنا يسهل ونبقى من اصحاب الاوبترا . انا الاسبوع اللى فات جربت المانيوال
منها وكانت تحفة بصراحة وفعلا عربية فى منتهى الجمال . بس المانيوال اوفر شوية فى البنزين
من الاوتوماتيك .
وربنا يديك خيرها ويكفيك شرها ان شاء الله

[memoo_1st]

الف مبروك لحضرتك وربنا يباركلك فيها ويديلك خيرها يا رب

[osman hisham]

مبروك يا باشا
أن م.هشام عثمان معايا الأوبترا الأوتوماتيك من أكثر من سنه لو عندك أى أستفسار قولى
هيه فعلا العربيه ناشفه على المطبات خصوصا المساعين اللى ورا بس الحقيقه الميزه هنا انك جرب ركب 3 ورا حتلاقى العربيه ما بتهبطش خالص زى العربيات التانيه
الأوتوماتيك فعلا ثلث جدا ما بتحسش بالنقلات بتاعته و الموتور مالوش صوت خصوصا على السرعات العاليه يعنى حتلاقى أنك على 100 كم ال rpm يعمل 2و2 و على 120 يعمل 2.5 و على 140 يعمل 3
التقفيل أكتر من ممتاز و تبان فى صوت قفل الباب و التابلوه
عيبها الوحيد صاج الكابوت ضعيف و ما يستحملش حتى القطط .

[mina_ramsis]

فعلا يا باشمهندس هشام كلام حضرتك كله صح خصوصا حكاية صاج الكابوت انه ضعيف شويه

[mohamed yousry]

كدة ممكن نقول ان الاوبترا احسن كتير من النوبيرة.......ولا اية؟

[osman hisham]

على فكره شغل التكييف عادى جدا و أجرى عادى برضه لأن العربيه متلينه أساسا و الدليل أن الصيانه و تغيير الزيت و الفلتر على 5000 كم
جربت تقرص و لا لسه ؟ الطريقه أنك تدوس البنزين لغاية الأرض حتلاقىالRPM بينقل على سرعات عاليه و العربيه تتسارع بشكل جامد جدا

[mina_ramsis]

لأ لسة ما جربتش اضغط عليها الصراحة خايف عليها بس ان شاء الله هجربها بس تنصحنى اعمل ايه دلوقتى فى الاول كده

[mina_ramsis]

فعلا هى احسن بكتير من النوبيرا

[osman hisham]

سوق عادى جدا كأنها معاك من سنه و الله ما تقلقش
العربيه متلينه
النصيحه جرب كل حاجه فيها العربيه كلها أمكانيات
جرب زرار الهولد (بلضبط زى أوفر دريف) يعنى العربيه تنقل لغاية التالت بس و الباقى قرص على التالت
جرب التكييف ممتع جدا و التكييف داخل التابلوه علشان لو معاك حاجه عايزه تسقع (التلاجه)
لاحظت الدرج أسفل الكرسى اللى جانبك؟
جرب كل شىء!!!!!

[mina_ramsis]

زرار الهولد بينقل لغاية الثالث حتى و لو انا ضغطت عليه و انا على الاول
يعنى لو انا ضغطت عليه و العربية على الاول ينقل لغاية التالت و لا يفضل على الاول ماينقلش خالص اصل فى المعرض هالولى و انا بستلمها ان زرار الهولد بثتبت العربية على السرعة اللى عليها و انا بضغط عليه
كمان فى نقطة هى العربية متلينة يعنى امشى براحتى و لا الين الاول معلش طولت عليك بس الصراحة انا خايف عليها فبمشى بالراحة خالص

[Migo123]

الاستاذ عثمان هشام / طب يا راجل طالما معاك العربيه من سنه ما تخدمنا و تعرفنا تجربتك معاها من حيث الاداء والصيانه من حيث الاسعار ومستوى الخدمه لدى الوكيل وهل في حل في موضوع المساعدين الخلفيه دي (نفس العيب في الواجا والوكيل بيغيرهم في الضمان)
وشاكر جدا لاهتمامك .... هي اسعار المانيوال وكمالياتها ايه بالمناسبه؟؟!!!

[osman hisham]

1- الهولد العربيه تنقل للتالت طلما ماشى على ال D حتى لو دست عليه قبل ما تتحرك أصل
2- العربيه فعلا فعلا متلينه
3- قطع الغيار سعرها فى حدود أسعار الألنترا يعنى الفانوس الأمامى 650 و الخلفى 450 و فيه فى شارع دمشق مصر الجديده حاجه صيبن 200 -150 بس ما أنصحكش
4- التوكيل ممتاز و خبرتهم كويسه
5- المساعدين هما كده مالهومش حل عايز أقول أنهم مش بايظين بس هما ناشفين و بيقولو ده أحين علشات الثبات
6- سعر المانويل أعتقد 87000 و هيه هيه الأوتوماتيك فى الكماليات .

[mina_ramsis]

انا شدييت على العربية امبارح يا استاذ هشام و عملت كيك داون و لاحظت انها عملت الكيك داون عند 4000 ار بى ام و تقريبا طارت من على الارض يعنى اخدت من 90 ل 130 فى غمضة عين تقريبا و الصراحة خفت اكمل فخفيت رجلى بسرعة من على البنزين :D بس الصراحة لاحظت رعشة بسيطة فى الدريكسيون على سرعة ال 120 او اكتر و مابتظهرش فى اقل من كده

[osman hisham]

فى صيانة ال1000 خليهم يشوفو ترصيص العجل لأن المشكله دى ما ظهرتش عندى
جرب تسوق عادى لغاية ما توصل لل140 و شوف برضه ممكن تكون أتهيالك من التوتر لان العربيه فعلا بتطير فى الكك دون
و شوف ثبات العربيه رائع على 150 أزاى
بس بلاش تهور طبعا دى تجارب لمره واحده بس