تجربتى مع الكويت والبلاد العربية

[kemo860]

كان عندى كذا حاجة فى عربيتى الأوبترا وهى عاملة حوالى 20 الف ك وهى مش فى الضمان
المهم علشان مش عايز اطول عليكو
روحت الكويت والبلاد العربية اللى فى الدقى يوم السبت 19 - 6 الساعة 9 صباحاً
قابلنى فنى الأستقبال وقولتلة على المشاكل اللى فى العربية وكتبها وقالى هانعمل صيانة العشرين الف + المشاكل اللى فيها
انا قولتلة انا مغير كل الفلاتر حتى فلتر التكييف ومغير زيت وبوجيهات وغاسل دورة المياة
المشاكل اللى فى العربية:
1 - طقطقة عند كسر الدريكسيون شمال او يمين
2- تخبيط فى العفشة
3- استهلاك زيادة للبنزين
4- قراءة خاطئة لامبير البنزين " الامبير بيجى على الخط الاحمر والتانك لسة فية حوالى 15 لتر"
5- ترتية فى الموتور

الحقيقة الراجل كتب كل اللى قولتلة علية ودخلت العربية الساعة 9.30ص وقالى 3 ساعات

المهم العربية خلصت الساعة 2.00 م يعنى بعد اربع ساعات ونصف

جاتلى الفاتورة 322.5 جنية مصنعيات فقط روحت زى الباشا كدة دفعتها وقولت مش مشكلة فى سبيل ان العربية بقت تمام

دورت العربية ويا ريتنى ما دورت ترتية الموتور هى هى ونفس الطقطقة هى هى روحت واقف فى مكانى وناديت على المهندس
جالى فى منتهى التناكة اللى فى الدنيا وفتحت الكبوت وقالى فين الترتية دى مع انها واضحة للاعمى بس هو الوحيد اللى مش شايفها ولما سالتة عن صوت الطقطقة قالى بكل بساطة العربية محتاجة قنطرة لان العربية واخدة خبطة من تحت هى سبب ترتية الموتور و صوت الطقطقة وقالى لازم تغير قنطرة فى اقرب وقت لان ماينفعش تمشى بيها كدة
دخلنا انا وهو سألنا على القنطرة وكانت المفاجأة 3542 جنيه غير شاملة الضرائب

خدت العربية ومشيت طبق الأصل زى ما دخلت زى ما خرجت
وكل العيوب اللى فيه زى ما هية

المفاجأة انى روحت لواحد عندة كومبيوتر بتاع ظبط الزوايا رفعنا العربية ونزلنى بصينا على القنطرة الراجل قالى مافيهاش الهوى كل الموضوع فى حتة صاج من تحت مخبوطة ممكن تتغير ب 100 جنية استيراد وهى اصلا مش عاملة مشكلة وصوت الطقطقة اللى تحت دة تربيط عفشة ليس الا
المهم ربط العفشا وظبط الزوايا وخرجت من عندة مفيش اى صوت طقطقة والمشكلة اتحلت ب 30 جنية
انا حبيت بس اقولكم تجربتى مع الكويت والبلاد العربية بجد ربنا يسامحهم على عدم الضمير ويكفينا شر النصابين
ومعلهش لو كنت طولت عليكم

[dolly13]

ربنا يعوض عليك فى الفلوس
بس ازاى تدفع الفلوس طالما العربية طلعت زى ماهى يعنى ليه ماعملتش مشكلة علشان تسترد فلوسك طالما ان كلها مصنعيات ولم يقوموا بتغيير قطع غيار مثلا
والله حاجة تحرق الدم فعلا

[anonasad]

ازاي برا الضمان عربية حضرتك ؟

[kemo860]

ازاي برا الضمان عربية حضرتك ؟

علشان هى موديل 2006 وكانت مرفوعة والضمان بيسقط بعد 3 سنوات

[د.محمود صلاح]

الحاجات الصغيرة المبهمة دي بحب اعملها برة التوكيل لأنها عايزة واحد صاحب ورشة قلبه عليها مش موظف والسلام

[gbeshay]

انا بقي اصلا كنت داخل المنتدي النهارده علشان اسال علي المركز ده لان حصل معايا موقف مش تمتم منهم المهم الاول احب اقول لي اخونا كيمو انت ربنا يعوض عليك بس انت مزكرتش باقي المشاكل الي كانت في العربيه قبل التصليح اتصلحت ولا لسه لو لسه مدام دفعت فلوس تبقي متخرجش غير لما تظبط العربيه


المشكله بتاعتي بقي انا معايا هيونداي نيو اكسنت 2010 وديتهلهم امبارح تبع التامين علشان هيغيرو رفرف ورا و قدام هيغيرو الشاسيه بتاع الرفرف و خبطه صغيره في الشنطه و الكبوت فيه تقويسه صغيره
وانا بتكلم مع المهندس الي هناك كاني بتكلم مع وزير بالظبط قمه في التناكه وعامل نفسه قرفان و زهان من الدنيا المهم بقي البيه ده بيقولي العربيه علي الحاجات الي فيها دي هتاخد 15 يوم شغل
انا بصراحع صوعقت لما عرفت انها هتاخد الوقت ده كله انا متهيالي لو العربيه معجونه مش هتاخد الوقت ده كله انا مش فاهم فيه ايه الناس ده بتتكلم ازاي انا مش فاهم بجد

قمه في التناكه و معامله سيئه جدا جدا انا مش عارف هيعميلو ايه في العربيه ربنا يستر بجد

[kemo860]

انا بقي اصلا كنت داخل المنتدي النهارده علشان اسال علي المركز ده لان حصل معايا موقف مش تمتم منهم المهم الاول احب اقول لي اخونا كيمو انت ربنا يعوض عليك بس انت مزكرتش باقي المشاكل الي كانت في العربيه قبل التصليح اتصلحت ولا لسه لو لسه مدام دفعت فلوس تبقي متخرجش غير لما تظبط العربيه

انا لما قالى على تكلفة القنطرة ذى ماتقول كدة دخلت فى غيبوبة + ان فى مشكلة استهلاك البنزين والقراءة الخاطئة لأمبير البنزين مش بتظهر فى ساعتها وانا ما كتبتش الموضوع دة الا بعد ما اتأكدت ان مافيش حاجة اتصلحت

وربنا يستر على عربيتك هناك ما يكونوش عايزين يغيرولك شاسية او موتور