قررت ابيع عربيتى....الحقونى

[islam_6110]

قررت ابيع عربيتى بسبب مركز العوض و قطع الغيار تخيلوا عملت حادثه بعربيتى السبارك خبط فى ميكروباص واقف تخيلوا ايه اللى حصل بالعربيه:-
1- تهشم الاقصدام
2- تهشم الفانوس الامامى يمين
3- الرداتير
4- سربنتينه تكيف
5- خزنة زيت الباور
6- كلاكس
7- كبود
8- ركبة شاسيه
9- كارتيره يمين
10- 4 فيش فى ضفيرة الكهرباء
11- صدر
12 - شمعدان
13- الله اعلم فى حاجه تانيه و لا لا؟
تخيلوا ان المصنعيه بس حوالى 6500 تخيلوا بقا قطع الغيار تخش فى كام ؟
يعنى بالميت العربيه هتتصلح لحوالى من 13000 الى 15000 جنيه تخيلوا عربيه سعرها دلوقتى 51000 و يتصلح الجزء الامامى فقط بهذا المبلغ يعنى اكتر من ربع تمن العربيه و تخيلوا ان الضفيره عشان خاطر 4 فيش مكسورين هيغيروا الضفيره كلها حاجه ................ الصراحه انا دمى محروق جدا مش عارف اعمل ايه و لو حبيت ابيعها ممكن تجيب كام بعد التصليح و تنصحونى بايه ابيع و لا ايه؟؟؟؟؟؟ الحوقنى اقبل اتجنن و اللذيذ ان فى قطع غيار مش متوافره و عجبى

[aid904]

قدر الله وما شاء فعل حاول تصلحها بس متصرفش اوي وخليها معاك شويه وبعدين ابقى بيعها علشان متحسش بالخسارة ثانيا الاسعار دي في التوكيل ولا برة

[islam_6110]

اسعار توكيل

[solycar]

قررت ابيع عربيتى بسبب مركز العوض و قطع الغيار تخيلوا عملت حادثه بعربيتى السبارك خبط فى ميكروباص واقف تخيلوا ايه اللى حصل بالعربيه:-
1- تهشم الاقصدام
2- تهشم الفانوس الامامى يمين
3- الرداتير
4- سربنتينه تكيف
5- خزنة زيت الباور
6- كلاكس
7- كبود
8- ركبة شاسيه
9- كارتيره يمين
10- 4 فيش فى ضفيرة الكهرباء
11- صدر
12 - شمعدان
13- الله اعلم فى حاجه تانيه و لا لا؟
تخيلوا ان المصنعيه بس حوالى 6500 تخيلوا بقا قطع الغيار تخش فى كام ؟
يعنى بالميت العربيه هتتصلح لحوالى من 13000 الى 15000 جنيه تخيلوا عربيه سعرها دلوقتى 51000 و يتصلح الجزء الامامى فقط بهذا المبلغ يعنى اكتر من ربع تمن العربيه و تخيلوا ان الضفيره عشان خاطر 4 فيش مكسورين هيغيروا الضفيره كلها حاجه ................ الصراحه انا دمى محروق جدا مش عارف اعمل ايه و لو حبيت ابيعها ممكن تجيب كام بعد التصليح و تنصحونى بايه ابيع و لا ايه؟؟؟؟؟؟ الحوقنى اقبل اتجنن و اللذيذ ان فى قطع غيار مش متوافره و عجبى

نصيحة لوجه الله


انا كنت عملت حادثة ورحت عملتها فى العوض و حدث ما لا يحمد عقباه ولا يتخيل ان ممكن يحصل فى توكيل

اسحب العربية من هناك و وديها الحرفين اضمنلك بكتير

المركز دا مليان ناس مش محترمة

[ramremo]

ربنا يعوضك ان شاء الله وقدر الله وماشاء فعل --- حاول تشوف تصليح بره التوكيل ده

[fawzyyyy]

يا اسلام باشا ......
شكل حضرتك اول مرة تصلح عربيتك او تعمل حادثة ....و ده طبعا الحمد لله......
انا قصدي يعني ان حضرتك معندكش خبرة في موضوع التصليح

دايما بيبقي سعر التوكيل بيبقي 4 اضعاف اسعار برة

يعني انا حاقولك حاجة و علي مسؤليتي.......بالوصف بتاع حضرتك ده.....عربيتك يوم ماتتنطط السمكري حياخد 500 جنيه.....انا معايا فيرنا كانت مشيسة والله و السمكري خد 600 جنيه
و الميكانيكي لو حيشيل الماتور و ده غالبا حيحصل عشان السمكري حيشتغل..........حياخد حوالي 300 جنية...و حتبقي كمان كارمه
يعني المصنعية يا سيدي كلها قول 1000 جنيه
و المشكلة كلها في قطع الغيار ......., و انا انصحك تجيبها من برة التوكيل.........حتلاقي اسعارها كويسة جدا ممكن توصل لنصف سعر التوكيل
انت عارف ليه التوكيل ضارب السعر ده....لأنه مبيصلحش بيغير بس.....يعني ممكن الكابوت يكون فيه حاجة بسيطة و يتسمكر ب 100 جنيه ....لكن هو طبعا يقولك لأ حيتغير و كمان بأسعارهم ب 1400 جنيه و بياخد كمان مصنعية تركيبه حوالي 300 جنيه علي انهم مسمارين.............!!!!!!


متقلقش ان شاء الله العربية مش حتحتاج اكتر من 3000 جنيه عشان ترجع زي ما هي
و اي اسئلة او اي مساعدة انا موجودين انشاء الله

[hoksha]

انا صاحبي اتقلب يالاسبارك
رحنا صلحناها في الحرفين
وطبعا ده كان اوفر بكتيير هي بس حاجات الماتور اللي تعبنا علشان نجيبها
لكن باقي الحاجات (فانوس شمال وكبود ورفرف وصدر كان سهل مجيته)
ان شاء الله تكون سهلة التصليح والف سلامة على حضرتك

[islam_6110]

الى الاخ solycar ممكن تقولى ايه اللى حصل عشان اخد بالى لانهم اشتغلوا خلاص؟
شكرا خاص لكل من شارك فى هذا الموضوع و ربنا يستر عليكوا من الحوادث

[fawzyyyy]

و يا ريت يا استاذ اسلام تبقي تشرحلنا حضرتك عملت ايه و توصلت معاهم لأيه
و اتكلفت كام عشان الكل يستفيد من التجربة
و ربنا يعوض عليك و ترجع زي الاول و احسن انشاء الله

[islam_6110]

ان شاء الله اول ما العربيه تتصلح هكتبلكوا تقرير كامل و تكلفة قطع الغيار و تكلفة المصنعيه بس دعواتكم معانا

[mohamedrabia]

محدش بيصلح في توكيل عن تجربة واحد صاحبي عامل حاد ث شديد راح التوكيل قاله 23 الف علشان ترجع صلحها برة 6000 جنية بس التوكيل مش عارف عندهم الي ما يتعمل ولا الفانوس السحري

[islam_6110]

ياجماعه للاسف روحت عشان اسحب العربيه لقتهم اشتغلوا خلاص فا مردتش اقولهم اسحبها لحسن ياخدوا منها حاجه او يطلعوا باى مصلحه انتوا فاهمين بقى

[fawzyyyy]

ربنا يوفقك يا باشا ...........بس انت كان المفروض تتخانق معاهم.......هما ازاي يشتغلوا في العربية من غير ما يخدوا من حضرتك امر بالشغل فيها.............!!!! ده شغل تدبيس......!!
علي العموم خد بالك كويس و ماتتنازلش عن اي حاجة مش عاجباك في الشغل.........يعني لو حاسس ان هما مكروتيين العربية زعق و عالي صوتك عشان يتعدلوا.......اصل مينفعش معاهم الناس المحترمة خالص.....و دعواتي ليك بالتوفيق انشاء الله

[islam_6110]

ربنا يكرمك يا باشا

[engahmedsamy]

اعملها برة طبعا