موضوع مقرف فعلا

[bebo_abdeldayem]

في الكمين الي قبل السويس .. الكيلو 109.. الكمين بيبقي حارة واحده وزحمه... المهم انا و جنبي عربيه نقل... و بعدين مستنيها لما تدخل و ادخل وراها .. الاقي التباع بيبص من الشباك و بيقولي خش يا باشا بسرعه .... المهم دخلت قدامه و قاعد بقول لزمايلي والله سواقين النقل في منهم محترمين برضوا... بس كنت لسا مادخلتش بالعربيه كلها ... عشان كان في عربيه تانيه واقفه قدامي... المهم دلوقت الموقف كالاتي ... انا واقف و في عربيه واقفه قدامي و في نقل سايقها واحد محترم واقفه ورايا .. و انا مريح و ساند راسي و باصص في المرايه ... و اذ فجأة الاقي في المرايه العربيه النقل بتقرب بتقرب و السواق المحترم قرر انه يتحرك .. رغم اني واقف و الي قدامي واقف ... و شايف عربيته داخله فيه انا دوست علي الكلاكس و عملت قرد عشان يقف ولا هو هنا ... لغاية مادخل في الفانوس الخلفي و استمر للرفرف قمت انا محستش بنفسي قمت جايب علي ال d و كسرت الكمين .. عشان لو كنت و قفت كان زمانه تقريبا مش حسحس الا لما يشيلني قدامه و يمشي بيا .. دخلت في الجارة الي المفروض مايدخلش فيها عربيات دي عشان كان قدامي عربيه تانيه ... المهم لقيت الظابط قام من مكانه و بيشاور علي سواق النقل ... و امين شرطه جري ركب جنبه لغاية ما ركنه علي جنب ... انا مش دريان بأي حاجه الا الفانوس المكسور و الرفرف بالاكصدام مطبقين .. و واقف متنح فيهم ... لقيت الامين جاي بيقولي رخصك .. رحت لقيتهم قاعدين بيهزأو و يشتموا في الراجل ... قلت للظابط لو سمحت انا مش حيفيدني بأي حاجه التهزيق و الشتيمه اكتر ما حيفيدني انك تبدأ اجرائاتك عشان اخد حقي انت شفت كل حاجه بعينك.... قالي طيب احنا نعمل محضر و بعدين تاخده و تروح اسم السويس و بعدين تتعرضوا علي النيابه و وكيل النيابه يقرر ... يعني يديني و يديك طولة العمر... قمت واخد رخصي و مشيت .
المهم يا جماعه اني فعلا مضايق و حالتي النفسية زي الزفت ... العربيه يدوب مكملة ال 1000 كيلو... رحت التوكيل قالولي سيبها اسبوع ... و بصراحه مش عايز اروح لسمكري عشان عايز اعملها في التوكيل ... و في نفس الوقت مش عايز اسيبها في التوكيل اسبوع خصوصا ان الموضوع ماياخدش شغل اكتر من يوم بالكتير اوي ...مضايق أوي

[dr-mohamed]

بصراحة عندك حق
منهم لله

[vedodido]

يا نهار ابيض. على الوصف بتاع حضرتك دا اللى كان سايق العربيه النقل دا مش بنى ادام دا حيوان مش بنى ادم مثلا ومش محترم دا حيوان انا قاعد بقراء كلامك ومش متخيل الوضع فى حد بالغباء دا
ربنا يعوض عليك وتيجى فى الحديد ولاتيجى فى العبيد وادام العربيه جديده كدا متعملهاش غير فى التوكيل هو ممكن يكون غالى شويه بس ان شاء الله ترجع زى الاول
لا حول ولاقوه الا بالله

[Ahmed Amin]

لو الفلوس مش هتفرق معاك توكيل وخلاص.
لو تقدر تجيب الحاجات الأصلي بتاعتها من بره وتركبها عند سمكري نضيف تعرفه يبقا أفضل لو التكلفة هتكون كبيرة في التوكيل.

[ahmedfouad]

ربنا يصبرك

[tameraast]

قدر الله و ما شاء فعل بس المفروض كنت تعمل محضر

[bebo_abdeldayem]

شكرا يا جماعه علي الردود و التفاعل مع الموضوع .. هي مش المشكله في التوكيل الفلوس قد ما هي اني اسيبها اسبوع .. و استاذ تامر انا عندي استفسار , بما ان مفيش تأمين يبقي ايه فايدة المحضر؟؟

[ahmed643]

قدر الله وما شاء فعل

هات الحجات الاصليه وركب عند سمكرى كويس
مش هتاخد يومين وهتبقى تحت عنيك ومش هيكون غالى زى التوكيل
التوكيل مش فى كل حاجه فى صنايعه احسن مليون مره من التوكيل

ربنا معاك

[adelwafa]

ياجماعة الخير أخوكم يمتلك سيارة فيات 128 موديل 2008 وانكسر الكوبلن الشمال وبحثت عنه فى مدينة قنا حيث أعيش ولكن بدون جدوى هل من مساعدة

[د.محمود صلاح]

ياريت يعلموا الناس أثناء الترخيص إن القيادة فن وذوق واخلاق

[dark_smoky]

انا لو منك كنت خدته جوز اقلام عشان يفوق ، تلاقيه كان شارب

[bebo_abdeldayem]

انا كنت عايز ابعد عن الشخصيات المقرفه دي واخلص.... سواق شارب و امين شرطه متواطئ معاه بس قاعد بيهزأه بس عشان يعمل عليا تمثيليه و ظابط تنك كسلان ... تحس انهم عصابه ... قلت اخد رخصي و امشي عشان التعامل مع شخصيات زي دي يضايق اكتر

[vedodido]

انا عارف ان التعامل مع الشخصيات دى حاجه صعبه بس هو كدا فاز بالتمثيليه اللى اتعلمت ديا انما انت لو كنت اتحملت شويه كنت ممكن تاخد حقك منه وعلى العموم الحمد لله على كل شىء

[ahmed88hassan]

الراجل ده شكله كان عامل عمله وعايز يجري من الكمين
وبغبائه محسبهاش وحصل الللي حصل
ربنا يعوض عليك ويهدي الجميع

[Bassem Raafat]

أهم حاجة إنك بخير ومش مشكلة الصاج ،، أنا رأى إنك تروح تجيب حاجاتها الأصلية من التوكيل وتروح لسمكرى محترم يركبهالك ........

وعلى رأى عم عبده (( الميكانيكى القديم )) : " لما بيحصل للعربيه حاجه وحشة أو بتعطل فى الطريق لازم تعرف إن ربك بيحبك وبيحميك من حاجة أكبر منها لو كنت كملت الطريق عادى " ...... الله يمسيك بالخير يا عم عبده