ليه كدا يا اوبترا 2 ....؟؟

[hema_fg2]

السلام عليكم يااحلى نااااااااااااس فى منتدى نايل موتوز
كل سنه وانتم طيبيين رمضان كريم

لو سمحتم انا عندى مشكله ومش عارف العيب منين ياريت حد يعرف يفيدنى
انا عندى عربيه اوبترا اتوماتيك وداخل ع 5000 بص كل المشكله الى شوفتها فى العربيه انها بتسحب بنزين بطريقه غير عاديه بجد انا هتجنن انا كل اما انزل بيها لازم وانا راجع افولها لان البنزين فى المؤشر بيهبط بطريقه غير عاديه فا مش عارف اعمل ايه انا كده كده رايح الصيانه بتاعت الـــــــ 5000 فا مش عارف هناك هيفيدونى ولا كالعاده جرب وابقى تعال قولنا المشكله اتحلت ولا لسه وهكذا مع التوكيل تجربه من غير حل وبس......
شكر خاص لاصحاب منتدى نايل موتوز
شكر جامد جدا جدا لاعضاء نايل موتورز

[mina_ramsis]

حاول تبص تحت العربية احسن يكون فيه خرطوم مفكوك و لا حاجة او به انت اللى سواقتك عنيفة اوى و كله كيك داون

[Bassem Raafat]

حاول تحسب إستهلاك البنزين بالظبط قبل ما تقولهم فى التوكيل .... علشان لازم يسألوك السؤال ده ( يعنى بتعمل معاك كام فى الصفيحة ؟ ) وأياً كانت إجابتك ح يكون ده الرد ( الأوبترا طبيعى بتاكل بنزين علشان 1600 و 2 كامه ........ )

بص يا باشا تقريباً المعدل العادى للعربيه دى جوه البلد من 180 حتى 200 كم فى الصفيحه ( 20 لتر ) حسب اسلوب السواقه والطرق الزحمه وتشغيل التكييف ..... احسبها بالظبط وإنت تعرف المشكله فين ...... لو معدل إستهلاك العربيه للبنزين غير كده يبقى فى مشكله ولازم تحلها .....

وربنا معاك وإبقى طمنا ........... وكل سنه وانت طيب

[fawzyyyy]

اولا زي ما استاذ باسم قالك لازم تحسب انت بتمشي قد ايه في الصفيحة ......او ممكن تفول و تصفر العداد و تشوف انت مشيت قد ايه اما يخلص البنزين

تاني حاجة الحرق و الجري بيتهلك بنزين و طبعا التكيف

تالت حاجة العربية الجديدة استهلاكها للبنزين بتتظبط بعد التليين يعني بعد 5000 كم ولا حاجة

[sherif_m72]

بص لنت لازم تحسبها بالكيلو عشان تطمن
وخلى بالك انا عندى اكتر من صاحب اشتكو من مشكله هبوط المؤشر بسرعه رهيبه و طلع العيب من العوامه بتاعة التانك

[aymanmaly]

بص يا سيدى الفاضل
اولا:
كيفية حساب الاستهلاك
اولا اذهب الى بنزينة و فول العربية وخلية يفول لغاية اول فصلة يعنى الماكينة بتاعة البنزين تكون اتوماتيك و تفصل لوحدها
و جيب a trip و صفرة
بعد كدة استعمل العربية الاستعمال العادى لغاية ما العداد يعد 200 كم ( اكثر مش مهم )
و بعد كدة روح لنفس البنزينة و نفس الماكينة الى مونت منها المرة الاولى
و اعمل نفس الخطوة الاولى يعنى فول حتى اول فصلة
و بكدة هاتعرف انت استهلكت كام لتر بالضبط فى الكيلو مترات
نيجى تحسبها ازاى
مثلا انت مشيت 250 كم
و مونت 22 لتر
22 / 250 = 0.088
0.088 * 200 = 17.6 لتر فى ال 200 كم
او
250/ 22 = 11.363
11.363 * 20 = 227 كم فى الصفيحة ( الصفيحة 20 لتر )

احسبها بالطريقة دى و اكتب الرقم الى هايطلع ليك مع انك تقول لنا انت مشيت قد اية طرق سريعة و داخل المدينة و كان التكيف شغال ولا لأ
و يستحسن انك تعمل الموضوع دة على سرعة ثابتة 90 كم ساعة بدون تكيف علشان تقدر تحدد بالضبط الاستهلاك الحقيقى
و اذا كان الاستهلاك عالى سوف نقول لك ممكن يكون من اية لان الاحتمالات كثيرة جدا

[auto5truck]

معدل العربية معايا ما بين 11, 12 لتر/100كم لا بتزيد و لا بتقل

[aymanmaly]

معدل العربية معايا ما بين 11, 12 لتر/100كم لا بتزيد و لا بتقل

طيب دة بالتكيف ؟
داخل المدن؟
سرعات متغيرة ولا ثابتة؟

[hema_fg2]

بجد يااحلى اعضاء واحلى نااااس فى نايل موتورز انا مش عارف اشكركم ازاى انا هعمل كل الى انتم قولته عليه وهجرب كده معدل استهلاك البنزين قبل ما اروح التوكيل وهقولكم....بس للعلم انا غالبا بسوق العربيه داخل المدينه مش بسافر كتير يعنى ممكن اسافر 2 او 3 فى الشهر وممكن مش اسافر خالص وع فكره انا من الاسماعيليه والتوكيل الى عندى هنا القاضى فى طريق الجلاء فا مش عارف حد ممكن يعرفه ولا ايه واذا كان حد اتعامل معاه ولا لأ بس ع العموم انا يومين وهقولكم معدل استهلاك البنزين كام بالظبط.........
وبجد اااااااااااااااااااااااااااااالف شكر للأعضاء
mina_ramsis
BassemRaafat
fawzyyyy
sherif_m72
aymanmaly
auto5truck
aymanmaly

[hema_fg2]

انا دلوقتى حاطط البنزيم وماشى بالعربيه مستنى اوف هتمشى كام كيلو واروح تانى احط بنزين عشان اعرف الاستهلاك قد ايه....