تقرير استلام سبارك بالصور

[ecybrarian]

أولا لا بد لي أن اشكر الدكتور أحمد فوزي الذي كان ساعدني كثيرا في اختيار سبارك..وكان نفسي يعمل معي هذا التقرير ولكن ظروف انشغاله منعته..كان الله في عونك يا دوك

أولا: جسم العربية من الخارج

مراجعة جسم العربية والتأكد من عدم وجود خرابيش او اثار رش (في عربيات بتتخبط في المخزن او وهي نازلة من المراكب)

دا label إللي موجود على كل الزجاج في السيارة


الاكصادامات والمرايا بلون العربية في حين إن الأكر لونهم اسود مش بلون العربية..دي ميزة العربية السودا :-)


العربية من الأمام مافيش فوج لايت..مش عارف إذا كانت الضفيرة بتاعت الفوج لايت موجودة ولا لأ؟


العربية من الخلف..فوج لايت عاكس خلفي في الاكصدام شمال..وفي الاكصدام يمين نور المارشيدير


ما شاء الله الشنطة معقولة مقارنة بالبيكانتو مثلا. مساعدين الشنطة هايلين ما بتعملش اي مجهود وانت بتفتح الشنطة. بس الشنطة مش واصلة بالسنتر لو ومافيهاش نور


هي الشنطة تقريبا بتنزل مصر من غير نور لاحظ مكان اللمبة في الصورة!!!


التأكد من العدة إللي هي كوريك ودراع كوريك ومفك ومفتاح عجل


التأكد من الاستنبن منفوخ ومربوط كويس


الكنبة بتنزل كلها مش على حتيتين


ارتفاع المرايا ممتاز والرؤيه فيها جيدة ..بالنسبة لي قعدت دقيقتين لحد ما تعودت على المرايا اليمين


دا شكل الجنط والكاوتش..الجنط ظريف لا منه حديد ولا منه اسبور


الكاوتشات كمهو ودا المقاس بتاعها..انا طبعا مابشتريش كود T دا ابدا..

[ecybrarian]

ثانيا: اتفضلوا في الصالون


دا شكل الفرش والكنبة. يوجد ثلاث احزمة آمان


امتداد الكونسول من عند الكنبة في حامل كوب وبتاعة كده مش عارف ايه دي :-)))) كان نفسي يكون في غطا جلد يكسي فرامل اليد


دا الكونسول ما بين الكرسين..ملحوظة المارشيدر نقله عادية من غير سوست وخمس سرعات


دي أماكن التخزين في التابلو أمام الكرسي اليمين (جنب السواق)


دا الدرج بعد ما تفتح..الحقيقة اماكن التخزين في العربية مش كتير..يعني مافش درج تحت الكراسي ولا في باكتات الابواب الخلفيه


دا نص التابلو المهم..العدادات بنزين، سرعة، RPM، ساعة، كليومتر ODO و اتنين رحلات trip A,B. الظريف إن مؤشر البنزين كهربا بيشتغل لما تفتح الكونتاكت (زي الميجان :-))) التكييف تلاجة بمعني كلمة تلاجة..انا شغلت التكييف علشان امبارح كان عفرة وتراب واضطريت اوطي السرعة بتاعة المراوح..الكاسيت...لاتعليق لأني لو علقت هاتوقف في المنتدى..كانوا نزلوا العربية من غير كاسيت احتراما لمشاعر المشترين..الظريف بقى إن الكاسيت فيه security code لزوم الأمان علشان ما يتسرقش!!!!!!


دا اقصى شمال التابلو وفيه الكنترول بتاع المراية اليمين وcoin holder..أنا مش عارف الفتحة إللي بالعرض تحتهم دي بتاعة ايه.


دي السماعة..موجود منها اتنين في التابلو من فوق..الحقيقة صوتهم مش وحش بل مقبول جدا..بس مش عارف هما كام سم


أنا مش عارف دي اسمها ايه. بس على العموم دي إللي خلف الدريكسيون وفيها مؤشرات الحزام وcheck engine والبطارية والاشارات شمال ويمين والباب المفتوح..وايه كمان؟؟ مش فاكر الصراحة


دا درج تحت الدريكسيون وفي اقصي شماله فتح الكبود


فتح الشنطة والتانك من الداخل


دي الشماسات..حطوا المراية في شماسة السواق وفي مكان على غطا الشماسة ممكن يتحط فيه كارنيه او business cards


دا باب السواق إللي فيه الماستر بتاع السنترال لوك..الغريب إن السنترال لوك مش بيفتح من اكرة الباب الداخلية!!!!! لازم ترفع سقاطة المسوجر


دا الباب الخلفي


الابواب الخلفية فيها child lock علشان الاطفال ما يفتحوش العربية من الداخل


الشماعة دي مش موجودة غير فوق الباب خلف السواق


الكراسي بتتحرك لورا وللأمام ودي صورة دراع تحريك ضهر الكرسي


دي بيانات الكاوتش موجودة في عتب باب السواق

[ecybrarian]

ثالثا: لهواة الصيانة المنزليه :-)))


دا الكبود..قربة مياه المساحات خلف الفانوس اليمين فيها مياه..قربه المياه خلف الاتنين في الآخر فيها مياه خضراء..علبة زيت الباور جنب الفانوس اليمين على طول وفيها زيت..زيت الفرامل ورا الفلتر جنب البطارية ..وكله لازم يكون مستوى السائل ما بين العلامتين..طبعا الموتور 1000 سي سي كامة علوية انجكشن متعدد النقاط


مروحة واحدة التبريد بسرعتين ويظهر في الصورة حساس الشكمان


وزن ورقم السيارة..موجود على اقصى الشمال عند البطارية


بيانات البطارية


بيانات الفانوس..لسه ما فتحتش علبة الفيوزات علشان اعرف الفوانيس على كتاوت ولا لأ


لو مديت صباعك من الشبكة هاتلمس الرادياتير والسربنتينة..دي مشكلة العربية من الافضل إنها ما تتخبط من الامام نهائي ولا حتى في رصيف اثناء الركن


انا مش عارف ايه دا..هل دا سلك الدبرياج..ولا الدبرياج على ماستر في العربية دي..حد من الخبراء يقول لنا..المهم انا صورت دي لأن باين إن العربية ليها تصفيح من تخت بس ما بتنزلش بيه مصر


دي اقرب صورة للعربية من تحت عرفت اخدها


دا شكل التعليق الخلفي..ودا بيسموه تعليق حر..زي الياريس والميجان

[Bassem Raafat]

100000000 مبروك عليك يا باشا ، وربنا يحفظهالك ويكفيك شرها : )

وبصراحه تقريرك ده فوق الممتاز ، الله ينور عليك .

[YoussefMostafa]

تقرير ممتاز جدا

ربنا يباركلك فيها ويديك خيرها ويكفيك شرها

السبارك عربية هايلة وهتعجب حضرتك ان شاء الله

[د.محمود صلاح]

تقرير ممتاز وموضوع رائع ربنا يبارك لك فيها .

[Mohamed.Ramah]

الف مبروووووووووك

[mr_sameh]

الف مبرووووووووووووووك

[kar!m]

الف مبروك .. و فعلا تقرير ممتاز .. أنا لو رحت اتفرجت العربية مش هشوف فيها اللى انا شفته فى موضوعك ده.

[fawzyyyy]

الله اكبر .....ما شاء الله
معلش انا بس عشان مشغوول في الامتحانات فمبدخلش علي المنتدي بقالي فترة....هانت اهه 3 اسابيع و حتلاقيني مقيم هنا ان شاء الله
اولا الف شكر علي كلام حضرتك ....ده حضرتك اخ كبير ليا.......و انا تحت امرك في اي حاجة و رقم تليفوني اهه 0111634549

يا رب تكون وشها حلو عليكم و يكفيكم شرها

ما شاء الله التقرير جميل جدا ...حضرتك مسبتش حاجة.....الجزء اللي تحت ال coin holder ده مكان للرخصة او البطاقة
و فعلا مفيش نور في الشنطة للأسف...لكن قولي ايه اخبار العربية معاك و ايه رأيك في ارتفاعها.... انا عايز اشوف تقييم ليها بقي بس بعد اما تمشي بيها شوية ان شاء الله

و اهلا بيك سباركاوي جديد و عضو جديد معانا في منتدي شيفروليه....و عايزين نشوفك بقي في المقابلة اللي جاية يوم 3/11 ان شاء الله

[aymanmaly]

الف مبروك على الاسبارك الجميلة
ما شاء الله
على فكرة انا من عشاق هذة العربية
و ربنا يديك خيرها و يكفيك شرها
وشكرا على التقرير المصور و مجهودك فية
انت هاتخلى الى بيفكر يشترى مش هايروح يتفرج لانك مفرجة كل حاجة
و ارجو من السادة المشرفين تثبيت الموضوع فى اهم الموضوعات عن الاسبارك

[mhmdalsaadany]

الف الف مبروك علي السبارك وعقبال الكمارو ان شاء الله
تقرير ممكتاز نا حاسس اني كنت معاك وانت بتستلم والله

[zeznia]

بسم الله ماشاء الله ربنا يبكلك فيها
وشكرا علي مجهودك

[ecybrarian]

الله يبارك فيكم جميعا..أنا فرحان بالعربية دي جدا..دي العربية التانية أنا جايبها للمدام لعدة اسباب..مصاريف باص المدرسة عدت الألفين جنيه للطالب الواحد..وانا عندي انتين..والباص بيزيد كل سنة يعني هاخش في 7000 جنيه في السنة باصات يدفعو مرة واحدة..دا غير ذل الباصات إللي بتاخد العيل يلفوا بيه مصر كلها وبرجعه البيت بعد ساعتين أو أكثر..
دا غير ذل واستغلال التاكسيات..اي مشوار دلوقتي رايح جاي بيعمل حوالي 50 جنيه..يعني لو العيال رايحة النادي ثلاثة أيام في الاسبوع شوف بقى المصاريف..ماكنش قدامنا غير أني اسيب لها العربية الميجان واديها ميكروباصات (زي زمان) او اجيب لها عربية city car وقد كان القرار بتوفيق الله ومساعدة أخي الصغير سنا والكبير خبرة الدكتور أحمد فوزي

[mhmdalsaadany]

ربنا يباركلك في اولادك ويحفظهملك ان شاء الله
ومش معنى انها عربيه المدام انك متجيش يوم 3/11 هنستناك حتى لو بالميجان (معلش تعدي المره دي يا رجاله)