Tweet
بسم الله الرحمن الرحيم
اسمحوا لي أقيم سيارتي شيفروليه أوبترا 2009 أوتوماتيك ، وكذلك صيانة 15000 والتي كانت في توكيل العوض جروب مميزات الأوبترا :
- الصالون واسع ومريح
- الارتفاع عن الأرض معقول جداً ولا يسمح بالاحتكاك في المطبات
- الموتور عفي وإن كانت استجابته ليست سريعة قوي ، ولكن معقولة.
- الشنطة واسعة
- استهلاك البنزين متوسط بمعدل 10 كيلو لكل لتر بنزين ( طبعا يزيد الاستهلاك قليلا مع الزحمة والتكييف )
- العفشة قوية وتستحمل.
- الصاج ضعيف وطري جداً.
- مراية الصالون صغيرة ولا تفي بالغرض.
- العفشة ناشفة شوية . بحيث تخليك تشعر بما تدوس عليه.
- صوت الموتور عالي نسبياً.
- الكاسيت ( عيب أن تكون سيارة موديل 2009 وبها كاسيت شرايط ) وإن كانوا تداركوا هذا العيب في موديل 2011 وأصبحت تنزل بـ سي دي .
- التابلوه فقير جداً ،، يعني تابلوه الأفيو أشيك ( من وجهة نظري )
- جهاز الإنذار والريموت خايب جداً .. حتى مافيهوش خاصية أن تغلق السيارة الأبواب بعد التحرك.
صيانة الـ 15000 تمت في توكيل العوض جروب اللي على الآوتوستراد
غيروا الآتي :
- زيت موبيل10000 كم 240 جنيه
- فلتر زيت هدية ( لإني أول مرة أروح عندهم ) لكنه عموماً بـ 18 جنيه
- تيل فرامل 230
- لمبة الشنطة الداخلية 2 جنيه
- فلتر بنزين 35 جنيه
- مصنعيات 195 جنيه ( كتير جدا )
- فوم غسيل الموتور 25 جنيه
- المفروض إني دافع تمن غسيل الموتور ،، لكن بعد ما استلمت السيارة ومشيت .. تاني يوم بابص على الموتور وجدته غير مغسول .. رحت رايح لهم ،، وقلت لهم عيب قوي اللي بيحصل ده .. ده حتى غسيل الموتور شيء واضح وظاهر وماتعملش .. أومال تربيط العفشة وتغيير مواضع العجلات ( كروس ) ممكن يكون برضه ماتعملش .. لكنهم راضوني ، وخدوا العربية غسلوا موتورها على الفور . وشكلهم كده غسلوها بالمياة مش بالفوم.
- تاني حاجة زعلتني وفقدت من ثقتي فيهم إن السوائل لم يتم تزويدها ،، فمثلا مياة المساحات فاضية .. وهذا إن دل فيدل على أنهم لم ينظروا عليها أساساً .
- ثالث حاجة : إن العميل ما بيشوفش حاجة أبداً من اللي بتحصل .. وبيسيبهم لضميرهم .
تقديري الشخصي للسيارة : السيارة جيدة لكن ثمنها في مصر مغالى فيه حبتين .
Comment