الواحد اخلاقه اتغيرت من بعد الحادثة

[joe_techno]

الموضوع و ما فيه اني من بعد الحادثة و الظلم اللي انا اتعرضتلوا في الحادثة من البني ادم المستفذ اللي خبطني ( اللي كان شايف اني انا اللي غلطان مش هو بالرغم من اني كنت واقف لما خبطني و لما نزل من عربيته و شاف عربيتي متبهدله مكلفش خاطرة يهديني بكلمتين و كان كل همه يتأكد اني عربيته مافيهاش حاجة ) بقيت ابص للناس اللي سايقه حواليا بنظرة مختلفة بجد مبقتش مستحمل غلطة من حد بقيت اتلكك لاي حد علي غلطة بقيت استني اي حد يعمل حركة غبية ولا يكسر عليا عشان اديله درس في الاخلاق المشكلة اني مكنتش كدة خااااااااااااااااااااااالص قبل الحادثة كنت اهدي واحد في اصحابي كنت اهدي من ابويا نفسه مش عارف بقي اللي انا فيه ده عشان خبرتي قليلة نسبيا مع السواقة ( 4 سنين ) و دي اول مشكلة تحصلي من ساعة ما ابتديت اسوق و شوية و هنسي ولا هفضل عالطول بتصرف بالاسلوب ده طول ما ان حاسس اني سلامتي و سلامة الناس اللي معايا و سلامة عربيتي مش فارقة مع حد طالما كل الناس بتعمل اللي في دماغها و مش هاممها غير نفسها و بس
انا اسف طبعا اني الموضوع تافه حبتين و مش مستاهل موضوع جديد بس انا فعلا متضايق من الموضوع ده جدا

[ahmed_mido1889]

والله نفس القصه دي حصلت معايا بس الحمدلله
كانت مرات ظابط واستغل سلطته والف محضر وعمل قصه وهميه (سب وقذف واتلاف عمد)
المهم انا كلمت معارف والدي 4 لواءات و عميدين ونقيب قامو معاه بالواجب و ادبوه ومسكتش علي كده
رحت عملت شكوي فيه في الداخليه
اضطر يتنازل عن المحضر اللي هو عامله وفاكرني هتنازله عن الشكوي اللي في الداخليه
كملت الشكوي ونفخته بقي يتحايل علي والدي ومعارفي اني اتنازله وانا سيبت الشكوي ماشيه
وتقريبا كده وقفتله ترقيه

[engaass]

معلش للاسف هى دى برتوكولات الحادثة فى انك تنزل تقول للى قدامك انه هو اللى غلطان
عموما ان شاء الله تنسى الموقف ده وترجع زى الاول

[nicegypt]

اولا : كان الله ف العون ... وعوضك الله بأفضل واحسن .. وربنا يكرمك ويستر طريقك ويكفيك شر سيارتك الحالية ..
ثانيا : دة للاسف اصبح حال البشر فى بلدنا ... ومهما اتكلمنا وعملنا مواضيع فى منتديات معتقدتش من وجهة نظري الشخصية انها هتبقى حل
او هتحل حاجة .
ثالثا : المواقف اليومية كتييير جدا .. اتذكر اهم موقف فيهم ان واحد فى شارع جسر السويس كان بياخد يو تيرن فيا انا !!! غريبة صح
فية يوتيرن بعد الكوبري مباشرة علشان تدخل على الحرفيين .. انا موازي للرصيف ومنتظر الناس اللى بتاخد يو تيرن صف تانى وتالت
لقيت عربية 131 جاي من اقصى اليمين وكسر على عربية جمبى فى يمينى ضربت فرامل فجأة علشان ميخبطش فية .
لقيتة بياخد يو تيرن من اليمين عليا انا ف الشمال بقت العربيتين وش ف وش !!! اية رأيك ف الموقف دة ؟ حتى مش عارف يحسب مسافات ومش عارف امتى يلف الطارة بتاعتة فى ملف

موقف حكيت علية هنا ف المنتدى .. اختصارة واحد طالع من الاشارة حارق وخد غرزة عليا من شمالى طلع بوش عربيتة برة ونسى ان العربية لها ضهر
لازم يلمها ! مفكر ان عربيتة الجزء الامامى فقط وملهاش ضهر لولا انى شفتة كنا هنضيع احنا الاتنين .. عندى خرابيش منة ف الرفرف وصورت الموقف
المضحك ف الموضوع واللى خلانى ضحكت انة بيقولي " انت مش شايف ايدي بشاورلك " ضحكت لانة على شمالى هيشاور ازاي ؟ هيشاور جوة عربيتة
وضايقنى لما بيقولي " انت بتضحك كمان " مش عجبة انى بضحك ! اخدت الموضوع بسخرية وضحك معجبوش !
حاول تتعايش مع الواقع .. وحاول تصبر وتتحلي بالصبر .. وربنا يسترها معاك . بنصحك نصيحة مش بعمل بيها للاسف ! محتاج اللى ينصحنى :)

[A.Saad]

رد فعل طبيعى بعد الحادثة

[mhmdalsaadany]

كلنا مرينا بالموقف دا يومين وهتنسى ان شاء الله وربنا يخلف عليك

[zeznia]

ولا تحرق دمك ولا تغير اخلاقك لان ده مش هيغير الواقع المرير اللي بنعيشه
احسن حل لو خايف علي عربيتك امن عليها وخلي حد يلمسك وابقي اقعد حط رجل علي رجل لحد مالمحضر يتعمل وساعتها تاخد حقك

[medo500]

ياباشا ده رد فعل طبيعي لحالة الجهل والتسيب واللامبالاه من قبل سائقي التاكسي والناس حديثي القيادة في شوارع المحروسة وضواحيها وإمتدت هذه الحالة لتشمل جميع محافظات الجمهورية في ظل التراخي من قبل ادارات المرور وعدم الاهتمام بمعالجة جذور هذه المشكلة
انا حصلتلي حادثة مشابهه لحادثتك كده من سنة تقريبا كانت معايا عربية اوبيل فيكترا هيه اني كنت واقف في الاشارة ولما الاشارة بقيت خضراء ابتديت اتحرك بالعربية وبصيت شمالي لقيت تاكسي من التكسيات اللادا بتاعت زمان جاي بسرعة الصاروخ وكسر الاشارة وراح لابس في الجنب الشمال عندي كسرلي الاكصدام والرفرف الشمال والشبكة والفوانيس والردياتير والركبة بالمساعد والمقص الشمال وفي الاخر بعد ما نزل من التاكسي بتاعه يقولي انا معترف اني غلطان بس للاسف انا مش معايا فلوس علشان اصلحلك عربيتك والكلام ده قدام ظابط المرور وقدام اكتر من 100 واحد شافو الي حصل ظابط المرور قالي هوة بصراحة راجل ابن تييييييييييت بس هاتعمل ايه تحب اعملك محضر ونحوله علي القسم والقسم يحوله علي النيابة افتكرت ساعتها واحد صاحبي كان حصله نفس الكلام كده وراح القسم والقسم حوله علي النيابة هوة والسواق بتاع التاكسي وراحو النيابة ووكيل النيابة اخلي سبيلهم همه الاتنين وفي الاخر صاحبنا ولا استفاد حاجة غير العطلة وكل ليوم رايح المحكمة وجاي من المحكمة بتاع كام يوم وانسي ياريس والقضية اتحفظت وخلص الموضوع علي كده بس قولت للظابط خلاص انا مش هاعمل محضر بس عاوز اربي السواق ده قالي الي عاوز تعمله فيه اعمله مسكت السواق لقيته اد والدي في السن طيب هاعمل ايه فيه ؟ قولتله روح يا والدي مش عاوز اخرتك تكون علي ايدي بس روحت غيرت كل الحاجات الي باظت دي طبعا دفعت مبلغ محترم بس هانعمل ايه قدر الله وماشاء فعل والحمد لله علي كل شيئ

[rompo10]

لو هاتفضل كده يبقي هايجيلك السكر والضغط كبر دماغك

[memo823000]

لو هاتفضل كده يبقي هايجيلك السكر والضغط كبر دماغك

مظبوط كبر مخك واستعن بالله والزم الاستغفار