اوبترا 2005 اوتو ازرق غامق للبيع ، محتاج رأيكم

[maygodopt]

السلام عليكم

اول مشاركه ليا فى المنتدى
انا من اسكندريه
بفكر بقالى فترة اجيب اوبترا اوتو زيرو
رحت المصرية وقلت ها ادفع 70 مقدم واقسط 1000 كل شهر على 3 سنين
لكن حاليا لقيت قدامى عربيه اوبترا 2005 اوتو معروضه للبيع
صاحبها عايز 60 الف جنيه
هى ماشيه 66 الف كيلو
وانا بصراحه معرفش فى العربيات كويس ومش عارف اعمل ايه
انا ركبتها محستش بحاجه شكلها تمام مشيت على سرعه وورا وقدام عادى ومش شايف فيها حاجه وحشه
صاحبها قالى انها راشه حزام علشان كانت اتخبطت من الباب الشمال خبطه بسيطه
ومن جوه مرشتش اى حاجه
فا انا مش عارف اقرر بصراحه وخايف من العربيه استعمال فتيسها الاتو ميكنش كويس ويعملى مشاكل
فمحتاج رأيكم خبراء الاوبترا - العربيه فى البيطاش وانا فى وسط البلد حد يعرف مكان كويس فى العجمى اكشف عليها فيه

ولا اكبر دماغى واجيب واحده زيروا وخلاص.

وسؤال اخبر ، الفتيس الاتوماتيك للأوبترا بكام جديد ؟

شكرا ليكم

[aymanmaly]

انا اري انك تجيب جديد طالما ان الامكانيات المالية تسمح
لان المستعمل هو قسط غير معلوم قيمة القسط الشهرى
اما عن الفتيس اتوماتيك جديد اظن انة فى حدود 34000 ج
و المستعمل فى حدود 4000 الى 6000 حسب الحالة
بس فية اعضاء عاملين كيلو متر عالى بما يهم انا و الحمد لله مافيش مشاكل من الفتيس الاتوماتيك للاوبترا

[maygodopt]

ايمن اشكرك على ردك
الحمد لله
انا النهارده رحت خلصت مع المصرية ودفعت مقدم
ها استلم بعد بكره
جبتها سوداء 2011 اوتو ، روعة بصراحه
ربنا يكفينى شرها ، ومتعملش معايا مشاكل
ولو حصل مشاكل مش ها اقلق لأنى ها اكون وسطيكم
اول ما استلمها ها اعمل تقرير بالصور ان شاء الله

لو فيه اى تعليق يعنى اول ما استلمها اتأكد من ايه واعمل ايه ؟
ها اكشف عليها ولا لأ ، ارجوكم الافاده فى النقطه دى
اغيرها اى حاجه ؟ اجبلها اى حاجه ؟ زيت
دى اول عربيه ليا يا جماعه

[M.Yahia]

الف مبروك يا باشا العربية حضرتك الاوبترا عربية محترمة و الزيرو يفرق تماما على الاقل حضرتك حتاخد خيرها كله مش بعد 5 سنين استخدام و ان شاء الله ربنا يديك خيرها و يكفيك شرها بالنسبة للاستلام
1- اعمل شيك كامل على العربية من بره و شوف اى خدش او حكه فى الصاج الخارجى و جرب كل حاجه فى الكماليات و كدا كدا اللى شغال فى المعرض حيجرب كل حاجة قدامك عشان تستلم
2- تاخد ورق العربية الافراج الجمركى و العقد و جواب المرور و الضمان و الكتالوج لو عندهم مش عندهم ممكن تستلمه من منصور المركز الرئيسى
3- اكد على شنطة العدة فيها الكوريك و مفتاح عجل و مفك و الاستبن برضه شيك عليه و متنساش المفتاح الاحتياطى للعربية و كمان كود المفتاح بتاع العربية عشان لاقدر الله لو المفتاح ضاع تعرف تطلع عليه
4- حضرتك مش حتغير اى حاجة فى العربية لا زيت و لا مياه و لا حاجة الحاجة الوحيدة ممكن تبقى تزود مياه المساحات لو نقصت انما غير كدا كله حيزبط فى التوكيل فى صيانة ال 5 الاف
5- حاول متغيرش اى حاجة فى العربية عشان الضمان انا كل اللى عملته هو فرش جلد للعربية
اخيرا ربنا معاك فى الاستلام و الترخيص و ان شاء الله العربية تبقى وش خير عليك و اى ملحوظة فى الكلام مش واضحة يا ريت تقولى و بالتوفيق

[aymanmaly]

ربنا يديك خيرها و يكفيك شرها
متهيئلى king2000 مشكور غطى جميع النقط
و ماتساش ولاعة السجائر لان فى الغالب بتتنسي
ربنا يوفق حضرتك
و على العموم كلنا معاك لو فية اي حاجة انا تحت امرك

[engaass]

راجع على ارقام الشاسية والماتور انهم زى اللى فى الورق

[maygodopt]

الف شكر ياجماعه بجد معلومات هتفيدنى جدا
وها اكون معاكم لو فيه حاجه

king2000

متأكد ان الفرش الجلد مش هيطلعنى من الضمان ؟
انا اسمع ان علشان تعمل فرش لازم الكراسى تتفكك ؟ صح الكلام ده ؟


وأخر نقطه هى اول صيانة بتكون
الالف ولا الـ 5 الاف ؟

شكرا الف شكر

[amribrahim]

الصيانة على ٥٠٠٠ يا باشا

[M.Yahia]

يا باشا فرش العربية مش بيطلع من الضمان انا فارش ارضية العربية كمان جلد غير فرش الكراسى و مفيش مشاكل و فعلا الكراسى و الكنبة كمان بتطلع من العربية بس كل ده مفيش منه مشاكل