شكرا منصور شيفرولية (اوع حد يضرب)

[ecybrarian]

انا عارف إن تجارب الاعضاء السيئة مع منصور أكثر من التجارب الإيجابية ولكن..أنا بقى تعاملاتي مع منصور كلها كويسة وخصوصا الموقف إللي هاحكيه دا...
انا لفيت مصر كلها ادور على لمبة شنطة لانوس مالقتيش http://www.nilemotors.net/Nile/192947-a.html المهم روحت بالصدفة عند قطع الغيار بتاع منصور إللي خلف سور نادي الزمالك قمت داخل اسأل..قابلت الاستاذ احمد سمير (راجل في منتهى الاحترام) قاعد يدور على الكمبيوتر فترة طويلة وبعدين قالي تنمها 16 جنيه ومش موجودة غير في الهرم (ابو رواش) وخد نمرة تليفوني وقالي هانجيبها ونكلمك..المهم يعدي كام يوم وفجئت بتلفون من الاستاذ احمد بيقولي اللمبة إللي حضرتك عاوزها جت وتعالى في أي وقت خدها..المهم رحت النهاردا خدتها..انا مش مصدق إن دا حصل!!!! دا لو كان قال لي روح ابورواش ماكنتش هازعل وهاروح اجيبها عادي يعني..المهم قمت مكلم الشركة على الرقم المختصر وقلت للبنت لو انا عندي شكوى هاتبعتوها للإدارة؟؟ قالت لي طبعا..قلتها انا بقى عندي شكر ومصر تبعتيها الإدارة..وشكرت الاستاذ احمد على اهتمامه على الرغم من رخص القطعة إللي انا عاوزها...وزي ما بنعرف نشتكي لازم نعرف نشكر

[ecybrarian]

شكرا منصور شيفرولية (اوع حد يضرب)

للعلم فقط

http://www.nilemotors.net/Nile/194303-a.html

[kar!m]

كويس و الله .. أى مكان زى ما فيه الوحش فيه الحلو.

[ahmed88hassan]

يارب دايما !!

[engaass]

خير وربنا يهدى

[cyborg_ift]

والله انت راجل محترم

[engaass]

اشكرك لانك بتفكر الناس المتشائمة على طول ان زى مافى الوحش فيه الحلو
(وان زى ما فى ضرب فى برضه شتيمة)هههههههههههههههههههه

[kamalsalem]

اللي مزعلني انا في الموضوع انه شركة كبيرة زي منصور أو غيرة من التوكيلات معندهاش معيار بما يسمى بالـ customer satisfaction فتلاقي تجارب الناس حلو او وحش معتمدة على زوق (أو قلة ذوق) المهندس اللي بيقابلك

انا شايف انه ده نتيجة كذا نقطة:
1- العقلية الاستهلاكية اللي سيطرت على شعب بحاله... وبالتالي سواء عاجبك أو مش عاجبك في غيرك الف لسة بيشتروا وبالتالي التوكيل مش حاسس بأي نوع من التهديد لو قلتله مثلاً انا مش مبسوط وهقول لصحابي ميشتروش منك
2- انعدام الرقابة على المنشاّت الخدمية لأن كل المراقبين بقى ليهم مرتبات ثابته من اصحاب الاماكن دي (سواء توكيلات السيارات، توكيلات الاجهزة، المرافق السياحية... الخ)
3- طول حبال القانون اللي بتخلي عقليتنا دايماً انه يا نطبق القانون بنفسنا، او نستسلم للظروف، أو ندور نبعد عن التوكيل
4- أصحاب التوكيلات الكبيرة عندهم سلطة اكبر من الوزراء وهنا الفساد يلعب دوره في انك لا بتاخد منهم حق ولا باطل

النتيجة: الواحد فينا بيتنشق على حد يعاملة باحترام... يعني من المحزن بجد انه يبقى جل املنا من توكيل زي منصور انه يوعدك انه هيجبلك قطعة غيار لعربيتك (اللي هي اصلاً التوكيل مش موفرها مع ان العربية لحد 2011 لسه بتتباع) ويوفي بوعده... وكأن الطبيعي انه تدور على قطع الغيار ومتلاقيهاش.. وكأن الوفاء بالعهد بقى من المستحيلات

يا جماعة لو سمحتوا الله يكرمكوا اسمعوا كلمة من اخوكوا الصغير وبعدين اوقفوني من المكان هنا كله (الكلام ده يمكن حد يكون شغال في توكيل يقراه)
1- مفيش حاجة اسمها على قد فلوسهم، اللي قبل وظيفة قبل مسئوليتها، كله يشتغل بضمير
2- في حاجة اسمها ربنا، وفي حاجة اسمها حساب، وكلنا هنتسأل على شغلنا ان سرقنا او ارتشينا او اهملنا فيه

وده مش معناه انه المهندس المختص المذكور هنا وحش.. بالعكس ده مثال يحتذى لكل واحد فينا

[zidaneelwaly]

في ناس محترمه جداااااااااااااا بس مش كلهم طبعا

و احييك علي رساله الشكر دي عشان دي تفرق مع الناس المحترمه

[aymanmaly]

الف مبروك يا دكتور
كدة الاسبارك نورت :-)
و اهنيك للمرة الثانية على صبرك فى تطبيق ما تفكر فية و كمان اية بعقلية هندسية تحترم
والله انا شايف ان الناس فى الفترة الاخيرة بتشكر بصفة عامة فى التوكيل
ودة شىء جيد و ايجابى
اتمنى ان يستمر و يكون بصفة عامة
يجعلة عامر

[aymanmaly]

بص صحيح الضفيرة بتاعة العربية كانت مجهزة ولا عملت تعديل

[ecybrarian]

بص صحيح الضفيرة بتاعة العربية كانت مجهزة ولا عملت تعديل

الضفيرة مش موجودة..وكفاية بقى ماتطلعش اسرار ياعمدة..لحد ما الموضوع يكمل ;-)..وانتظروا المفاجأة

[د.محمود صلاح]

موقف جميل يستحق الشكر

[aymanmaly]

ماشى ماشى :-)
مساء الفل فى الانتظار و متشوق اعرف
و يجعلة عامر

[zezmograby]

الناس كلها بيبقا ليها مداخل سواء حلو او وحش والشاطر اللي يعرف يلف الزبون