اكصدام اوبترا

[midohector]

اخواني السلام عليكم
انهارده الصبح دخلت ف حجر موجود في الشارع بالعربيه من قدام مكنتش شايفه و مان حجر خبيث مش باين
المهم نتج عنه كسر الاكصدام بالعرض من ناحية اليمين عند فانوس الشبورة الكسر قبلو بعد الشبورة بالعرض
الناس بيقولولي يتلحم و ناس بتقولي غيره المشكله ان العربيه لسه جديدة و مكنش نفسي اغير فيها حاجه ....

المهم الطلب اللي اطلبه منكم ان انا عايز سمكري كويس اوي و شاطر عشان لو هيتلحم او يتغير ميبقاش باين لاني بتعقد لو العربيه حصل فيها حاجه
و لو حد يقدر يقولي تكلفة اللحام و الرش كام و لو هيتغير يتغير بكام + الرش بتاعه و ياخد وقت قد ايه بالظبط
و الحمد لله انها علي قد كده و شكرا ليكم مقدما

[Karim_Monir]

قدر الله وما شاء فعل ما تحزنش على جماد ابدا
اي قطع في الاكصدام يتعمل لانه هايبقي الاصلي +تكلفة اقل
الاكصدام الاصلي سعرة مش هايقل ابدا عن الف وشوية
وتكلفة رش مثلا 300
و 50 سمكري فك وتركيب
يبقي هاتدخل على 1500 جنية
لو اكصدام تايواني مثلا يعمله 500 او 600 + المصاريف السابقة
لكن لو هايتعمل القطع هايكون التكلفة كالاتي
50 سمكري فك وتركيب
100 مثلا لاني مش عارف حجم القطع عند بتاع البلاستيك قابلة للزيادة والنقصان البسيط
300 رش الاكصدام كله لانه ماينفعش يترقع
هاتقي التكلفة اقل بكتير من ثمن الاكصدام التايواني بس بدون اي حاجة
غير ان الاصلي بيكون اصلي التايواني بيكون مش مطبع صح على العربية وفي فروقات بسيطة +خامة اضعف
وقت ما تحب تعمله كممكن اضغطلك عليهم في الورشة والحوار كله يخلص في يوم واحد عشان ما تتعطلش
وده تليفوني
01001263030
تحياتي
كريم

[windofchange]

انا الخبطة جاتللي فالرفرف من تحت عند العتبة وطبقتهوللي ... حسبي الله ونعم الوكيل فاصحاب المحلات والعمارات يعني مش عايز حد يركن حط يافطة او حاجة باينة خير ان شاء الله وكريم بيه جاب المفيد

[drmagieed]

أعتقد إن يتلحم عند صنايعية كويسين وهما إللي بيفكوه ويلحموه ويركبوه ... وفي واحد صاحبي عنده تويوتا ياريس والعربية الإكصدام الأمامي إتقطع وروحنا لصنايعي ممتاز في المنصورة لحموه كويس ومحتاجش دهان لأنه إتلحم بفن وما كانش باين

[midohector]

معلش انا اسف اني رديت متأخر بس اللي حصل يا جماعه اني مقدرتش اسيب العربيه كده بعد ما عملت الموضوع امبارح
بعد ما كتبت الموضوع خدت بعضي و استئذنت من الشغل و كلمت حد صحبي ف التوكيل بتاع منصور قالي بالراحه كده الاكصدام يتكلف 1500 جنيه بالرش عندنا و من الاخر ما تجيش عندنا ده كلامه
و اداني عنوان واحد بتاع لحام فايبر جلاس في المعادي و شكر فيه جدا
انا من كتر السربعه نسيت خالص موضوه الورشة الضاهر ف غمره و دي جمب الورشة بتاعتنا و سبحان الله افتكرت ف اخر لحظة قبل ما اخد طريق الماعدي من ع المحور و علي طول نزلت الضاهر روحتله و وريتله الاكصدام قالي متضايقش نفسك و بسيطة و كده و فهمته اني مش عايز ارش الاكصدام خالص لازم يكون بالبوية الفابريقة بتاعته و عليه قالي خلاص نلحم من جوه و نقوي اللحام و اتوكل علي الله فك و تركيب و لحام كان بيقول 100 لكن وصلت 80 بس و و الله ولا اكن باين حاجه عنده واحد صنايعي جنني من شطارته
المهم الحمد لله اتلمت و رجع الاكصدام و لا كانه كان مفكوك و عديت علي خير
كان نفسي يبقي فيه صور بس نفسيتي كانت متستحملش اصور و الحمد لله

الاستاذ القدير كريم منير انا مشفتش البوست بتاعتك غير دلوقتي من امبارح ، فانا اسف بس و الله مكنتش اقدر اشوف العربيه بالمنظر ده ، مع الشكر ليك علي تعبك معاياو الشكر للاعضاء الكرام اللي ردوا عليا

[kh_elshiemy]

ياربت تقولنا عنوان الورشة دي فين بالظبط

[midohector]

ياربت تقولنا عنوان الورشة دي فين بالظبط

بص يا سيدي
انت عارف شارع رمسيس و انت رايح غمره هتلاقي جامع كبير جمب ينزينة مصر للبترول ، خش الشارع اللي علي ناصيته الجامع و اول شارع يمين اسال هناك علي شارع القبيصي ، و لما توصل دور علي مركز طبي " ستنا مريم " و اسال هناك علي ورشة ايمن بتاع لحام الفيبر جلاس و الاكصدامات
و قوله انا جايلك من طرف ورشة اللحام اللي جابلك عربيه اوبترا حمرا و بالتوفيق ان شاءالله و طمني عملت ايه ...

[ecybrarian]

للأسف هاحبطك :-( الاكصدام الفابريقة لا يمكن يتعوض..مهما عملت الرش الجديد عمره ماهيكون زي الفابريقة ابدا..مع التريحات على الاكصدام وكدا هاتلاقي الرش مش تمام..عكس الفابريقة خاااالص...نفسي اعرف بيرشوا الاكصدامات ازاي في المصانع؟ يمكن بيغطسوها في احواض وبيستخدموا الوان ستاتيك!!! مش عارف

[HeMa_LanCeR]

للأسف هاحبطك :-( الاكصدام الفابريقة لا يمكن يتعوض..مهما عملت الرش الجديد عمره ماهيكون زي الفابريقة ابدا..مع التريحات على الاكصدام وكدا هاتلاقي الرش مش تمام..عكس الفابريقة خاااالص...نفسي اعرف بيرشوا الاكصدامات ازاي في المصانع؟ يمكن بيغطسوها في احواض وبيستخدموا الوان ستاتيك!!! مش عارف

لو رشيتة من غير معجون مش هيطلع منة حاجة
ومايكونش الأكصدام زفر اصلا ودي اهم حاجة