ممكن تساعدوا صديقي : حادثة للكروز و التكلفة في التوكيل خيالية

[sss]

السلام عليكم ورحمة الله وبركاته
تحياتي لكل اعضاء منتدى الشيفروليه
الموضوع ده بخصوص صديقي وهو معاه كروز 2011 و ربنا قدر انه يعمل حادثة على الطريق الزراعي في العيد و الحمد لله هو بخير لكن العربية هي المشكلة حاليا لانه برغم ان الاضرار فيها مش كبيرة لكن التكاليف الخاصة بالاصلاح في التوكيل طلعت خيالية و ده بالاساس لان الايرباجز الاثنين تكلفتهم لوحدهم حوالي 20000 ان لم تزيد
وبالتالي كان التفكير انه يستغنى حاليا عن الايرباج و يصلح العربية خارج التوكيل
و لاني مليش اي خبرة مع الكروز مقدرتش افيده لكن انا واثق انكم ان شاء الله هتساعدونا نوصل لافضل نتيجة بتكلفة معقولة
ارجو نصيحتنا بخصوص قطع الغيار و اماكن التصليح و التكلفة التقديرية
و دي صور العربية بعد الحادثة

[mohamedhagrass]

معنديش فكره عن الكروز خاصه
لاكن بشكل عام اي عربيه بتتصلح فالتوكيل بتبقى التكلفه وهميه وخياليه
مثلا احد الاقارب عمل حادثه جامده جدا بنيسان تيدا وراح التوكيل التكلفخ 65 الف جندي
صلحها بره التوكيل ب 20 الف جنيه في مركز صيانه واحد من الي شغلين في التوكيل فاتححه واكيد لو كان لف بنفسه كان ممكن ارخص ولاكن هو قال اشتري راحتي وكمان ده موظف من التوكيل واكيد فاهم العربيه كويس

وعلى فكره معظم الي بيشتغلوا في التوكيل عندهم ورش بره خاصه بيهم خليه يلمح ويسال من تحت لتحت والحمد لله على كل شيئ وانا شايف ان التلفيات مش كبييره لدرجه المبالغ ده
وبرضو اكيد لو لف على قطع الغيار بنفسه وشاف ميكانيكي تمام هتكون التكلفه اقل بكتير وبالتوفيق ويا ريت الاعضاء يفيدوك اكتر

[akmm]

الحمد لله على كل شىء وقدر ولطف .

[Kefo_Honda]

بسيطة خالص إن شاء الله , وعلى فكرة العربية مفيش فيها تلفيات كتير

[HeMa_LanCeR]

انا شايف انة يجيب الحاجات دي استيراد احسنلة بكتير

[SAMEH_FOUAD]

بسيطة انشاء الله هتنزل الحرفيين وهتلاقى التكلفة الفعلية مش هنتعدى ال 10000 الاف جنية بتركيب الايرباج

[bmya]

المشكله فعلا في الايرباجز هي دي المكلفه
انا صحبي لسه عامل نفس الحادثه دي بنيو اكسنت ونفس الشكل والخساير بالظبط وكان رابع يوم من العيد كان بيرجي ورا bmw وبتاع البي ام لقا مطب فرمل مره وحده صحبي ملحش يقف لبس فيه من وره
الخسائر عنده حاجات بسيطه تتظبط كلها يعني الاكصدام والشبكه وسربنتينه التكيف والردياتير بس هو مأمن راح التوكيل التكلفه تقريبا اقل من 10 الاف في التوكيل وكله هيتغير فأكيد التكلفه بره هتوصل للنص بالكتير
فصحبك ينفض للتوكيل اصلا ينزل يشوف خسايره واللي يتظبط يتظبط واللي مش نافع يشتريه جديد او استيراد
يعني باين من الصور عند الاكصدام يتظبط والكابوت كمان لخاسئر الداخليه مش واضحه يعني في دواخل مخبوطه الصدر مثلا او السربنتينه ؟؟
اعتقد ان الخبطه مش واصله للموتور او الفتيس ان شاء الله

[sss]

متشكر جدا لكل اللي ردوا و اعتقد ان الكل مجمع على البعد عن التوكيل
واعتقد ان الاصلاحات هتبقى متقسمة بين قطع الغيار من ناحية و المصنعيات و السمكرة والدهان من ناحية تانية فايريت اللي عنده معرفة باماكن بيع قطع الغيار سواء المستوردة او غيرها وكمان اللي يعرف ورش محترمة في الحرفيين اوجنبنا في طنطا ياريت يفيدنا
و دي قايمة بقطع الغيار اللي في مقايسة التوكيل لو حد يعرف اسعارها و اماكن بيعها :
طلمبة و خرطوم الباور"بعد الحادثة الدريكسيون تقل جدا و زيت الباور كان بيتسرب على الارض"
حساس رقم 1 "حساس الشكمان"
مروحة و قميص و رادياتير"كل اللي حصل هو ان الرادياتير انثنى في الجزء المواجه لسربنتينة التكييف"
سربنتينة و شجرة و خرطوم تكييف"نفس الشيء مجرد ان المواسيير انثنت حاجة بسيطة لان الخبطة مش مطبقة الصدر جامد"
مربع شاسيه
وطبعا الطارة و التابلوه مع الايرباجز"و دول اعتقد ممكن يستغنى عنهم الى حين"
بكرر شكري لكل اللي افادونا جزاكم الله خيرا و ارجو افادتنا بالتفاصيل اللي ذكرتها لو امكن

[Usama Nagi]

متشكر جدا لكل اللي ردوا و اعتقد ان الكل مجمع على البعد عن التوكيل
واعتقد ان الاصلاحات هتبقى متقسمة بين قطع الغيار من ناحية و المصنعيات و السمكرة والدهان من ناحية تانية فايريت اللي عنده معرفة باماكن بيع قطع الغيار سواء المستوردة او غيرها وكمان اللي يعرف ورش محترمة في الحرفيين اوجنبنا في طنطا ياريت يفيدنا
و دي قايمة بقطع الغيار اللي في مقايسة التوكيل لو حد يعرف اسعارها و اماكن بيعها :
طلمبة و خرطوم الباور"بعد الحادثة الدريكسيون تقل جدا و زيت الباور كان بيتسرب على الارض"
حساس رقم 1 "حساس الشكمان"
مروحة و قميص و رادياتير"كل اللي حصل هو ان الرادياتير انثنى في الجزء المواجه لسربنتينة التكييف"
سربنتينة و شجرة و خرطوم تكييف"نفس الشيء مجرد ان المواسيير انثنت حاجة بسيطة لان الخبطة مش مطبقة الصدر جامد"
مربع شاسيه
وطبعا الطارة و التابلوه مع الايرباجز"و دول اعتقد ممكن يستغنى عنهم الى حين"
بكرر شكري لكل اللي افادونا جزاكم الله خيرا و ارجو افادتنا بالتفاصيل اللي ذكرتها لو امكن

الطارة و الأكصدام و الحاجات الخارجية دول ممكن يجيبهم من الحرفيين او اي حد عنده عربيات شيفروليه مقطعة و يرشها او ممكن يكون حظه حلو و يكونوا بنفس لون العربية
التابلوه كله هيبقي صعب و غالي ممكن يخلي حد يسدله فتحه الأيرباج اللي في التابلوه و يريح دماغه "في الحرفيين"
مركز النايل موتورز للدهان محترم جدا و انا اتعاملت معاه في السمكرة اكتر من مرة و هو موجود في الأعلان فوق

الأحسن انه يجيب قطع الغيار من التوكيل للباور و الحاجات دي تكون مضمونه و ممكن يركبها بس في التوكيل او ميكانيكي فاهم شيفروليه

شغل التكييف يروح عند ورشة تكييفات يشوفله الخراطيم تتعدل ولا تتغير
الريدياتير الأحسن انه يغيره عشان مشاكل الحرارة مقرفة و ممكن تأثر علي الموتور

[sss]

جزاكم الله خيرا