تنك البنزين بينزل بنزين و هيموتنى انا و عيلتى

[ALAA_EL_NAGAR]

كارثة بجميع المقايس

عربية اوبترا 2012 عاملة 19000 كم
ورثتها عن والدى الله يرحمة
كان فيها صوت تخبيط مع المطبات

المهم ميكانيكى قالى ده من طرمبة البنزين .. فتح الكنبة و قال لبلية بتاعو فكلى يابنى الطرمبة دى

انا كنت هعيط من المنظر بتاع الطرمبة مقفولة زي الفل و شكلها زيرو و حواليها ناشف و كلو تمام
الولد فك الطرمبة و الميكانيكى دخل ايده جوا التانك و طلعها و قالى خلاص كده كله تمام
المهم مشيت و لسة الصوت موجود روحت التوكيل قالولي ده تربيط شاسية و ربطو الشاسية و العفشو و الصوت راح

كل م افول بنزين الريحة جوة العربية تبقي فظيعة . فتحت الكنبة لقين المضخة حوالين شفة التانك بنزين
غيرت الجوان و ركبنا المضخة و لسة التسريب موجود . حطيت لصق انبوبتين على المضخة كلها من فوق و غيرت الجوان تالت مرة و لسة بتسرب غيرت المضخة بواحدة استيراد و برضة لسة بتسرب . ركبت مضختى تانى و عليها اللصق و غيرت القفل الدائرى الصاج و التسريب لسة موجود مع التفويلة

اعمل ايه انا تعبت والله و التسريب بيبقي ترشيح حوالين حلق التنك . اعمل ايه و العربية لسة زيرو
انا تعبت ارجوكم قولولى اعمل ايه و هل افك التنك ولا لسة الصنايعية هيبوظو حاجة تانية فى فك التنك و تركيبة و لا اعمل ايه

سالت على التنك استيراد ب 650 جنيه . ماشى انا موافق اعنمل اى حاجة علشان البلاعة دى تتقفل لانى مش طايق العربية

برجاء الافادة من اخوانى الاعزاء و ربنا يباركلكم فى عربياتكم و ميحطكوش تحت ايد صنايعى معندوش ضمير ولا دم

[ALAA_EL_NAGAR]

يا جماعة مع التفويلة التنك لما بيسرب بينقط بسيط تحت العربية لو عديت على سجارة هنفجر يا جدعان

[S O P H O S]

يا باشا حاجة زي كده تعملها فمركز صيانة يا اما عند حد مضمون
ولو متعرفش حد كويس روح التوكيل حتي لو غالي
لان ده موضوع مش بسيط

[Silent~Dream]

حضرتك روح التوكيل او مركز صيانه محترم و قولهم على المشكله و بلاش فتى الصنايعيه فى عربيات زيرو يا جماعه دى فلوس ناس حرام كده

[د.عماد صلاح]

العربيه جديده و في الضمان روح التوكيل وخد حقك

[mody112]

انت فى الضمان روح للتوكيل ومتقولهمش انك فكيتها بره

[أحمد جودة]

السلام عليكم ......... والله حاسس بيك لاني فى يوم من الايام عانيت من المشكلة دي ووقفت ورايا شارع طوييييييييل علشان كان فيه واحد مولع فى الزبالة فى نص الشارع الله يحرقو وكان مطلوب مني اعدي جمب النار وكان عندي تسريب من زور التنك والمصيبة اني كنت لسة مفول العربية وحلفت مش هتحرك متر واحد الا بعد ماتطفي النار الللى فى الشارع ...... اسف طولت عليك بس اطمن ان شاء الله خير ....... بص ياكبير نصيحة قبل ماتعمل اي حاجة فى التانك ....... فية خرطوم اللى بيكون واصل من العلبة اللى بيتحط فيها مسدس التموين والتانك ......... احتمال كبير بعد كل اللى عملتو فى العربية الخرطوم دة مشقق وبيسرب بعد التفويل بس لحد ما العربية تستهلك بنزين والتنقيط يمنع

الخلاصة حضرتك غيرت المضخة والجوان ....... فاضل تبص على الخرطوم اللى بكلمك عنه لان جايز الحمار اللى فك المضخة يكون خبط الخرطوم دة ......... تحياتي ومتابع مع حضرتك لحين حل المشكلة ان شاء الله

[mohamedxsayed]

ربنا يسهلك الحال بس غلطتتك ان مشكله زى دى كان لازم تروح التوكيل والعربيه فى الضمان اساسا كنت مش هتدفع كتير بس من الاخر اجرى عالتوكيل

انت فى الضمان روح للتوكيل ومتقولهمش انك فكيتها بره

بيعرفوا على فكره وعن تجربه من واحد صاحبى .

[abou-yahia]

روح مركز سبيد سيرفيس للباشمهندس هاني

http://www.nilemotors.net/Nile/287642-speed-service-center-enghany.html

[فبريكا]

الغطلة غلطتك من الاول لما انت فى الضمان تروح برة ليه وتخلي حد يلعب في عربية نضيفة زي دية ... بلاش تروح الضمان لا يكتشفوا موضوع تنك البنزين دة وتطلع برة الضمان روح لمركز كويس وزي ما تفضل العضو الكريم وقالك شيك على الخرطوم وربنا يصلحلك الحال

[akmm]

الغطلة غلطتك من الاول لما انت فى الضمان تروح برة ليه وتخلي حد يلعب في عربية نضيفة زي دية ... بلاش تروح الضمان لا يكتشفوا موضوع تنك البنزين دة وتطلع برة الضمان روح لمركز كويس وزي ما تفضل العضو الكريم وقالك شيك على الخرطوم وربنا يصلحلك الحال

الكلام ده زى الفل ...........................

[saddam]

صديقي المواطن
حاول.تعمله بره عمر ما التوكيل صلح عطل من أول مرة لضعف خبرة اﻷسطوات الموجودين في التوكيلات إنت محتاج تروح لحد نظيف وتشترط الحساب يرجع لو المشكلة متحلتش وتروح تفول مع الميكانيكي وهو معاك ودمتم.للنضال

[abou-yahia]

هوه مش احنا لازم نلوم حد

كفايه المشكلة نفسها وكلنا بنتعلم من اخطائنا

والراجل كتر خيره انه بيدينا معلومة ممكن تفيد حد اخر

وياما مصايب بنسمعها التوكيل بيعملها عادي

[ALAA_EL_NAGAR]

رحت لميكانيكي تاني النهاردة و قالي هات طرمبة جديدة جبت واحدة ب 280 جنييه و بعدين فولت سربت ولا كاني عملت حاجة خالص
بيني و بينكم نفسيتي تعبت و الله
رجعت للميكانيكي فك الطرمبة الجديدة و لقينا خرم رخم في التنك مكان مفك عادة
سدينا الخرم بلصق انبوبتين و حطينا سيلكون و قفلنا الطرمبة الجديدة
روحت افول سربت بردة بنزين بس اقل شوية
و الجديد اني بلاقي اول م اجي ادوس بنزين جامد مرة وحدة كهرباءالعدبية بتوطي اوي

و بتسك و مش بتجمع

الطرمبة صيني و علشان كدة بتسك مع الكبس

العزبية خارج الضمان من الاول علشان مكنتش بتعمل صيانات والدي كان بيعملها في مركز بره

انا تعبااااااااان مش هقولكم اكتر من كده

انقذوني يا ناس

[abou-yahia]

رحت لميكانيكي تاني النهاردة و قالي هات طرمبة جديدة جبت واحدة ب 280 جنييه و بعدين فولت سربت ولا كاني عملت حاجة خالص
بيني و بينكم نفسيتي تعبت و الله
رجعت للميكانيكي فك الطرمبة الجديدة و لقينا خرم رخم في التنك مكان مفك عادة
سدينا الخرم بلصق انبوبتين و حطينا سيلكون و قفلنا الطرمبة الجديدة
روحت افول سربت بردة بنزين بس اقل شوية
و الجديد اني بلاقي اول م اجي ادوس بنزين جامد مرة وحدة كهرباءالعدبية بتوطي اوي

و بتسك و مش بتجمع

الطرمبة صيني و علشان كدة بتسك مع الكبس

العزبية خارج الضمان من الاول علشان مكنتش بتعمل صيانات والدي كان بيعملها في مركز بره

انا تعبااااااااان مش هقولكم اكتر من كده

انقذوني يا ناس

للاسف اللي حضرتك بتقوله محتاج حد مر بالخبره ديه قبل كده

المركز اللي نصحت حضرتك فيه بيديره مهندس شاطر ومشهود له بالامانه والكفائه

روحله وان شاء الله يكون علي اديه الحل