تقــريــــرى المصـــور عن صيانة الــ 5000 للكروز 2013

[hossam_elwani]

تقريرى عن صيانه 5000 كيلو لكروز 2013

العربيه قبل قرار حجز الصيانه بيومين وعند تشغيلها فجاه لقيتها بتدينى كود 89 ولمبة السيرفيس الى هيا عربيه وجواها مفتاح تنور مع الكود احيانا واحيانا ومروحة العربيه تشتغل على غير العاده لفترات اطول


فحجزت وقتى فى فرع العامريه اسكندريه الى انا شارى منه مباشراً الساعه 9 الصبح اول واحد فى كشف الصيانه والعربيه كانت عامله 4900 كيلو وانا مستلمها من شهر 2013/2

سالت الاول عرفت انهم بيحطو زين موبيل وان فى العربيه وبناء عليها جبت زيت شل الترا من بنزينة شل تاريخ انتاج 2013/8 4 لتر ب 300 جنيه وكيلو كمان لوحده ب 84 جنيه لانى من خلال استفسارى والكتالوج عرفت ان العربيه بتاخد 4.5 بدون فلتر جديد و 5 لتر بفلتر جديد

دخلت فى صف الانتظار وحضر مهندس اخد كل البيانات والملاحظات والشكاوى

وهي :

* طول مشوار بدال الفرامل عن اول العربيه ما جبتها تحس انك بتدوس على اسفنجه لحد ما العربيه تمسك كويس

* ومشكلة الكود الى ظهر

* وقلت للمهندس مش عايز غسيل للعربيه ومش عايز غسيل لحوض الموتور ولاحتى تزويد مياه المساحات كله ده انا بعمله بنفسى ومش محتاج تضخم فى فاتورة الحساب من كلام فارغ

فقط لاغير

طبعا حضر عامل معاه طقم كفرات للدركسيون وكرسى السواق ودواسه ورق عشان حماية العربيه من الشحم والزيوت من عمال الصيانه اثناء الصيانه وده شكله




دخلت العربيه الساعه 10و نص طلعت 11 وده لجزئيه الصيانه فقط تربيط عفشه وتغير زيت وتغيير فلتر الزيت وفلترها حشو وسعره 85 جنيه

وفضل جزئية الكود دخلت العربيه تانى ووصلوها على الكمبيوتر واكتشف المهندس ان العيب فى تورمستات الكوعه الى بيفتح ويقفل دورة الميه جوه الموتور حسب درجة الحراره والكلام ده اخد حوالى من الساعه 11 للساعه 2 عشان يتأكدو من العيب تماما ويتم التغيير على اساسه وعمل امر شغل فى الضمان دخلت انا لحد العربيه فى الورشه وكلمت المهندس واستفسرت منه ونافشته وكانو جابو القطعه البديله للتغير وشفتها قبل التركيب وهيا مش الحساس بس لالا الكوعه كلها بما فيها الحساس وكانت الاصليه طبعا ومحفور عليها بالبارز GM وقالى احنا حنغيرها بالكامل عشان نجيب من الاخر ونعالج العيب من اساسه وجابو كمان جركن مياه حمرا اسيدلكو 4 لتر تركيز 50 فى الميه عشان تعويض الميه الى حتنزل ... طبعا انا استغربت من الاهتمام من منصور عكس ما كان يقال وللامانه المعامله كانت ذوق جدااا رغم الضغط الشديد الى كان عليهم لحد الساعه 4.30 بعد العصر

العربيه احدت من الساعه 2 للساعه 4.30 داخله على خامسه تغيير وده بسبب انهم استنو
لحد ما العربيه بردت تماما وكنت اخر واحد بيدفع فى الخزينه وياخد الايصالات ويختم الضمان بالصيانه والتكلفه كانت بالضريبه 95 جنيه


النتيجه :

* صوت الموتور ارتااااح على الاخر بجد من توهم او ايحاء نفسى وخصوصا فى النقلات الاولى او حتى فى الكيك داون

* الكود اختفى وكله رجع لوضعه الطبيعى

* الفرامل لا جديد وقالى هيا كده واحساسك الاولى عشان التيل كان لسه جديد ومطبعش

( الاول كانت من لمسه)

* استهلاك البنزين اتحسن نسبيا بشكل طفيف

* مية العربيه نقصت شويه وهو قالى انا حتنقص عشان الهوا حيطلع من الدايره وزودها بعد كده والعربيه لسه دايره الصبح فاشتريت لتر موبيل ميه حمرا من بره ب 25 جنيه بس التركيز بتاع الميه كان 30 فى الميه والعربيه اخدت اللتر الا شويه شايلهم عندى

* كل شىء تم بحرفيه فى التعامل فى الفك والتركيب ومفيش اى فرق نهائى او ملحوظه ناتجه عن الفك والتركيب فى حوض الموتور وعلى فكره انا دقيق الملاحظه وبقف على الواحده

الملاحظه ان المعامله جيده جدا غير الانطباع المأخوذ عن منصور وده اكيد بيرجع من فرع لفرع تانى

والملاحظة التانيه ان سعر الكوعه كامل لما سألت عليها 1500 جنيه وجركن مياه حمرا اسيدلكو 4 لتر تركيز 50 بسعر 150 جنيه لوحده تخيلو

ودى شوية صور متفرقه





صور للاستراحه اثناء وقت الصيانه







وده مكان اتتظار السيارات بالدور



ودى شاشة عرض مقسمه اربع اجزاء لمكان ورشة الصيانه وتقدر تتابع عربيتك هيا راحت فين



اليوم راح كله وبتعب وانتظار ومتابعه وقلق من الساعه 7 الصبح لحد 5 قرب المغرب بس النتيجه ممتازه والحمد لله

تحياتى للجميع

[BUNSH]

الف مبــــرووك على صيــانة وربنا يباركلك فيها --
أنا سرحت منك فى جزئية الفاتورة مرة 85 ومرة 95 ومرة 150 ؟! التوتال بتاعة الصيانة والمصنعية كام والقطع المتغيرة بكام ؟!
وبالنسبة لصيانات عندكوا كل 10.000 ولا كل 5000 ؟! وبالنسبة للمعاملــة اديهم بيتعلمواا مع هما بياخدووا دم قلبنا *أن كان هبور ولا منسور*

[abou-yahia]

تقرير احترافي كعادتك

فين بقه تقرير استطلاع الراي اللي انت عملته للعملاء الاخرين اللي كانوا معاك
:)

[hossam_elwani]

الف مبــــرووك على صيــانة وربنا يباركلك فيها --
أنا سرحت منك فى جزئية الفاتورة مرة 85 ومرة 95 ومرة 150 ؟! التوتال بتاعة الصيانة والمصنعية كام والقطع المتغيرة بكام ؟!
وبالنسبة لصيانات عندكوا كل 10.000 ولا كل 5000 ؟! وبالنسبة للمعاملــة اديهم بيتعلمواا مع هما بياخدووا دم قلبنا *أن كان هبور ولا منسور*

انا حاسبت على الفاتوره باجمالى 95 جنيه هيا عباره عن فلتر الزيت 85 جنيه و 10 جنيه الضريبه وخلافه والمصنعيه مجانا فى اول صيانه فقط لا غير دول الى طلعو من جيبى فى التوكيل

(الزيت انا شاريه من بره من بنزين شل لوحده وانصح باى حد جيب زيته معاه طبعا طيقا لمواصفات عربيته لانهم حيضيفو ضريبه مبيعات على تمنه لو اخدته من التوكيل يعنى فى حدود 40 جنيه فى الارض)

الــ 150 جنيه دول تمن جركن ميه حمرا اسيدلكو وهما شايلين تمنه فى الضمان

1500 تمن الكوعه وهما برضه شايلين تمنها فى الضمان

ومعاك فى اى توضيح

[hossam_elwani]

تقرير احترافي كعادتك

فين بقه تقرير استطلاع الراي اللي انت عملته للعملاء الاخرين اللي كانوا معاك
:)

والله انا ماتكلمتش مع ملاك كتير بس من الواضح ان كان فيه اقبال شديد على الصيانه فى التوكيل من جميع الموديلات والاراء متابينه مابين مستحسن للاداء والنتائج ومابين الى بيزعق على اقل حاجه وممكن يكون معاه حق ومابين الى بيكدب على التوكيل وهو عامل شغل بره الضمان وعاكك فى العربيه وعايز يلبسها فى الضمان وشوفت دول كلهم نماذج حيه على مدار اليوم

[abou-yahia]

والله انا ماتكلمتش مع ملاك كتير بس من الواضح ان كان فيه اقبال شديد على الصيانه فى التوكيل من جميع الموديلات والاراء متابينه مابين مستحسن للاداء والنتائج ومابين الى بيزعق على اقل حاجه وممكن يكون معاه حق ومابين الى بيكدب على التوكيل وهو عامل شغل بره الضمان وعاكك فى العربيه وعايز يلبسها فى الضمان وشوفت دول كلهم نماذج حيه على مدار اليوم

وساكت ياراجل

دلوقتي الموضوع الاكثر سخونه في القسم

فتيس الكروز

مصادفتش حد بيشتكي منه
مسالتش علي نوع الزيت ومقداره

[BUNSH]

انا حاسبت على الفاتوره باجمالى 95 جنيه هيا عباره عن فلتر الزيت 85 جنيه و 10 جنيه الضريبه وخلافه والمصنعيه مجانا فى اول صيانه فقط لا غير دول الى طلعو من جيبى فى التوكيل

(الزيت انا شاريه من بره من بنزين شل لوحده وانصح باى حد جيب زيته معاه طبعا طيقا لمواصفات عربيته لانهم حيضيفو ضريبه مبيعات على تمنه لو اخدته من التوكيل يعنى فى حدود 40 جنيه فى الارض)

الــ 150 جنيه دول تمن جركن ميه حمرا اسيدلكو وهما شايلين تمنه فى الضمان

1500 تمن الكوعه وهما برضه شايلين تمنها فى الضمان

ومعاك فى اى توضيح

لأ كدة الله ينــــــــور ,, بس نسيت جزئية الصيانة كل (5000 ولا 10000) ؟!

[hossam_elwani]

لأ كدة الله ينــــــــور ,, بس نسيت جزئية الصيانة كل (5000 ولا 10000) ؟!

كل 10 الالاف او اربع شهور انا عن نفسى حلتزم بالكيلو متر

الصدمه بالنسبالى ان موديلات 2013 ضمنها 3 سنوات 2014 ضمنها 5 سنوات

[hossam_elwani]

وساكت ياراجل

دلوقتي الموضوع الاكثر سخونه في القسم

فتيس الكروز

مصادفتش حد بيشتكي منه
مسالتش علي نوع الزيت ومقداره

سألت عن ميعاد تغيير زيت الفتيس المهندس قالى فى الكروز من الافضل تغييره على 30 الف كيلو لتفادى اى اعطال لكن ما مسألتش عن نوع زيت الفتيس او مقداره كنت مركز فى المشكله الى عندى

لكن المره الجايه حسأل وبلغكم

بس طبقا لمعلوماتى هو النوع ده

[abou-yahia]

سألت عن ميعاد تغيير زيت الفتيس المهندس قالى فى الكروز من الافضل تغييره على 30 الف كيلو لتفادى اى اعطال لكن ما مسألتش عن نوع زيت الفتيس

بس طبقا لمعلوماتى هو النوع ده

طيب ذي الفل

انا بنصح بالتغيير كل 30 الف بالنسبة للاوبترا وللكروز

وللعربيات الاتوماتيك عموما في مصر

نظرا لظروف القياده السبئه طرق و سائقين

[BUNSH]

كل 10 الالاف او اربع شهور انا عن نفسى حلتزم بالكيلو متر

الصدمه بالنسبالى ان موديلات 2013 ضمنها 3 سنوات 2014 ضمنها 5 سنوات

ولا صدمـــة ولا حاجة _ نفس الكلام عندى اشتريتهـــا وبعديها بخمس شهــور قام رزعها 5 سنين !
المهم أنك بتحافظ على صياناتها أول بأول .
وربنا يباركلنا فيهـــم .

[Silent~Dream]

تقرير احترافى ومجهود كبير و عقبال صيانه المليون ميل

[Hosam_Optrawy]

الف مبروك الصيانه ربنا يباركلك فيها

[mido]

انا عندى مشكلة الفرامل دى من بعد ما غيرت التيل
و سحبت هوا من الفرامل و نفس المشكلة برضه الصيانة اللى جاية هروح اقفش عليهم

[S O P H O S]

الف مبروك يا باشا
كالعادة تقرير راقي ومرتب