احساس عالي بالاشتغاله

[midohector]

السلام عليكم يا اصدقائي منتدي الشيفر بقالي كتير مشاركتش في مواضيع او حتي تصفحت المنتدي
المهم وحشتوني و جيتلكم احكيلكم اللي حصل معايا و اتمني تريحوني

اللي حصل ان عربيتي الاوبترا كانت محتاجه كاوتش جديد فاشتريت بعد دوخه طقم هانكوك كوري و طلع محترم لحد دلوقتي يعني فردة كاوتش متوسطة لاهي في العالي و لا هي زي الكمهو اللي كان فيها و اللي كان زفت بصراحه

المهم بعد ما اشتريت الكاوتش البياع قالي انه رصص الفرد و طبعا محتاجه العربية ظبط زوايا
المهم روحت مكان انا كنت بحترمه اعمل فيه الزوايا و من هنا تبتدي القصه
الراجل ركب اربع بتوعات كده ؟؟؟؟؟ مش عارف ايه دول علي الكاوتش و المفروض انهم متوصلين بالكمبيوتر و بعدين ندهلي انزله تحت العربيه و طبعا نزلت قالي انت عندك الفردتين اللي قدام ماخرين لورا و كمان داخلين لجوه و ده محتاج زراجين و دي ب 200 ج فانا طبعا عشان مش فاهم بصتله و قولتله المره الجاية و ابتدي الشك فيه من هنا انه لاحظ اني مش فاهم فلعب تحت العربيه 5 دقايق كده و بعدين قالي خلاص

الفكرة انه اخد 70 جنيه زوايا قداو و ورا و تربيط عفشه و انا حاسس انه معملش حاجه اصلا و بعدين فيه حاجه ايه موضوع الزراجين ده ؟؟؟؟

السؤال هنا بئه ايه قصة الاربع بتوع اللي ركبهم و فين الزوايا اللي اتظبطت و ايه قصة الزراجين

و طبعا انا متشكر مقدما للرد

[rotanamasoud]

هو مكان اللى شوفت الزوايه فيه ثقه ولا مش مضمون وانصحك تشوف مكان تانى تظبط فيه الزوايا وشوف حيقولك ايه

[aliabdo]

بص الاجهزه الى ركبها على العجل دى لظبط الزوايه و دى متوصله بجهاز شغال بيه و اطخن ظبط زوايه 40 جنيه و بعدين تغير الكوتش ملوش علاقه بالزوايه
و نصيحه لما تركب كوتش جديد مترصرصش على طول امشى بيه شويه و بعديها رصرص

[midohector]

بص الاجهزه الى ركبها على العجل دى لظبط الزوايه و دى متوصله بجهاز شغال بيه و اطخن ظبط زوايه 40 جنيه و بعدين تغير الكوتش ملوش علاقه بالزوايه
و نصيحه لما تركب كوتش جديد مترصرصش على طول امشى بيه شويه و بعديها رصرص

يعني هو الجهاز ده بيظبط الزوايا من نفسه و لا هو بيضيف حاجه من عنده لاني م فاهم فعلا
انا اللي اعرفه انه بيشد خيط و حوار كده لكن الجهاز ده غريب

[mahmoud85]

يعني هو الجهاز ده بيظبط الزوايا من نفسه و لا هو بيضيف حاجه من عنده لاني م فاهم فعلا
انا اللي اعرفه انه بيشد خيط و حوار كده لكن الجهاز ده غريب

لا هي الاجهزه دي بتقوله اذا كان في فرق في الزوايا وهو فيه مسمار كده تحت علي كل عجله بيربطه او يفكه سنه عشان يظبط الزاويه لحد ما الجهاز يجيب اصفار او اقل قيمه ممكنه ولو انت مركز عالشاشه هتلاقي في ارقام بتتغير وخد بالك احيانا بتكون مقفوله والاجهزه بتتركب اشتغاله وهو بيقيس بمتر ههههههههههههههه اه والله
تاني حاجه الزرجينه دي حاجه بيفتح بيها العجل او يرده لبره (الشاسيه ) يعني ودي ماتعملهاش الا اذا كنت واخد مطب جامد او طلعت عالرصيف مثلا
وماتعملهاش غير عند حد ثقه وهي ما تتكلفش اكتر من 50 جنيه

والله اعلي واعلم

[ahmed_moeaz]

70 جنيه ضبط زوايا !!! حرام شوف بنزينة موبيل محترمة وضبط زوايا عندهم اجهزة ضبط زوايا ليزر محترمة

[Gelgel2004]

احسن مكان تروح عند fit & fix - 19187و ان شاء الله تطمن

[midohector]

احسن مكان تروح عند fit & fix - 19187و ان شاء الله تطمن

مشكلتي دايما معاهم ان الناس اللي بتبقي شغاله معاهم بحس ان هما مستهترين يعني مش بيفرق معاهم انت عايز ايه هو بيشتغل اي حاجه و خلاص حتي لو مشكلتك مختلفة بس اكيد كده اروحلهم و اشوف - ده الفرع اللي علي صلاح سالم صح ؟

[midohector]

و بعدين انا مش عارف اقول ايه لاعضاء المنتدي انتوا ناس رجاله بجد و الله بتساعدوا الواحد هوا بدون اي مقدمات

[gadoo30]

انا طول عمرى بظبط زوايا عند حمدى في عابدين قدام قصر عابدين هو واحد اللى في المحل بيظبط كمبيوتر وبعدين يطلع يجرب العربية راجل بصراحة ممتاز وامين واخر مرة ظابط زوايا الافيو قدام بس كانت في حدود 30 او 35 جنية مش فاكر بالظبط والشاهين زماااان كانت 20 جنة وبعدين 25

[Ahmed Saad]

الزرجينه دي عباره عن حاجه كده شبه كوريك العربيه بس بخرطوم ودي لو الشاسيه فاتح بتقفله بس دي ماتتعملش الا لو خدت مطب جامد والعربيه لتهبدت او حفره جامده او بلاعه او رصيف بس برضه ممكن تروح بنزينه كالتكس اللي جنب السراج مول فيها واحد بتاع زوايا ممتاز