قفلة كهرباء في ذراع النور تتسبب بحريقة لولا لطف الله في السيارة هل هذا طبيعي ؟؟

[محمد الزيني]

السلام عليكم

انا عندي سيارة شيفورليه اوبترا 2007 اوتوماتيك , السيارة فجاة وانا ماشي لقيت النور العالي علق حاولت ارجعه واخبطه لعله يزبط .. لقيته علق خالص .. وبعديها شميت ريحة شياط جامده وقفت العربية لقيته لسه منور والريحة زادت جدا وطلع معاها دخان من عند ذراع النور .. طفيت العربية وشلت المفتاح وفجأة لقيت النار مسكت في الذراع بتاع النور وولع وكان هيولع في العربيه كلها لولا لطف الله اني قدرت الحقها بسرعة قبل ما تنتشر .. فعايز افهم .. هل ده طبيعي؟! في عربية يحصل فيها قفلة تولع نار بالمنظر ده؟؟ انا حاولت طبعا افصل البطارية معرفتش عشان كانت محتاجة مفتاح وانا مكانش معايا .. ياريت المتخصصين يفيدونا ...

ودي صورة الدركسيون..

[megaman]

لا حول ولا قوة الا بالله قدر الله وما شاء فعل الحمد لله انك لم تصب باذى ولم تحترق السياره كلها ولحقت الموضوع الحمد لله على سلامتك كمان مره هي طبعا مفزعه وتزعل بس معلش قضاء اخف من قضاء حاول تعرف السبب وتراجع التوكيل طبعا السياره مش فى الضمان يمطن الاخوه ينفعوك براى تحياتى والف سلامه

[ahmedelrayan]

قدر الله وما شاء فعل وحمد لله على سلامتك هو حضرتك كنت مركب زينون وبعدين اللى انا مستغربه ان اى حاجة فى العربية يحصل فيها قفلة المفروض الفيوز يضرب على طول بس الحمد لله والله المستعان

[mahmoud_ali]

قدر الله وما شاء فعل الحمدلله . المهم انت مركب زينون او لمض اعلى من الاستاندر من غير متركب كات اوت؟؟؟؟

[nasr-eldeen]

قدر الله وما شاء فعل وألف سلامة عليك وربنا يخلف عليك
ممكن يكون حصل تأكل في السلوك ولمست في بعض مع وجود بعض الزيوت او الشحوم على اجزاء التوجيه الميكانيكية أدت للاشتعال ومنها للأجزاء البلاستيكية
دا مجرد تحليل شخصي
المهم ان حضرتك بخير

[Adnfalcon]

يا ساتر يا رب
الحمدلله انك سليم وكله يتصلح بسيطه بإذن الله

[aymanshebl]

الف سلامة ممكن يكون ماس كهربى او قفلة فى دراع النور

[ضى القمر]

الحمد الله قدر الله ماشاء فعل ده مش طبيعى شكلك محسود

[ashouhdy]

ممكن ذى ما الاخوة قالوا ... و ممكن اسبراى ملمع التابلوة للاسف بيعمل كدة

[eng.salama93]

أكيد حضرتك مركب لمض أعلي من غير كتاوت و هي اللي سيحت الدراع .. صح ؟

[gadoo30]

الحمد لله انها جت سليمة
عندنا اوبترا مانيوال في الشغل عملت نفس المشكلة بس السواق لحقها وفك البطارية قبل الدخان ما يتحول لنار وتم تغيير دراع النور
ربنا يسترها علينا جميعا

[mohabelnegm]

أتذكر من سنتين جار ليا معاه لانوس 2008 و نفس السيناريو حصل معاه و كان راشش سبراى قبلها بيومين و ملمع الدراع و التابلوه و الكهربائى شخص الموضوع بأن الملمع بالمواد اللى فيه أتسرب و عمل اللخبطه ديه.

[egyptiandiver]

happened to me - I changed the light arm

[egyptiandiver]

car lanos 2008, but thank Allah no fire only smoke

[aw2100]

بس ده عيب خطير فى العربية المفروض ان الضفيره على فيوزات وكتاوت نور اى قفله تضرب فيوز وده عيب فى التصنيع للعربية واضح انهم مش حاسبين امبير الفيوزات دى كويس وحتى لو مركب لمبات اعلى الحمل كله على كتاوت النور مش الدراع انصحك ماتسبش حقك فى الموضوع الخطير ده وارفع قضية على التوكيل واطلب تعويض عالى وده علشان الملايين اللى اشتروا نفس الموديل التوكيل يراجع العيب ده وبراحتك !!!