معاناتي وحتي مشاكل الأفيو وانا عامل 2000 كيلو بس , ارجو الإفادة

[bahaa_monier]

السلام عليكم ورحمة الله وبركاته
اشتريت الأفيو 2009 الكوري الفول اوبشنز قسط
واستلمتها قبل العيد بيوم , بعد ما طلعوا عيني في الاستلام
الأخ احمد ربيع في منصور شيفورليه بتاع المهندسين ماكنش عايز يسلمني علشان تقريبا عايز يديها لحد , وحجته ان فيه شكل جديد نازل بعد 15 يوم , ولما أصريت قالي تعالي بكرة اللي هو يوم الوقفة بعد الفطار , ولما رحت قالي لسه ماطلعتش
ومن الساعه 8 لحد الساعه 12 بيقولي في الطريق ومستنيه , واتضح انها مركونة برة وماخدش باله , انا مش عارف ليه كدة ؟ علشان قلتله لأ انا عايز حقي وعربيتي ؟
مش فاهم
عموما
استلمتها , الحمد لله , فيه مشكلة صغننة في الأول
الهاند بريك لحد دلوقت لما برفعه بسمع طرقعه كأنه بيخبط في علبة بلاستك
وبعد الألفين كيلو هقولكم اللي حاسس بيه
العربية حلوة اوي بس فيها شوية مشاكل صغيرة
اولا لما بشغل التكييف السحب ضعيف جداااااااااااااااااااااااااااااااااااااااااااااااا ااااااااا
العربية خفيفة اوي بعد ال 100 كيلو
صوت الدركسيون وانا بلف بسمع تزييق
حاسس ان العجل اللي ورا مقوس , يعني من فوق داخل جوة ومن تحت طالع برة وماعرفش ايه السبب لحد دلوقت وهتجنن بس اتصلت قالولي تعالي في صيانة ال5000
دلوقتي وانا علي الأول والعربية بطيئة بسمع رجرجة ماعرفش هي فين مكانها
بعد ال 120 كيلو بسمع صوت غريب أوي في العربي بيبقي مستمر, واتجرب كذا مرة
وكأن العجل محطوط في ماسورة أرفع من الفتحة اللي في نص العجلة , ده احساسي بالظبط
الأر بي أم بيعلي فاجأة لوحده لدرجة انه وصل مرة 3000 لفة وانا مش جوة العربية
حسيت انها هتنفجر بجد , وكنت بالصدفة في البنزينة والراجل قالي اول مرة يشوف كدة , ولما دست اتنين بنزين زي ما نصحوني ماحصلش حاجة لكن لما دوست دبرياش مرتين فصل ورجع تاني, مع العلم اني بطلت العربية ودورتها ولقيت بعد ما دورتها الأر بي ام عالي تاني , هتجنن

ياريت تحلولي المشكلة هتجنن
يا اما تفيدوني, او اروح التوكيل ولا ايه واعمل صيانة دلوقت ,
علما اني اتصلت بيهم وقلتلهم علي المشاكل وقالي الصيانة مشغولة هحددلك معاد واتصل بيك كمان عشر دقائق وطبعا لحد دلوقت ماحدش عبرني ’
الحمد لله علي كل شيء , مستني ردكم

[mada121977]

الاخ الفاضل مشكله الار بى ام العالى حلها فى تغيير بوابه الانجكشن لان نفس العيب ده فى عربيه حمايا وظهر والعربيه عامله 500 كم فقط وهيا كمان موديل 2009 و حضرتك لما بتدوس دبرياج الصوت بيفصل ده العادى لانك بتكون محمل على الاسطوانه وده ممكن يخلى اسطوانه الدبرياج تبوظ بسرعه .... مبدأيا اتصل بالتوكيل الزباله بتاع العربيه دى واحجز ميعاد وان شاء الله لما تروح هناك اطلب تغيير (بوابه الانجكشن ) وماتتنازلش عن حقك وخلى صوتك عالى واوعى يقولولك احنا هانزل سوفت وير جديد زى ما قالوا لينا

[bahaa_monier]

ربنا يكرمك ومتشكر علي الافادة

[madoo]

هو ده الكورى

[ahmad alshaaer]

انا كان معايا 2008 تقفيل مصري ماحصلش الكلام ده
ولكن غيرت طنابير وانا عامل 5000 كلم والزجاج كان بيدخل هوا
وربنا يكرمك
وعلى فكره كتيره عيوب الافيو 2009 على حد سمعي

[bahaa_monier]

امال لو كانت مصري كان حصل ايه ؟

[bahaa_monier]

يعني المشاكل دي حلها ايه ؟

[amr fahmy]

مش عارف فى ايه

ياجماعة انا معايا افيو اوتوماتيك موديل 2008 , السيارة جميلة جدا و لايوجد بيها مشاكل غير مشكلة ان السيارة عندما تكون باردة وتقف تسمع صوت تحت عند الفرامل ( الطنابير) غير كده مفيهاش حاجة و معرفش الناس عمالة تتكلم كثير ليه؟؟؟؟؟؟؟؟؟؟؟؟؟

[shady_elkady]

كل المشاكل دة معرفة
اولا- علبة الدركسيون دة عيب صناعة فى العلبة روح توكيل الصحراوى و و قلهم بس مشكلة علبة الدركسيون و هما عرفين كل حاجة هتغير العلبة على الضمان (زى حلاتى بالضبط) و على فكرة بعد لما غيرت العلبة ظهر عندى صوت غيرب طلع انهم معدين مواسير البور من تحت الشكمان و طبعا العربية مجرد ما بتشتغل كلها بططق ورحت و عدلتها و بعدها عندى صوت غيرب مع المطبات العميقة زى تزيقة غريبة لسا موصلتش لعلجها لانى لازم اروح التوكيل و انا عارف اة المشكلة لانك لو قلت عندى صوت هيعملوك معاملة المريض بالفصام البرنويا و دة اصعب مراحل الفصام لانك بتتوهم ان الناس كلها بتكرهك و بتسمع اصوات و تشوف خييالات لازم تروح تقلوهم دة بيظة غيرهاااا

ثانيا-مشكلة الار بى ام حصل معايا فى اول 3000 كم و حانت بتتعللج بحلول غير منطقية يعنى و انا ماشى يعلى اقف يفضل عالى بعد البحث و الاكتشفات ادوس دبرياج مرتان و فرامل و ازود بنزين يرجع زى الفل و بعد 4000 مبقتش تحصل و لحد النهاردة مبقتش تحصل (21000)
ثالثا- الهاند امرها بسيط هيعملوها فى اول صيانة
العجل معوج لسا موصلتلهاش

[shady_elkady]

ياجماعة انا معايا افيو اوتوماتيك موديل 2008 , السيارة جميلة جدا و لايوجد بيها مشاكل غير مشكلة ان السيارة عندما تكون باردة وتقف تسمع صوت تحت عند الفرامل ( الطنابير) غير كده مفيهاش حاجة و معرفش الناس عمالة تتكلم كثير ليه؟؟؟؟؟؟؟؟؟؟؟؟؟

ممكن يكون عند حضرتك كل المشاكل و لكن حضرتك مش ملاحظها لان كل الحاجات دة مش اى حد بيلاحظها ممكن الار بى ام يعلى و انت سايق و متختش بالك و ممكن العلبة تكون بتزيق و انت مش و اخد بالك لانها مبتسمعش الى فى الصمت الرهيب عموما لو انت مستريح انسى

[amr fahmy]

الافيو سيارة معقولة

فى رايى ان السيارة معقولة و مشاكلها ليست كتير , اما بالنسبة لار بى ام , اقصى سرعة جبتها بالسيارة كانت 140 على طريق السخنة و كان الار بى ام على 3500 لفة و لايوجد صوت لعلبة الدركسيون............

[bahaa_monier]

طب ايه الحل ؟
انا رايح التوكيل بكرة الصبح