إعمل ريسيت reset لكومبيوتر الأوبترا وبوابة الأيدل بنفسك بدون وضعها على الكومبيوتر

[BraveHeart_13]

أعضاء المنتدى الكرام ...

قرأت موضوع مهم جداً عن كيفية عمل ريسيت Reset لكومبيوتر الأوبترا الأوتوماتيك أو بوابة الأيدل Idle Earn بنفسك وبدون الحاجة لدفع أى أموال لأى توكيل أو مركز لعمل ذلك بالكومبيوتر .. وقد قمت بتجربة هذا الأمر أولا على سيارتى لأعرف مدى جديته لأن العربية عندى كانت مهيسة وبوابة الأيدل الكهربا شكلها كانت بتعلق أو فيها مشكلة والـ RPM عندى كان بيلعب صعودا وهبوطا مع ترتيلة فى الموتور !!
و بعد ما طبقت التجربة اللى قريتها وعملت الخطوات بالظبط زى ما هقولهالكم ، لقيت كل المشاكل دى إنتهت .. فقررت أقولكم عليها عشان الإستفادة العامة

خطوات عمل ريسيت Reset لكومبيوتر الأوبترا الأوتوماتيك أو بوابة الأيدل Idle Earn
----------------------------------------------------------------------------------------
1- إدخال المفتاح فى الكونتاكت .. تحريك المفتاح لوضع ON لمدة 5 ثوانى حتى انتهاء صوت الطرمبة وانطفاء لمبة Hold من التابلوه ( مع ملاحظة عدم تشغيل المحرك )
2- إعادة المفتاح إلى وضع OFF لمدة 5 ثوانى ( مع ملاحظة عدم إخراج المفتاح من الكونتاكت )
3- تحريك المفتاح لوضع ON لمدة 5 ثوانى أخرى ثم تشغيل المحرك والفتيس على وضع P
4- التسخين حتى تصل الحرارة إلى وضع السخونة الطبيعية ( قبل المنتصف بجزء بسيط )
ملحوظة: لو العربية سخنة أصلاً فلا احتياج لهذه الخطوة ( رقم 4 )
5- بعد تمام السخونة .. الضغط على الفرامل وتحريك الفتيس إلى الوضع D ( مع عدم تحريك السيارة )
6- تشغيل التكييف لمدة 10 ثوانى ( مع استمرار الضغط على الفرامل )
7- غلق التكييف لمدة 10 ثوانى ( لازلنا مستمرين بضغط الفرامل )
8- غلق الكونتاكت والفتيس مازال على الوضع D .. وإخراج المفتاح من الكونتاكت
9- إعادة الفتيس إلى الوضع P .. ثم إدخال المفتاح إلى الكونتاكت .. تحريكه إلى وضع ON لمدة 5 ثوانى .. ثم إدارة المحرك
-- وبكدة المفروض يكون تم عمل ريسيت Reset والعربية ظبطت بدون الحاجة لوضع السيارة على الكومبيوتر فى أى توكيل أو مركز صيانة.

*أرجو أن أكون قد قدمت شئ له قيمة لإستفادة أعضاء المنتدى الكرام*

[mhkorayem]

المهم بقى العربيه فرقت معاك بعد الموضوع ده في حاجه ولا محستش بفرق ؟؟؟؟

[PUTTPUTT]

النقطه ال 8 هو انت ممكن تشيل المفتاح من الكونتاكت والعربيه على الd

[BraveHeart_13]

المهم بقى العربيه فرقت معاك بعد الموضوع ده في حاجه ولا محستش بفرق ؟؟؟؟

يبدو إنك قريت الموضوع باستعجال لأنى مجاوب على سؤالك بالظبط فى السطر الرابع :
[overline]"و بعد ما طبقت التجربة اللى قريتها وعملت الخطوات بالظبط زى ما هقولهالكم ، لقيت كل المشاكل دى إنتهت .. فقررت أقولكم عليها عشان الإستفادة العامة"[/overline]

[BraveHeart_13]

النقطه ال 8 هو انت ممكن تشيل المفتاح من الكونتاكت والعربيه على الd

طبعا ممكن فى الأوبترا مفيش مشكلة .. العربيات الأمريكانى القديمة هى اللى ماكانتش بتسمح إنك تخلع المفتاح من الكونتاكت إلا لما تكون على الـ p أو الـ n فقط .. ولاحظ إنك هتجيبها على الـ p قبل ما ترجع تدور تانى .. وكده كده إنت لو حاولت تدور العربية والفتيس على الـ d مش هتدور

[mhkorayem]

يبدو إنك قريت الموضوع باستعجال لأنى مجاوب على سؤالك بالظبط فى السطر الرابع :
[overline]"و بعد ما طبقت التجربة اللى قريتها وعملت الخطوات بالظبط زى ما هقولهالكم ، لقيت كل المشاكل دى إنتهت .. فقررت أقولكم عليها عشان الإستفادة العامة"[/overline]

معلش بقى العتب على النظر
بس ده بقى للاوبترا بس ولا الخطوات دي تتنفذ على اي عربيه ؟؟؟

[BraveHeart_13]

معلش بقى العتب على النظر
بس ده بقى للاوبترا بس ولا الخطوات دي تتنفذ على اي عربيه ؟؟؟

يا باشا نظرك 6/6 وفكرك 10/10 مفيش مشكلة .. وأنا سعيد انك سألتنى السؤال ده
لكن الحقيقة أنا ماعنديش فكرة الخطوات دى تمشى مع الأوبترا بس ولا أى عربية أوتوماتيك تانية لأنى قريت الموضوع ده عن الأوبترا ونقلته زى ما هو .. وعموما يا ريت لو حد عنده أوتوماتيك فى ماركات تانية وعنده تهييس فى الكومبيوتر ومحتاج يعمله ريسيت أو حتى لو ماعندوش تهييس وعايز يعمله ريسيت بمزاجه ، يجرب نفس الخطوات (مش هيخسر حاجة) وبعدين يقولنا .. لأن الموضوع ده لو هينفع فى ماركات تانية ، هتكون استفادة عظيمة لناس كتير

[mhkorayem]

يا باشا نظرك 6/6 وفكرك 10/10 مفيش مشكلة .. وأنا سعيد انك سألتنى السؤال ده
لكن الحقيقة أنا ماعنديش فكرة الخطوات دى تمشى مع الأوبترا بس ولا أى عربية أوتوماتيك تانية لأنى قريت الموضوع ده عن الأوبترا ونقلته زى ما هو .. وعموما يا ريت لو حد عنده أوتوماتيك فى ماركات تانية وعنده تهييس فى الكومبيوتر ومحتاج يعمله ريسيت أو حتى لو ماعندوش تهييس وعايز يعمله ريسيت بمزاجه ، يجرب نفس الخطوات (مش هيخسر حاجة) وبعدين يقولنا .. لأن الموضوع ده لو هينفع فى ماركات تانية ، هتكون استفادة عظيمة لناس كتير

اشكرك مرتين
مره على الموضوع المفيد ده
ومره على اهتمامك وردك المحترم

[BraveHeart_13]

اشكرك مرتين
مره على الموضوع المفيد ده :ta_clap[1]:
ومره على اهتمامك وردك المحترم

شكراً يا أستاذ محمد .. واسمحلى أجدد تقديرى لأسلوبك الراقى فى الحوار .. وتحت أمرك فى أى استفسار

[hesham fawzy h]

شكرا على المعلومات الجميلة دى

[ahmedamgad18]

استفسار .... طيب لو السيارة مانيوال حيكون الوضع ايه ؟؟؟

[BraveHeart_13]

استفسار .... طيب لو السيارة مانيوال حيكون الوضع ايه ؟؟؟

للأسف أنا مش عارف غير الطريقة بتاعة الأوتوماتيك .. تقبل اعتذارى

[ahmedamgad18]

للأسف أنا مش عارف غير الطريقة بتاعة الأوتوماتيك .. تقبل اعتذارى

ولا يهمك يا باشا

[BraveHeart_13]

للأسف أنا حزين جدا إنى أعمل موضوع أعتقد إنه مفيد جدا لناس كتير وألاقى ما يقرب من 500 مشاهدة ثم لا أجد حتى شخص واحد جرب الموضوع البسيط ده ورجع يحط رد عليه عشان يقولنا نفع معاه ولا لأ !!
الأعضاء الكرام ..
أين المنهج الذى تأسس عليه الموقع وهو أن تُفيد وتستفيد؟
أين الأمانة التى تقتضى ألا يكون الفرد أنانياً يأخذ المنفعة ثم يذهب؟
.. شكراً

[abo farid]

اخي الكريم صاحب الموضوع الرائع اهنيك
لي استفسار لو انا عملت القصة دي هل علامة المحرك الصفرة وعلامة الايرباج الحمرا هتروح من طابلوة السيارة ولا هتفضل
ولكم جزيل الشكر