شيفروليه كروز 2011

[محمد مجدي محمد]

السلام عليكم ورحمة الله وبركاته
انا معروض عليا شيفرولية كروز 2011 لقطة بمعني الكلمة
فانا عايز اعرف مميزات و عيوب العربية و عايز اعرف العربية دية بتمشي ببنزين 92 ولا 95 و عايز اعرف اخبار قطع الغيار و هل موجودة برة التوكيل ولا لا
بس ارجو الرد سريعا جدا
و اهم حاجة قالولي هي بتمشي ببنزين اية
لان الجديدة ب95 و دة كلام التوكيل

[ahmed elsherif]

معايا 2011 يباشا وبنزين 92 وما شاء الله زي الفل وقطع الغيار متوفره متقلقش توكل علي الله

[ashouhdy]

الكروز بتمشي ب 92 مفيش 95 دى خالص!

اهم حاجة تكشف على الموتور و الفتيس في اي مركز خدمة

واول ما تستلمها تغيرر الزيوت كلها

الموتور ب 5w30

الفتيس بياخد 5 لتر مواصفات ديكسرون6 مش موبيل 330 او 220

[محمد مجدي محمد]

اصل توكيل شيفروليه قالي ان الجيديدة ب95
فانا قولت اشوف واحدة مستعملة
بس انا عايز اعرف هي سعرها العادل كام
هي موديل 2011 توب لاين
فبريكا بالكامل
ماشية 9000 كيلو ايوا 9 الاف
بالاكياس بتاعتها
فدي تعمل كام

[ashouhdy]

مش اقل من 115

[teto222]

115 حلو واكشف كويس عشان العربية دى بتجيب فتيس

[محمد مجدي محمد]

معلش يعني اية بتحيب فتيس

[teto222]

يعنى فتيس العربية بيبوظ الكلام دا فى الفتيس القديم موديلات 2010 لحد 2012 الفتيس حساس ولازم الاعتناء بية والمحافظة علية ولية طريقة تغيير زيت معينة ومش اى زيت هتلاقى كل حاجة مكتوبة فى المواضيع المثبتة هنا فى القسم , الكلام دا مش بخوفك ابدا بس عشان لو ليك نصيب فيها هوا عايز معاملة حساسة ولو العربية لقطة فعلا توكل على اللة

[qupid_forever]

ربنا يباركلك فيها يا استاذ مجدي العربيه فعلا اكتر من رائعه وصورها تشهد بذلك وصاحبتها دكتوره شيماء حد محترم جدا
الف مبروك مقدما ;)

[ابو رودي]

الحمد عليكم
والله يا جماعة انا معايا كروز 2010 ومن ساعة لما اشتريتها معملتيش لها اي صيانة في التوكيل وبعمل الصيانة عند مكيانيكي والحمدالله محصلش معايا اي مشكلة وبحط علي طول زيت موبيل والعربية زي الفل معايا وكل لما ادخل المنتدي بلاقي الناس بتتكلم علي الكروز ومشكلها والمشكلة اني العربية معايا وكأني الناس بتتكلم علي عربية تانية
وشكرا

[محمد مجدي محمد]

شكرا لاجابة جميعا
معلش هو زيت الفتيس بيتغير بعد كام كيلو
و ثانيا اجيبها دية ولا اجيب واحدة ثانية 2010 نماشية 60 الف عايزة تتباع ب105000
يعني ممكن تنزل ل100 بس توب لاين فيها نواكل و فيها شاشة تاتش 7 بوصة و فيها كاميرا خلفية و تكيف اوتو و بلوتوث و جنوط و فرش جلد
فانتو اية رايكو اجيبها ولا اجيب الي ماشة 9000 كيلو

[qupid_forever]

شكرا لاجابة جميعا
معلش هو زيت الفتيس بيتغير بعد كام كيلو
و ثانيا اجيبها دية ولا اجيب واحدة ثانية 2010 نماشية 60 الف عايزة تتباع ب105000
يعني ممكن تنزل ل100 بس توب لاين فيها نواكل و فيها شاشة تاتش 7 بوصة و فيها كاميرا خلفية و تكيف اوتو و بلوتوث و جنوط و فرش جلد
فانتو اية رايكو اجيبها ولا اجيب الي ماشة 9000 كيلو

والله يا استاذ محمد انا كلمت صاحبه الكروز اللي ماشيه 9000 كيلو والعربيه طبعا تعتبر زيرو وكنت هشتريها لكن لكن كنت بتكلم ف 110000 جنيه وللاسف صاحبه العربيه مرضيتش وصلت معايا لغايه 116500
راي الشخصي لو انت موافق علي السعر بتاعها اتكل علي الله العربيه زيرو وساعتها الف مبروك عليك
وربنا يكفيك شرها بس ساعتها متنسنيش ف لفه بقه

[ashouhdy]

طبعا الزيرو !