تجربتى مع الشيفروليه اوبترا

[faragalla]

بسم الله الرحمن الرحيم

اولا انا كتبت الموضوع ده لتعم الفائده فقط و ليس الهجوم على العربيه الاوبترا

انا اشتريت العربيه من شهرين موديل 2008 كامله اوتوماتيك مستعمله ب250 ,77 الف جنيه من تاجر صديقى جدا والعربيه كانت عامله 26 الف كيلو و بحاله جيده جدا
تقييمى للعربيه هوا انها عربيه تستخدم داخل المدينه فقط عربيه صالونها واسع بس الشنطه ديقه شويه او مش عميقه و شكلها حلو من الخارج بس على الطرق السريعه انا زعلت منها لان بعد ال 100 كم تلاقى العربيه مش سابته كويس على الطريق و كمان الباور بتاعها مبيفصلش فبتحس انك مش قادر تسيطر على العربيه انا كنت راكب قبلها فابيا موديل 2002 كنت باخد الملفات على سرعة 160 كم والعربيه بتكون مكلبشه فى الارض اما الاوبترا فبتعوم منى مع انى اول ما اخذت اللعربيه رحت كشفت عليها زوايا و كانت زى الفل و الراجل قالى كله تمام على الكمبيوتر
وكمان الفرامل ما بتوقفش العربيه العجل بيمسك و العربيه بتزحف و ما بتقفش بعكس الفابيا انا كنت المس الفرامل العربيه تكلبش فى الارض و تقف و متزحفش خالص فرحت كشفت عند الميكانيكى لقى الفرامل زى الفل و التيل كويس و الطنابير كويسه و مفيش اى مشكله

انا من الاسكندريه و شغلى فى برج العرب فبمشى على سرعات عاليه اقل حاجه 120 كم لان المسافه طويله و الواحد بيزهق لان ده مشوار يومى
فقررت انى ابيعها و ارتاح و فعلا بعتها و خسرت الف جنيه و قلت مش مشكله اكنى مأجر عربيه الفتره دى

بس قلت لازم اشارك بالموضوع ده فى المنتدى لانى بحبه جدا و استفدت منه فى حاجات كتير و ربنا يكرم و الاقى عربيه تانيه اركبها بس ان شاء الله انا ناوى اجيب المانى مش هفكر فى الكورى تانى خالص

واسف لو كنت طولت عليكم
و السلام عليكم و رحمة الله و بركاته

[egyptianmafia]

The optra you got probably isnt the sport hence it doesnt have ABS...so any car without ABS if you try to brake fast or quickly...the car wont stop.....

that being said....you can add weights to the car and it will make it more heavy....

[Hosam_Optrawy]

أستاذ فرج الله

من الواضح ان العربيه اللى حضرتك اشترتها كان فيها مشكله

لأن أولا الأوبترا مينفعش يتقال عليها خالص عربيه تستخدم داخل المدينه

أمال العربيات الصغيره يتقال عليها ايه ؟؟؟

ثانيا موضوع الشنطه - الشنطه مساحتها 405 لتر ودى مساحه كويسه جدا وقريبه من باقى العربيات فى فئتها

على فكره الالنترا شنطتها 402 لتر - السيراتو 415 لتر

ثالثا موضوع الثبات بعد ال 100 - ودا اللى خلانى أقوللك ان عربيتك فيها مشكله الله اعلم ايه هى

لأن العربيه ثباتها ممتاز ومشهودلها بكدا وحضرتك مش عارف تعدى ال 100 يبقى أكيد فى حاجه مش مظبوطه

رابعا موضوع الباور - هايفصل ازاى يعنى ؟ العربيه الباور بتاعها هيدروليك يعنى زيت مش كهربا

وعموما الباور بتاعها يعتبر ممتاز لانه مش خفيف ولا تقيل والتحكم فيه سهل

خامسا الفرامل - الفرامل كويسه رغم انها مش Abs بس مبتزحفش

ممكن تكون حضرتك متعود على فرامل معينه ومش متأقلم مع فرامل الأوبترا

وأخيرا انا مش بادافع عن العربيه زى ماحضرتك برضه مابتهاجمش

انا قلت وجهة نظرى من خلال تجربتى لمده أكتر من سنه

جايز حضرتك مكنتش متأقلم مع العربيه لانك متعود على حاجه تانيه

وبرضه انت شاريها مستعمل يعنى ماتعرفش كان فيها ايه

الحمد لله انك بعتها ومخسرتش كتير فيها وربنا يوفقك وتجيب العربيه اللى تريحك ان شاء الله

بالتوفيق وتحياتى ليك

[faragalla]

أستاذ فرج الله

من الواضح ان العربيه اللى حضرتك اشترتها كان فيها مشكله

لأن أولا الأوبترا مينفعش يتقال عليها خالص عربيه تستخدم داخل المدينه

أمال العربيات الصغيره يتقال عليها ايه ؟؟؟

ثانيا موضوع الشنطه - الشنطه مساحتها 405 لتر ودى مساحه كويسه جدا وقريبه من باقى العربيات فى فئتها

على فكره الالنترا شنطتها 402 لتر - السيراتو 415 لتر

ثالثا موضوع الثبات بعد ال 100 - ودا اللى خلانى أقوللك ان عربيتك فيها مشكله الله اعلم ايه هى

لأن العربيه ثباتها ممتاز ومشهودلها بكدا وحضرتك مش عارف تعدى ال 100 يبقى أكيد فى حاجه مش مظبوطه

رابعا موضوع الباور - هايفصل ازاى يعنى ؟ العربيه الباور بتاعها هيدروليك يعنى زيت مش كهربا

وعموما الباور بتاعها يعتبر ممتاز لانه مش خفيف ولا تقيل والتحكم فيه سهل

خامسا الفرامل - الفرامل كويسه رغم انها مش abs بس مبتزحفش

ممكن تكون حضرتك متعود على فرامل معينه ومش متأقلم مع فرامل الأوبترا

وأخيرا انا مش بادافع عن العربيه زى ماحضرتك برضه مابتهاجمش

انا قلت وجهة نظرى من خلال تجربتى لمده أكتر من سنه

جايز حضرتك مكنتش متأقلم مع العربيه لانك متعود على حاجه تانيه

وبرضه انت شاريها مستعمل يعنى ماتعرفش كان فيها ايه

الحمد لله انك بعتها ومخسرتش كتير فيها وربنا يوفقك وتجيب العربيه اللى تريحك ان شاء الله

بالتوفيق وتحياتى ليك

اولا شكرا على مشاركتك فى الموضوع اولا ممكن يكون فعلا العربيه فيها مشكله بس انا رحت التوكيل و قالولى ما فيش حاجه و كله تمام و الصيانات معموله فى معادها لغاية صيانة ال25 الف صاحبها كان عاملها
وكمان انا نسيت اكتب ان طرمبة الباور بعد ما اخدك العربيه بأسبوعين صوتها بداء يعلى و بقى فيه زنه عاليه ولما سألت قالولى هيا كدا
وكمان انا رحت بيها الى مرسى مطروح انا و العائله و انا فى نصف الطريق التكييف فصل و مبقاش مؤثر خالص فا طفيته و استنيت شويه و بعدين شغلت اشتغل شويه و بعدين فصل تانى و هكذا و انا راجع من مطروح نفس الموضوع اتكرر
فا دى حاجات زعلتنى من العربيه اوى
وممكن علشان انا كنت متعود على العربيه الاسكودا الفابيا ! العربيه الفابيا دى انا فاحتها شغل بصراحه و لسه زى الفل معايا انا مبعتهاش سبتها للمدام و هيا دلوقتى عامله 280 الف كم ولسه الموتور و العفشه زى الفل مغيرتش حاجه الحمد لله

[hesham_shousha]

الأوبترا ركبتها سنتينة عندما كنت اعمل بالسعوديه وكنت باجيب بيها ال 180 وكانت ثابته على الارض
وأنا مختلف تماما فى كل ما قيل عنها فى هذا الموضوع

[أبو عمار]

الغريب إن نقاط الضعف إلى إنت كتبت عليها من وسع شنطة إلى ثبات على السرعات العالية إلى تكييف إلى فرامل فعلا تعتبر من نقاط القوة فى صالح الأوبترا و دى شهادة لأكثر من سنتين إستخدام وفى نفس الطرق كمان يا أبوسكندر

[faragalla]

الغريب إن نقاط الضعف إلى إنت كتبت عليها من وسع شنطة إلى ثبات على السرعات العالية إلى تكييف إلى فرامل فعلا تعتبر من نقاط القوة فى صالح الأوبترا و دى شهادة لأكثر من سنتين إستخدام وفى نفس الطرق كمان يا أبوسكندر

اهلا بك يا ابو عمار

بالنسبه لوسع الشنطه فدا بيبقا على حسب الا غراض اللى بتحطعا فيها فانا بالنسبالى عندى 3 اولاد و كراكيبهم كتييييييييييير فا الشنطه مبتكفيش معايا ممكن مع شخص اخر تكون و سعه جدا
اما موضوع الثبات فانا ما بتجناش على العربيه هيا فعلا كانت كدا و رحت كشفت عليها و الكل قالو مفيش حاجه فممكن يكون عيب فى العربيه اللى كانت معايا
وبالنسبه للتكييف بردو دا اللى حصل معايا فى المشوار الطويل الى مطروح بس بالنسبه للاستعمال اليومى من الاسكندريه الى برج العرب كنت بسقع منه فعلا
وكمان الفرامل عملتلها صيانه و كشفت على كل حاجه فيها و كله تمام بس فى المفاجأت اللى بتحصل على الطرق السريعه كانت مبتقفش و بتزحف جامد جدا

و انا قلت انا ما بهاجمش العربيه انا بحكى التجربه و اللى حصل معايا

[faragalla]

الأوبترا ركبتها سنتينة عندما كنت اعمل بالسعوديه وكنت باجيب بيها ال 180 وكانت ثابته على الارض
وأنا مختلف تماما فى كل ما قيل عنها فى هذا الموضوع

للاسف اللى بتنزل عندنا فى مصر متشال منها الاير باج و abs فا اكيد هناك اختلاف كبير بينها و بين الخليجى

[hmada9009_99]

بس هقولك حاجه skoda fabia فئة و optra فئه تانيه ياعني حضرتك بتقول ان skoda fabia كانت مكلبشة في الأرض ده طبيعى لأنها skoda وكمان لأنها عربية صغيره فده طبيعي طيب انا هقولك حاجه انا خد بالماتريكس ملف جامد على 160 بس كنت مركبلها جنط 15 و كان 205/50 وكانت مكلبشة في الأرض انا قصد ققول انها مسأله نسبيه وبتفرق من شخص لتاني

[faragalla]

بس هقولك حاجه skoda fabia فئة و optra فئه تانيه ياعني حضرتك بتقول ان skoda fabia كانت مكلبشة في الأرض ده طبيعى لأنها skoda وكمان لأنها عربية صغيره فده طبيعي طيب انا هقولك حاجه انا خد بالماتريكس ملف جامد على 160 بس كنت مركبلها جنط 15 و كان 205/50 وكانت مكلبشة في الأرض انا قصد ققول انها مسأله نسبيه وبتفرق من شخص لتاني

فعلا هيا مسأله نسبيه و ممكن يكون تعودى على الاسكودا الفابيا هوا اللى خلانى معرفش اتعود على الاوبترا

[bassam266]

انا حرد علي حضرتك فى نقطتين

موضوع الثبات ده انا جبت بالعربيه 205 كم/س و لحد 160 كانت ثابتها كويس بعد كده بدأت تخف فأكيد العربيه اللى انت اشتريتها كان فيها حاجه مش مظبوطه.

موضوع الفرامل انت بتقول ان العجل بيكلبش بس العربيه مش بتقف طيب ما كده الفرامل عملت اللى عليها و وقفت العجل يبقى العيب اما فى الكاوتش او فى الطريق يعنى ممكن الكاوتش يكون ممسوح او مش مظبوط و ممكن الطريق يكون فيه مياه او رمل.

[ashraf229]

أختلف معاك في كل عيوب الأوبتر اللي ذكرتها لأنها عربية فعلا محترمة و اتنفق مع الأراء اللي بتقول ان عربيتك مستعملة كان فيها حاجة أو ربما ما حبيتش العربية فساعتها بتشوف كل جميل فيها قبيح و ما بتنزلكش من زور .........

عالعموم شكرا على الموضوع............و ربنا يكرمك بعربية تعجبك أكتر و ترتاحلها........

[alihussien2]

قولولنا الخلاصة نشتري اوبترا ولا لالالالالالالالالالالالالا؟.

[zaza_lanos]

المانى vs كورى
مش عادل نهائى

[Hosam_Optrawy]

قولولنا الخلاصة نشتري اوبترا ولا لالالالالالالالالالالالالا؟.

مينفعش تاخد قرارك بنسبة 100 % بناء على ارائنا

لازم برضه انت تبقى مقتنع ومستريح نفسيا لقرارك

ومفيش عربيه هايتفق عليها كل الناس

انا شخصيا مبسوط جدا من الأوبترا بقالها معايا سنه وشهرين

الحمد لله مفيش اى عيوب

وشايفها أحسن عربيه فى حدود سعرها

غيرى شايف كدا وهو حر ومقدرش اختلف معاه أو أكدبه

وعموما البدايل كتير فى الفئه دى

بروتون ( جين 2 - بيرسونا - واجا ) - نيسان صنى - تزود شويه وتجيب النترا

فى كمان فى الفئه الأصغر شويه هيونداى اكسنت - كيا ريو - رينو سيمبول

اقرا كل شئ عنهم فى المنتدى وانزل اتفرج بنفسك وبعدين خد قرارك

وربنا يوفق