تجربتى مع الاخ قطب

[mohamed808]

السلام عليكم ورحمة الله وبركاته
اولا اتقدم بالتحية لكل السادة الافاضل اعضاء المنتدى
ثانيا : فسوف احكى لكم تجربتى الاولى مع الاخ قضب رجب ميكانيكى الفورد اللى فى الضاهر.
بس احب اوضح حاجة مهمة جدا وهى انى لا اقصد التعرض للاخ قطب فى شخصة او فى مهنته على الاطلاق. انا فقط انقل التجربة كما حدثت تماما ولكم وللجميع التعليق .
فى البداية اوضح لكم انى عندى خبرة كبيرة فى ميكانيكا السيارات تتجاوز 12عاما امتلكت خلالها العديد من انواع السيارات المختلفة
المهم انى موخرا اشتريت سيارة فورد مونديو موديل 98 موتور zetec 1600 سى سى مانيوال .
العربية اشتريها وفيها عيب واضح انه فى السلانسيه الموتور مش مظبوط وبيطلع ريحة عادم
والمشلكة دى اسبابها معروفة اما البوجيه قاطع او رشاش مش شغال اواحد الصبابات الخاصة بهذه الغرفة مفتوح على طول هذا بخلاف كابلات البوجيهات والموبينة وربما احد الحساسات.

المهم رحت للاخ قطب وانا من حلوان . العربية فيها بنزين 80 والعربية فيما عدا السلانسيه ماشية زى الصاروخ والحرارة لا تتعدى ابدا الثلث الاول من مؤشر الحرارة وكل حاجة تمام وصلت عند الاخ قطب . قابلنى بمنتهى الذوق والاحترام واتكلمنا شوية عن المنتدى وبدا رحلة البحث عن اسباب العطل
طبعا بدأ كالمعتاد والمتوقع فك كابلا ت البوجيهات واحد واحد عشان يعرف اى بوجيه اللى قاطع لكنه لم يصل الى واحد بعينه. بدا يختبر الرشاشات واحد واحد كلهم تمام . جاب من عنده موبينة تانية وكابلات وركبهم وبرضه مافيش جديد . فك البوجيهات نفسها وقالى البوجيهات دى مش بتاعتها وركب بوجيهات قديمة من عنده وبرضه مفيش جديد . لم يكن امامه الا الاسكانر كحل اخير . وفعلا جاب اللاب توب وبعد محاولات مضنية نجح التوصيل مع العربية لان كان عنده مشكلة فى وصلة ال usb اللى بين الكمبيوتر وبين العربية . اشتغل البرنامج .. وبدات تظهر بيانات العربية كل شى طبيعى مفيش اى حاجة .قلتله مفيش اى حساسات مش شغالة ؟ قالى لا كله تمام . طيب فين المشكلة يا اسطى قطب . خد وقت طويل فى التفكير . وبعدين قاللى انت حاطط بنزين كام قلتله 80 وطبعا لكم ان تتصورا مدى الراحة والسعادة اللى شعر بيها لما سمع كدة وطبعا نسب المشكلة على طول للبنزين رغم انى متاكد ان البنزين 80 رغم عيوبه والمشاكل اللى ممكن يعملها الا انه برىء من المشكلة دى بالتحديد المهم انى حسيت ان مفيش فايدة . قلتله خلاص هامون 92 واجرب . سابنى وراح يبص على الكمبيوتر وقالى العربية كدة سخنة جدا الحرارة ما بين 117 و118 قلتله امبير الحرارة فى مكانه المعتاد وانا مش حاسس ان العربية فيها اى مشكلة تخص الحرارة . قالى لا العربية دى فيها جوان وش سلندر !!!!!!!!!!!!!
قلتله لا المية بتنقص ولا الزيت بينقص ولاالعربية بتسخن ولا بتعمل طحينة ووكبس البساتم انت اختبرته تمام . قالى العربيات دى مبتعلش طحينة بس ممكن يكون الجوان فيه تسريب خفيف . وبعدين قالى غالبا طلمبة المية مش شغالة!!!!!!!؟؟؟؟؟؟؟؟؟؟؟؟؟
ليه يا عم قطب قاللى الردياتير فيه جنب سخن وجنب بارد والمروحة لما بتشتغل بتجيب هو بارد مش سخن قلتله بس المؤشر مظبوط والمروحة بتشتغل بانتظام ومفيش اى مشكلة من الحرارة . قاللى العربية دى مينفعش ترجع بيها حلوان كدة الموتور هايبوظ منك!!!!!!!!!!!!. والجاجة اللى نكلفها النهادة 100 احسن من اللى نكلفها بكرة 1000 . نده على واحد بيشتغل معاه وقاله فك الطرمبة نطمن عليها . قلتله طيب ما تفك الخرطوم اللى خارج من الطرمبة هانعرف ان كانت شغالة ولا لا . قاللى لا مينفعش !!!!!!!!!. اكتشفت انه هيفك نص الموتور قلتله لا انا مش فاضى خليها مرة تانية.قالى براحتك
قلتله ربنا يسهل حسابك كام ؟؟؟ طلب مبلغ دفعته بدون فصال
قبل ما امشى قاللى بعد ما تمشى لو الموتور باظ منك عاوزك تقول على المنتدى انى حذرتك . قلتله طبعا هاقول كل حاجة وشكرته ومشيت .
طبعا البوجيهات اللى ركبها من عنده كانت زى الزفت خلت العربية اللى كنت رايح بيها زى الصاروخ بقت بتنتش ومش مظبوطة .
عملت كام مشوار فى وسط البلد وعينى طبعا على الحراة ومستنى العربية تولع فى اى لحظة لكن الموشر فى مكانه المعتاد ومفيش اى مشكلة
عديت اشتريت بوجيهات جديدة ومفتاح بوجيهات ووقفت ركبتهم فى 10 دقايق وللحق السلانسيه اتظبط بنسبة 50% او اكتر ورجع تانى سحب العربية زى الفل ورجعت حلوان ومفيش اى حاجة . عديت على ميكانيكى قريب منى قلتله عاوز اتاكد ان طرمبة المية شغالة فك الخرطوم ولقيناها شغالى زى الفل والمروحة منتظمة وكله تمام .
انا عارف ان الموضوع طويل جدا ويمكن يكون ممل
لكن انا صممت اكتب كل اللى دار بينا لان دى امانة فى عرض الموضوع
ولولا انى فاهم كويس قوى كان يمكن اتورطت فى جوان وش سلندر وطبعا تغير طلمبة مية ويمكن كان الامر وصل لعمرة كاملة ده غير البهدلة كل يوم وانتم طبعا عارفين ومجربين ...
مرة تانية انا اقصد الاساءة للاخ قطب فهو رجل فاضل ومحترم جدا وربنا يوفقه
وشكرا للجميع ...
محاسب / محمد محمود

[mohamed808]

تصحيح واجب لخطأ غير مقصود

(مرة تانية انا لا اقصد الاساءة للاخ قطب فهو رجل فاضل ومحترم جدا وربنا يوفقه)

[wkisho2005]

الظاهر مفيش فايدة
بس كان ليا سؤال لحضرتك ملوش علاقة بالموضوع في وسط الكلام لما قالك دا عايزة جوان وش سلندر وكدا قلتله لا دي كل حاجة تمام حتي المية مش بتنقص ولا الزيت ولا كدا هل معني كدا ان المية لما تنقص تبقي العربية عايزة جوان وش سلندر؟؟ولا ممكن يكون في اسباب تانية؟؟؟اصل المية عندي بتنقص بس مفيش مشكلة في الحرارة ولا اي حاجة ودايما المؤشر زي عندك كدا مبيعديش التلت الاول والف حمد الله علي سلامة العربية وانك اطمنت انها تمام ولو ان حصل حاجات تزعل في رحلتك دي بس المهم ان محصلش خساير

[mohamed808]

الظاهر مفيش فايدة
بس كان ليا سؤال لحضرتك ملوش علاقة بالموضوع في وسط الكلام لما قالك دا عايزة جوان وش سلندر وكدا قلتله لا دي كل حاجة تمام حتي المية مش بتنقص ولا الزيت ولا كدا هل معني كدا ان المية لما تنقص تبقي العربية عايزة جوان وش سلندر؟؟ولا ممكن يكون في اسباب تانية؟؟؟اصل المية عندي بتنقص بس مفيش مشكلة في الحرارة ولا اي حاجة ودايما المؤشر زي عندك كدا مبيعديش التلت الاول والف حمد الله علي سلامة العربية وانك اطمنت انها تمام ولو ان حصل حاجات تزعل في رحلتك دي بس المهم ان محصلش خساير

اشكرك على شعورك الطيب والحمد لله على كل شى

اسباب نقص المية معروفة وهى تنحصر بين تسريب فى خراطيم دورة التبريد او الرادياتير او القربة وممكن غطاء القربة يكون غير محكم فتتبخر كمية من المياه مما يسبب نقصها . ولكن فى احيان يكون هناك تلف بسيط فى جوان وش السلندر يتسبب فى سقوط المياه الى داخل غرف الحريق ( عند البساتم ) فتتبخر نتيجة الاحتراق طبعا وفى هذه الحالة لن تشاهد اى اعراض الا نقص المياه فقط وهذا يتوقف على كمية المياة الناقصة . لو الكمية كبيرة ومفيش تسريب واضح ارجو ان تستشير ميكانيكى تثق فيه . اتمنى لك التوفيق وربنا يستر علينا جميعا

[shehabo]

هههههههههههههههههههههههههههههههههههه

هو انت وقعت مع قطب

يبقي عليه العوض

[egytamer]

مشكلة الفورد انها معقدة جدا والعيب بيكون لية اكتر من سبب

[mada_mada81]

[gdwl]مشكلة الفورد انها معقدة جدا [/gdwl]والعيب بيكون لية اكتر من سبب

يا جماعة انا كنت ناوى اشترى فيستا بس من كتر ما دخلت منتدى الفورد بصراحه اتعقدت منها مشاكل كتير وحاجات ملهاش حل

[mada_mada81]

هههههههههههههههههههههههههههههههههههه

هو انت [gdwl]وقعت مع قطب[/gdwl]

يبقي عليه العوض

غربية مع ان كل اللى فى النتدى بيشكروا فيه على العموم كل واحد حر فى رايه

[aYaBooY]

الاخ صاحب الموضوع اولا انا بشكر اسلوب سرد الموضوع و اسلوبك الجيد في عرض المشكلة دون النعرض بالاسائة لاي فرد
انا من فترة كنت نشرت موضوع عن مشكلة فضلت الف عليها سنه تقريبا و في الاخر قطب حلها بمنتهي السهولة دون تغير مسمار و ديه برده شهادة ليه
انا مش عارف ايه الظروف الي بمر بيها كل واحد و برده ممكن يكون السبب بسيط و الراجل غلط و طبعا كل واحد فينا عارف انه جل من لا يخطئ او يسهو
اعتقد المشكلة عندك في خرطوم البي سي في و البلف بتاعة روح غيرهم و انشاء الله المشكلة تنتهي
و لو مش عاوز تدفع كتير علشان الخراطيم بتاعت فورد اسعارها عجب و تحرق الدم ممكن تجيب خراطيم ضغط عالي بنفس المقاس و تركبهم و الموضوع ده متجرب اما فيما يخص بلف البي سي في ممكن تجرب تنظفة الاول و لو منفعش تجرب تغيرة
طبعا لو انت مش عارف اماكن الحاجات الي انا قلت عليها في عربيتك افضلك تخلي متخصص فورد الي يغيرهم
موضوع انك بتستخدم بنزين 80 معتقدش انه السبب علشان اعراضة انك تسمع صوت تسقيف و السحب يبقي اقل و صوت الموتور يبقي اعلي بس لكن مشكلة السلانسيه اعتقد اني وصلت للسبب و الله الموفق

الاخ الي بيقول بدام وقعت مع قطب يبقي عليه العوض اتمني انك تحكي قصتك معاه و الناس الي تحكم

[theking_y]

أنا بالنسبالى ليا تجربتين أسوء من بعض مع [gdwl]قطب[/gdwl]
وليا تجربه مع [gdwl]تكنو فورد[/gdwl] كانت سوده برده
ومن يومها وأنا لا أتعامل مع أى منهم
والحمد لله أى حاجه فى العربيه بعملها عند ناس بتتقى ربنا فى عملها وفينا
بالنسبه لتجربتى مع قطب وتكنو أنا قولتهم قبل كده من فتره
ولو حد عاوز يعرفهم تانى يقول وأنا أحكيهم تانى

[shehabo]

الاخ الي بيقول [gdwl]بدام [/gdwl]وقعت مع قطب يبقي عليه العوض اتمني انك تحكي قصتك معاه و الناس الي تحكم

[justify]

السلام عليكم ورحمة الله وبركاته
كيفكم جميعا

بالنسبة للاخ aYaBooY انا ملاحظ انك بتتكلم كتير عن لسان الاسطي قطب بصراحة مش عارف ليه ؟ يمكن فى أسباب تخليك متحمس للرد عنه بالرغم من ان الاسطي قطب نفسه شاف الموضوع ولم يرد ؟ يمكن تكون صديقه أو صنيعي عنده فى الورشة .. الخ ...الله أعلم ... على العموم أنا هحكي المأساه اللى شوفناها مع الاخ قطب أنا وصديقي مع الاحتفاظ ببعض التفاصيل ..
أولا : أنا بشتغل فى مجال البرمجة ونظم المعلومات وبحكم جلوسي امام النت بأستمرار تعرفت على المنتدي المحترم ( نايل موتورز ) وانا من أشد المعجبين بهذا المنتدي الرائع وبالرغم من اني متابع جيد لهذا المنتدي الا اني لم اسجل فيه الا من يومين تقريبا .
ثانيا : لي صديق يمتلك عربية فورد ومن فترة كده ليست بالبعيدة حصل فيها مشاكلة ... المهم روحنا لورشة الاخ قطب اللى فى الظاهر وعلى فكرة انا مكانش لي معرفة سابقة بالاخ قطب ولا صديقي كمان كان يعرفة لاكن ولاد الحلال الله يسامحهم دلونا عليه .. الاخ قطب شاف العربية وكشف عليها بالكمبيوتر وبعد حوالي 3 ساعات كان رأي قطب باشا تغيير الكنترول يونت وطبعا احنا مش فاهمين حاجه وافقنا طبعا وصاحبي قاله أوكي أشتغل يا باشا وغير الاخر قطب الكنترول يونت ...
وبعد ما غيروه ... فضلت العربية برضه زى ما هي وبعد عشرة ايام من المشورة من مدينة نصر لغاية الظاهر بدون نتيجة صاحبى راح لواحد تانى فى جسر السويس قاله الكنترول بتاعك سليم ومكنش له داعي تغيره ... آيه رأيكم بقي ؟؟؟؟؟؟؟

المهم بقي المشكلة دي كانت مع صاحبي لاكن انا كنت معاه لحظة بلحظة وللعلم انا كرهت الفورد بسبب الكام يوم دول والحمد لله انا عربيتي دايو لانوس ومستريح معاها جدا يعني مش محتاج اروح الظاهر ابدا ابدا ابدا .... على فكرة انا بجد لا أقصد التقليل من خبرة الاسطي قطب ولاكن انت طلبت مني سرد القصة والحكم للجميع ........ شكرا
[/justify]

[goofy301]

والله ياجماعة مادام الموضوع اتفتح هاحكى التجربة الثنية ليا مع الاخ قطب...وقد كنت حكيت الاولى سابقا بخصوص تكييف الاسكورت 1600 كاربيراتير...
المهم روحت من حوالى شهرين عشان كنت عايز اظبط الكهرباء بتاعة العربية لانها كانت بتعلى وتوطى وكان الاخ ayabooy قال انه قطب ظبطهاله قبل كده على الكمبيوتر...
المهم روحتله وقولتله القصة فقالى عربيت ماينفع بتظبطلها كهرباء ... قولتلة يعنى ايه فقالى ده كاربيراتير فقولتة طب مافى ناس جاتلك وظبطها على الكمبيوتر قالى آه ف بس انت ماعندكش الفيشة الخاصة بكده...فقولتله طب ايه الحل فقالى تغير الكاربيراتير بواحد تانى ...!!!! قولتله طب ولما اشغل التكييف واحمل عليه السحب هيضيع خالص فقالى نبقى نركبله اكتيويتور ...قولتله ماهى اصلاً فيها اكتيويتور فراح بص عليها وقالى آه ... يبقى تجيب كاربيراتير موديل قديم من غير اكتيويتور ونبقى نخلى بتاع التكييف يضبط موضوع التكييف ده قولتله ازاى ...قالى ظغط هوا...!!!!!!!!!!
فحسيت كده انه بيهجص ومش فاهم اى حاجة هو معقول يبقى متخصص فى الفورد ومش عارف انه الكاربيراتير بتاع العربية ده فى اكتيويتور ولا لأ....!!! وفى حد يقول روح هات كاربيراتير فورد موديل قديم.......!!!

[aYaBooY]

الاخ الفاضل shehabo اعتقد كل المجموعة في قسم فورد تعرفني شخصيا و كتير منهم قابلونى
انا مش صنايعي عند حد او مش برد عن لسان حد

[hanykato]

انا على فكره شوفت جوزيف قبل كده بيصلح عربيته عند قطب مش شغال معاه ولا حاجه وشكلك يا جوزيف انسان محترم ده غير انى متابع ردودك ومشاركاتك فى المنتدى وانك بتحاول تفيد الناس على قد ما تقدر. بس صدقنى فى ناس ليهم تجارب مريره مع الاخ قطب (مع كامل احترامى ليه طبعا) وانا شخصيا ليا تجربتين أمر من بعض والله وياريت بجد حد يرشح ليا واحد بيفهم انا معايا فيستا موديل 2001 وعندى مشاكل فيها كتير ومحتاج اظبطها

[hanykato]

تجربتى مع الفيستا ومع قطب

العربيه حالتها اول ما جيبتها كانت كويسه اوى والله وزى الفل المهم هختصر وهلخص فى نقط
1_ بعد الشراء بشهر غيرت سير الدينامو وسير الكاتينه وطقم سيرفيس كامل (بوجيهات وفلاتر وكده) وبطحات المساعدين, فى مركز صيانه كده فى الزمالك, بعد التركيب لقيت العربيه فيها رعشه غريبه وبتزيد اوى لما المروحه بتشتغل كأنى راكب ميكروباص من سنه 80 رجعت للمركز والمهندس نزل جرب العربيه معايا ولقى كلامى صح وقال للمكانيكى اللى كان شغال فيها دى فيها رعشه فى السلانسيه بس مش بتبان بعد التالت . المهم قعد يفك ويركب ويشوف السيور متركبه صح ولا لا ونضف الانجكشن . وبرده محصلش حاجه .
2_ روحت للاسطى قطب فى الضاهر الراجل تفضل وكشف على العربيه وقالى دى طلمبه المياه عايزه تتغير وكانت لمبه الموتور منوره فى التبلوه حط العربيه على الجهاز وقالى ده مبخر بنزين عايز يتغير , روحت حسب تعليمات الاسطى قطب بنزيمه وطنيه عشان اجيب الاصلى وجبت الطلمبه ومجبتش المبخر عشان الفلوس مكفتش ( 1000 الطلمبه بالتركيب بالمصاريف) المهم ركبت وتمام ودورنا العربيه والرعشه زى ما هيا طبعا انا كنت خلاص زهقت واليوم خلص خدت العربيه ومشيت وانا هموت من الغيظ لان العربيه فضلت زى ما هيا ده غير الفلوس والعطله اللى اتعطلتها .
3_ بعدها بفتره رجعت للاسطى قطب عشان نفس المشكله قالى غير اسطوانه الدبرياج العربيه هتزيد فى الاداء معاك قلت تمام , نزلت التوفيقيه جيبت اسطوانه اتحاد اوربى نظرا لضعف الميزانيه ( اخوكم لسه طالب فى الجامعه) رجعت لقطب قالى دى مش هتنفع مش بتعتها روحت للتاجر قالى وحلفلى 100 يمين انها تنفع لدرجه انو قالى اوديك لمكانيكى يركبهالك المهم اصريت انى اغيرها وجيبت الالمانى وركبت وتمام طبعا الكلام ده خد يوم بحالو فى اثناء التركيب الاسطى قطب قالى قاعده الموتور بايظه والكوتشه متاكله وهى دى بقى اللى عامله الرعشه اللى فى العربيه قلت الحمد لله عرفنا السبب, غيرها قالى عندى واحد مستورده قلت بدل ما انزل فى التوفيقيه اجيب دى وخلاص المهم ركب وخلص والعربيه زى ما هيا.... طبعا انا كان هيجيلى شلل ونقطه وساكته قلبيه كل ده والعربيه زى ما هيا ... خدت العربيه ومشيت وحلفت انى همشى بيها كده حتى لو بيعتها خرده فى الاخر... ده غير انى اكتشفت بعد كده ان القاعده اللى ركبهالى فيها بردو عضه وقطع فى الكوتشه ومش سليمه ..
نفسى بقى احكيلكوا على المعامله فى ورشه الاسطى المحترم قطب(مع كامل احترمى ليه هو والله شخصيه لذيذه ومحترم جدا) الصنايعيه عندو بشوات تتحايل على كل واحد ساعه عشان يشتغلك فى العربيه ده غير ان الاسطى نفسوا كل فين وفين لما بيمد ايدو فى عربيه ده غير ان المصنعيه غاليه جدا يعنى انا مغير اسطوانه بمصنعيه 100 جنيه
وفى تجربه تانى لواحد صاحبى هحكيلكوا عليها بس بعدين ..... اسف للتطويل ونفسى حد يقولى على حد كويس عشان العربيه زى ما هيا ونفسى اظبطها بجد
(ملحوظه للعداله والحق الاسطى قطب مكنش هو سبب المشكله من الاول بس مدام مش عارف يحل المشكله كان يقول.. مش لازم الافتاء, ده غير التكاليف اللى ربنا يعلم الفلوس دى بتيجى ازاى وفى الاخر المشكله متحلتش ) وليا موقف تالت معاه بس ده بقى اللى جاب نهايتى مع التعامل معاه ومتأكد انى لو حكيتوا محدش هنا هيتعامل معاه تانى ..