فورد مونديو فيها مشاكل بالعجب

[n-box]

اولا احب اقول انى بجد ليا نظريتين فى الفورد متناقضين تمام
الفورد عربية ركوبة ومريحة ومتينة
ولكن عيوب صيانتها صعبة اوى وغالية جدا جدا جدا ومش اى حد يفهم فيها
تعالو احكى لكم قصتى مع المونديو
اشتريتها وانا معب بتصميمها جدا وكانت موديل 98 1600 وكانت تمام ولكن بدات المشاكل بعد شهر بالظبط


اولها العربية كان لازم ازود لها مية كل يوم ودى حاجة انا متعودتش عليها فى اى عربية انجيكشن وفى يوم زميلى اخدها ونسى يحطلها مية والعربية ولعت منة وجابت وش سلندر

ثانى مشلكة ان العربية من ساعت ما جبتها بحس ان عزمها ضعيف يعنى فى الطلعة بتكون ضعيفة لكن بعد الغيار الثالت بتكون سريعة يعنى عزم ضعيف بس فية سرعة

بعد المشكلة دى بشهرين العربية بقت تترجرج فى الطلوع على الغيار الاول رجرجة كاملة من اول الكبوت الى التابلوة تحس ان الموتور هيتخلع فى الطلعة
ناس قالت قاعدة فتيس - اسطوانة وديسك - قاعدة الموتور


بعدها كان عندى مشكلة فى التكيف كان بيجيب هوا سخن
واحد فنان قال ان فية ترس فى تروس الموتور اللى بيعدى عليها سير الموتور فية بوش والترس دة يخص التكيف لازم يتظبط عشان دا اساس المشكلة
ولما عملو الموضوع دا التكيف اتظبط بس الموتور بقت حالتة صعبة دا والعزم بقى اضعف دا حتى صوت الماكينة بقى اعلى من صوت الفيات 132 تخيلوا والصوت بيعلى اكتر لما بنلف العجل والعربية واقفة


المشكلة الاخيرة دى بقالها 10 ايام معايا لحد دلوقتى فى يوم من الايام بدور العربية لقيت لمبة abs منورة وانا عارف ان دة نظام التحكم بمنع الانزلاق وعارف وظيفتة كويس فعرفت ان الفرامل فيها مشكلة وفعلا العربية بقت بتسحف فى الفرامل اوىىىى راحت لواحد خبير تانى قال دة ملوش علاقة بالميكانيكا دة كشف كمبيوتر كشفنا كمبيوتر ملقناش فيها حاجة معرفش عمل اية من تحت العربية عند ديسكات الفرامل ولاقيت اللمبة طفت واخدت مبلغ وقدرة ومفيش يوم واللمبة اشتغلت تانى


ارجو النصيحة ى اهل الفورد مع العلم ان كل من اشتغل فى العربية دى كان بيبوظها اكتر

فى انتظار ردكم وشكرا

[party_0000]

انا رايي بيعها واخلص علشان بلدنا مش بلد فورد ابدا
وهيا فعلا شاكلها كتير انا هنا معانا مونديو 2003 برضوا لمبه ال abs منورع لحد دلوقتي
وبرودوا موال التكييف عربيات بجد ممله

[n-box]

على فكرة ى جماعة بالرغم من دا كلة العربية ماشية وشغالة تمام بس فية معظم من المشاكل دى لسة بعانى منها
وبالنسبة للبيع اظن انها لازم تتشد الاول عشان تتباع

[egytamer]

ممكن حضرتك نجرب تروح لميكانيكي كويس متخصص فورد يمكن يعرف السبب وانصحك باتنين كويسين الاول الاسطي رمضان في الحرفين والثاني الاسطي قطب وهوا معانا هنا في المنتدي ومنصحكش بالبيع ابل تصليح العيب لان دة هينزل من تمن العربية اوي

[aYaBooY]

اولا احب اقول انى بجد ليا نظريتين فى الفورد متناقضين تمام
الفورد عربية ركوبة ومريحة ومتينة
ولكن عيوب صيانتها صعبة اوى وغالية جدا جدا جدا ومش اى حد يفهم فيها

اختلف صيانتها عند حد مش عارفها صعبة جدا لازم يكون بتاع فورد بس و مشكلتها الاكبر تكاليفها

تعالو احكى لكم قصتى مع المونديو
اشتريتها وانا معب بتصميمها جدا وكانت موديل 98 1600 وكانت تمام ولكن بدات المشاكل بعد شهر بالظبط


اولها العربية كان لازم ازود لها مية كل يوم ودى حاجة انا متعودتش عليها فى اى عربية انجيكشن وفى يوم زميلى اخدها ونسى يحطلها مية والعربية ولعت منة وجابت وش سلندر

المشكلة بتاعت المياه اسبابها جوان وش السلندر او جوان انتيك المنافولد لو جوان طرمبة المياه او الطرمبة نفسها

ثانى مشلكة ان العربية من ساعت ما جبتها بحس ان عزمها ضعيف يعنى فى الطلعة بتكون ضعيفة لكن بعد الغيار الثالت بتكون سريعة يعنى عزم ضعيف بس فية سرعة

ممكن يكون طقم الدبرياج بتاعها مش تمام بس تقدر تتاكد هات سرعة عالية في طريق طويل تابع عداد لفات الموتور الار بي ام و شوفه عاليى و لا بيريح بعد شوية لو عالي و بيفضل يعلى يبقي طقم دبرياج لو بيعلي لحد ما تجمع السرعة و بعد كدة الموتور بيهدي يبقي تابع النقطة الجاية معايا

بعد المشكلة دى بشهرين العربية بقت تترجرج فى الطلوع على الغيار الاول رجرجة كاملة من اول الكبوت الى التابلوة تحس ان الموتور هيتخلع فى الطلعة
ناس قالت قاعدة فتيس - اسطوانة وديسك - قاعدة الموتور [/quote]

و المفروض تحس كمان ان الفتيس بقي فيه زي عضة و اوقات بيعاكس لحد ما ياخد الغيار
ديه مشكلة قواعد و تغيرهم امرة سهل و ممكن تكون القواعد سبب المشكلة السابقة و الحكم على القواعد قبل الفك سهل بس يفضل تركيبهم عند متخصص فورد علشان يبقي عارف بيبص فين مش بيشتكشف فين القواعد اصلا

بعدها كان عندى مشكلة فى التكيف كان بيجيب هوا سخن
واحد فنان قال ان فية ترس فى تروس الموتور اللى بيعدى عليها سير الموتور فية بوش والترس دة يخص التكيف لازم يتظبط عشان دا اساس المشكلة
ولما عملو الموضوع دا التكيف اتظبط بس الموتور بقت حالتة صعبة دا والعزم بقى اضعف دا حتى صوت الماكينة بقى اعلى من صوت الفيات 132 تخيلوا والصوت بيعلى اكتر لما بنلف العجل والعربية واقفة

طيب نشوف مشاكل المشى الاول و بعد كدة نشوف موضوع التكييف ممكن يكون طنبورة مش مظبوطة او بلية الشداد بس نظبط القواعد الاول

المشكلة الاخيرة دى بقالها 10 ايام معايا لحد دلوقتى فى يوم من الايام بدور العربية لقيت لمبة abs منورة وانا عارف ان دة نظام التحكم بمنع الانزلاق وعارف وظيفتة كويس فعرفت ان الفرامل فيها مشكلة وفعلا العربية بقت بتسحف فى الفرامل اوىىىى راحت لواحد خبير تانى قال دة ملوش علاقة بالميكانيكا دة كشف كمبيوتر كشفنا كمبيوتر ملقناش فيها حاجة معرفش عمل اية من تحت العربية عند ديسكات الفرامل ولاقيت اللمبة طفت واخدت مبلغ وقدرة ومفيش يوم واللمبة اشتغلت تانى

مشكلة الفرامل عندك انها لازم الي يشتغل حاجة فيها يظبطها على كمبيوتر بعد ما يخلص شيك على حالة التيل و الطنابير و المساتر الفرعية و الرئيسى و خد هواء و ده عمليه معقدة شوية لازم فيها جهاز و شوف لو المشكلة مستمرة يبقي ممكن المشكلة من حساسات الفرامل نفسها

ارجو النصيحة ى اهل الفورد مع العلم ان كل من اشتغل فى العربية دى كان بيبوظها اكتر

فى انتظار ردكم وشكرا
:zb_sor1[1]:

الله يعينك و لا شكر على واجب

[n-box]

شكر ا على ردودكم الجميلة ى جماعة واحب اقول ان مشكلة ال abs اتحلت لانى لاقيت حساس مفكوك من عجلة فركبتوا واشتغلت تمام
بالنسبة للميكانيكيان اللى حضراتكم قولتو عنهم ممكن ادراج عنوانهم بالتفصيل عشان انا ساكن فى الهرم ومش عايز اتوه

وجزاكم الله الف خير

[aYaBooY]

دور في موضوع اماكن الصيانة و قطع الغيار فيه عناوين ناس في العرم و عناوين لكل الناس

[ashraf2010]

افصلو ا ايها الاعضاء الكرام بين اى موديل لفورد قبل 2008 وفورد بعد 2008 عالم اخر ودنيا تانية وعربية تانية تم تعديل كل عيوب الماضى اشرف