مصطلحات الفورد؟؟

[egytamer]

السلام عليكم جميعا اخواني الفورداوية
كتير مننا بيسمع عن مصطلحات كتير في العربية ومبيعرفش شكلها او وظيفتها او سعرها ولو بيصلح العربية والميكانيكي اكتشف دة ممكن يشتغلو لو معندوش ضمير ويدبسو في فلوس كتير فياريت لو ممكن توضيح للاجزاء المهمة وسعر متوسط ليها
زي المانفول-الادلر-tps-pcv-وباقي الاجزاء
وشكرا ليكم مقدما

[egytamer]

اية يا رجال الفورد محدش متحمس لية في ناس كتير مش عارفة المعلومات دي يريت كل واحد يقول معلومة صغيرة وكلنا هنستفيد

[wkisho2005]

ههههههههههههههه والله انا متحمس جدا ياتامر بس للاسف معنديش معلومات مهمة اقولها ومستنيين الخبرا اللي مبيدخلوش بقالهم فترة مش عارف ليه

[fouad_programer]

المنافولد انتيك هو الأنابيب الأربعه الى بتكون فى وشك اول ماتفتح كبوت العربية فوق الموتور

[MAHERELTAHAWY]

الأدلر بما أنه بايظ عندي حو سنسور بيتحكم في الهوا بتاع المتور وفي البنزين وهوا الي بيخلي صوت العربيه عاليه الصبح لغايت متسخن

[egytamer]

الادلر مطلع عنينا كلنا عندي بايظ وبيخلي العربية تبطل في السلانسية لحد متسخن وصوت المتور عالي جدا كاني سايق دبابة

[reamoz]

1- المانيفولد نوعين
1- أ ) الإنتيك مانيفولد هو عبارة عن مدخل خليط البنزين والهواء لغرف الإحتراق في الموتور بيكون عامل زي المشترك فتحة واحدة من فوق ومتفرع لأربع فرد في العربيات ال 4 سلند أو ستة في الستة سليندر وهكذا بحيث إن كل فرع بيدي خليط هواء وبنزين لكل بستم

1- ب) الإكسوهست مانيفولد اللي بيقولو علي الفرن بتاع الشكمان وهو بردة عبارة عن مشترك زي اللي قبله بالظبط ولكن وظيفته هي خروج العادم من غرفة الإحتراق بعد عملية الحريق وكل غرفة بيكوت عليها فردة وبيتجمعوا كلهم في فردة واحدة اللي بتتوصل بالشكمان بعد كدة\

2- الأيدلر أو الأيدل كنترول سنسور ده عبارة عن حساس بيقيس سرعة الموتور لما تكون العربية على السلانسية يعني وإحنا مش دايسين بنزين وبيقارنها بالسرعة اللي المفروض تكون عليها حسب البيانات اللي متخزنة على الكنترول يونت بتاعة العربية وبيزود أو يقلل نسبة خليط البنزين والهواء اللي داخلين للموتور حسب الحالة علشان يفضل الموتور داير على السرعة المحددة ليه في الكنترول يونيت بتاع العربية في حالة عدم الضغط على دواسة البنزين

3- ال تي بس إس إختصار ل3 كلمات (ثروتل بوسيشن سنسور) معناهم حساس وضع الخانق والخانق ده اللي هو بيتحكم في مقدار فتحة البوابة اللي بتتحكم في كمية خليط البنزين والهواء اللي داخلة للموتور وده وظيفته باينة من إسمة هو بينقل الإشارة عن مقدار فتحة البوابة أو يعني مقدار دوسة البنزين اللي إحنا دايسنها قد إيه علشان وحدة التحكم تقد تحدد مقدار البنزين اللي المفروض ينزل من الإنجكشن ونسبة الهواء اللي تدخل معاه تكون قد إيه وكدة يعني

أما بالنسبة للأسعار فأنا مش هقدر أفيدكو فيها لأن عربيتي كاربراتير ومعنديش أي حاجة من الحاجات دي الحمد لله :)
بس أكيد في ناس هنا هتفيدكو بالأسعار إن شاء الله

[egytamer]

الاخ reamoz شكرا ليك علي المعلومات المفيدة وياريت الكل يكتب الي يعرفو علشان كلنا نستفيد

[fouad_programer]

100 /100 @ الاخ reamoz

[pingo]

السلام عليكم ورحمة الله وبركاته
انا يا جماعة معايا فورد اسكورت 1600 هتشباك كربيرتير
العربية بتسخن اوى منى بتوصل لحد l وانا ماشى و اول ما العربية بتوقف بسبها دايرة الامبير بتاع الحرارة بينزل والمروحة بتبدأ شتغل وتفصل انما طول ما انا ماشى بالعربية الامبير بيقعد يعلا منى لحد ال l
عاوز ميكانيكى كويس وعنوانه ورقم تليفونه وياريت لو حد يفدنى فى الموضوع دا معلش يا جماعة
فى حاجة تانية
فى خرطومين طالعين من حساس لازق فى الكربيرتير شيلت الخرطومين دول لغتهم يعنى ممكن حد يفدنى

[MohamedSotohy]

انا يا جماعه بحكم عملي في شركه متخصصه في مجال اجهزه اصلاح وصيانه السيارات (بما فيها الأسكنر او الكومبيوتر ) ان شاء الله هاجيب لكم معلومات كامله علي اللي انتو بتسألو عنه

[alexcdx]

اية يا رجال الفورد محدش متحمس لية في ناس كتير مش عارفة المعلومات دي يريت كل واحد يقول معلومة صغيرة وكلنا هنستفيد

حجيبلكم كل الحساسات الى قريتها و أنا بعمل سكان على الفوكس و نشرحها سوا وحده وحده
و أنا شايف أنه فى الفورد هنا ماحدش دخل فى الفنيات حتى المواضيع المثبته كلها صور وتقيم أداء وأماكن صيانه
كل ده مفيد طبعا بس ينقصكم شغل الأعطال.
ويمكن ده بسبب كثره و تنوع الموديلات فى الفورد بس فى النهايه حتلاقى كله زى بعضه من حيث عمل المتور
و أختلاف بسيط فى الحساسات الى عليه.
إنشاء الله ححضر الموضوع و أكتبه و الفايده تعم.