اخرة التأخير في التصليح عملتلي حادثة

[ahmedghreeb]

اليوم وبحمد الله دخلت في الرصيف بسبب ان الكوبلن اتكسر علي طريق التجمع الأول - زهراء مدينه نصر امام اكاديمية الشرطة
طبعا جبت ونش نقلت بيه العربية للبيت
دلوقتي محتاج عفشجي فور كويس علشان اصلح العربية بس يكون قريب من عين شمس علشان طبعا هتدبس في نقل العربية ليه بونش علشان التصليح
ولا ممكن اشوف حد عفشجي كويس عندنا وخلاص يبص عليها علشان اعرف ايه اللي هيتجاب ؟؟؟؟

[wkisho2005]

الحمد لله انها جت علي اد كدا وفداك الف عربية
وفي انتظار اللي عندهم خبرة ان شاء الله يفيدوك في اللي انت عايزه

[sniperfox]

هات حد قوريب منك يمشيها وبعد كدا خدها وروح للى انتا عوزه
ده اوفر واحسن حل
والف حمدالله على سلمتك وكويس انها جت فى العربيه مش فيك
صليلك ركعتين شكر

[ahmedghreeb]

الحمد لله علي نعمة الله علي
انا ربنا يسهل اشوف حد جنبي يوقفها بس وبعد كده ربنا يسهل

[AHMED1718]

تصدق كده فال وحش

بجد مش مصدق نفسى

اولا الحمد لله على سلامتك بس ده تقريبا تحزير ليا ولا ايه

انا مشكلتى انى دلوقتى ف مرسى علم بعربيتى والاسبوع اللى فات وانا ف الطريق كنت سمعت طقطقة كده ..فقلت جايز يكون جلب مقص ولا حاجة

بس الطقطقة زادت شوية فقلت مبدهاش بقا رفع العربية وحليت العجل اللى قدام يمين

لقيت فيه خلوص او بوش ف الكوبلن من الجهة الداخلية مش اللى نحية العجل

فدلوقتى انا مقلق من انه يفصل منى وانا مسافر ولا حاجة
وللعلم الكوبلن مش بيطقطق الطقطقة المشهورة دى بتاعة الملفات

دى طقطقة كده زى ميكون مثلا الالتيل بيخبط مش عارف اوصل صوتها ليك الزاى


ياريت تطمننى هل ده هيمشينى لغايط موصل القاهرة ولا انا وحظى ؟


فيه ميكانيكى قصدى عجلاتى وشغال ميكانيكى بيقولى احلهولك واعملك وردة واكبسلك مشواره ..... وقعد يرسم كده فهل ده هبل ولا ايه ؟

[Mzeid]

الحمد لله على سلامتك
و قدر الله و ما شاء فعل

[د.محمود صلاح]

قدر الله وما شاء فعل ما تزعلش اللي حصل حصل المهم انك بخير .. وواضح من توقيعك ان لك تجربة سيئة اخرى مع شوارع مصر المحروسة فربنا يعينك

[ahmedghreeb]

الحمد لله تم الكشف علي العربيه من خلال العفشجي ( فني العفشة ) ههههههههه
وتحديد القطع التالفة وتم الشراء من أوتو ستار 2000 في الحرفيين
1- طقم مساعد امامي الاثنين ب 600 جنيه
2- مقص يمين وحظي كان كويس ولقيت الجلب راكبه فيه ب 150 جنيه
3- دشمة يمين ب 200 جنيه ولكن هرجعها علشان العيب طلع في الطنابير بس وهجيبها يوم الاثنين جديدة
4- صباع الميزان ( تيش الميزان ) 50 جنيه

يوم الاثنين هنزل بقا اجيب جوز مساعدين خلفي وخرطوم فرامل للعجلة اليمين ( واخدين بالكوا انتوا ) وطبعا الريداتير اتكسر منه حته وحاليا انت لازقها بالأرنديد الالماني ووديت العربية للسمكري يظبطلي الخبطة اللي في الرفرف
وحاليا انا هسيبكوا وافك الوش الزجاج بتاع الفانوس وانظفهم كويس علشان اصفروا شوية من جوه وعات بيشبروا
وبالنسبة للاستاذ احمد انا اعتقد لو مشيت براحتك خالص ( يعني متعديش ال70 ولا حاجة ) ربنا هيسترها حتي لغاية ما تنزل اسكندرية وتشوف علي المنتدي حد بتاع فورد كويس هناك احسنلك

وسأتابع معكم التفاصيل فيما بعد

مراسلكم الموعود بالحوادث

[Ahmed Galal]

معلش و الحمد لله انك بخير هيا العربيات كده تقعد تحذر فى الواحد و لما ما تهتمش تعملها معاك

[aYaBooY]

الله يعينك و الحمد لله على سلامتك

[egytamer]

الف سلامة يا ريس والحمد لله انها جت في الحديد
انا كمان قلقت اوي لاني وانا بكسر الدركسيون علي الاخر يمين او شمال بسمع طقطقة وكنت مكبر لاني سمعت ان طلما الطقطقة في الكسر الدركسيون علي الاخر بس مفيش مشكلة انما المشكلة لو بتطقطق في الطالعة فكنت مكبر حوار تغير الكبالن دلوقتي.
عيزين نعرف هتركب كبالن جديدة ولا استيراد لاني سمعت ان الجديدة اي كلام والاحسن الاستيراد بس انتا عارف ان الاجزاء الميكانيكية زي الكبالن يفضل انها تكون جديدة فعيزين نعرف منك هتجيب جديد ولا استيراد وبكام واية النظام .

[ahmedghreeb]

والله بعد فحص الكبالن تم اكتشاف ان الكبلن سليم واللي حصل ان صليبة الكبلن هيا الللي فكت وعملت ده وتم شراء صليبة كبلن لعدم العثور علي القديمة
اه فيه سؤال بالمرة هو ينفع اركب عدسات في الفانوس بتاعي ولا مش ينفع علشان بفكر اركب زينون

[reamoz]

تصدق كده فال وحش

بجد مش مصدق نفسى

اولا الحمد لله على سلامتك بس ده تقريبا تحزير ليا ولا ايه

انا مشكلتى انى دلوقتى ف مرسى علم بعربيتى والاسبوع اللى فات وانا ف الطريق كنت سمعت طقطقة كده ..فقلت جايز يكون جلب مقص ولا حاجة

بس الطقطقة زادت شوية فقلت مبدهاش بقا رفع العربية وحليت العجل اللى قدام يمين

لقيت فيه خلوص او بوش ف الكوبلن من الجهة الداخلية مش اللى نحية العجل

فدلوقتى انا مقلق من انه يفصل منى وانا مسافر ولا حاجة
وللعلم الكوبلن مش بيطقطق الطقطقة المشهورة دى بتاعة الملفات

دى طقطقة كده زى ميكون مثلا الالتيل بيخبط مش عارف اوصل صوتها ليك الزاى


ياريت تطمننى هل ده هيمشينى لغايط موصل القاهرة ولا انا وحظى ؟


فيه ميكانيكى قصدى عجلاتى وشغال ميكانيكى بيقولى احلهولك واعملك وردة واكبسلك مشواره ..... وقعد يرسم كده فهل ده هبل ولا ايه ؟

باشا دي صليبة الكوبلن الداخلي ودي حتلاقيها بتعمل طقة كل فترة كدة وخصوصا مع فصلة الدبرياج ولما الموضوع يزيد هتلاقي العربية بتترج وإنت ماشي بعد ال60 كدة كأن العجل الأمامي عايز يترصص لو مفيش فرصة قدامك إنك تغيرها إمشي بيها بس متزودش عن 60 لحد ماتوصل مكان تقدر تجيب منه الصليبة وأي عفشجي يغيرهالك
انا بتكلم بثقة شوية علشان الموضوع ده لسة حاصل معايا طازة والصوت ده لما ظهر كنت هتجنن لأني لسة مغير العفشة كلها مساعدين وعلبة دركسيون وجلب مقصات
رحت للعفشجي قلتله في صوت طقة بس مش بيظهر علطوول فضل يجرب ويبص وطبعا الصوت ماظهرش معاه وإتأكد من تربيط العفشة كويس وقالي مافيهاش حاجة
بعد كام يوم الطقة إبتدت تظهر أكتر وبعدين الرجة إشتغلت فا إتأكدت إنها الصليبة ورحت جبتها وكانت بردة بتاعة الكوبلن اليمين
ولما حلينا الكوبلن لقيت بلية من التلاتة مخلوعة من مكانها
ركبنا الصليبة الجديدة وكله تمام الحمد لله
ونصيحة إشتري شحم نوع كويس يعني ماركة معروفة بلاش الحاجات اللي مالهاش مله اللي بقت مغرقة السوق في الحاجات دي

[Yousef123]

انا دة الى خايف منة فى الفورد.انا بشترى فورد اليومين دول بس الموضوع دة راعبنى والناس كلها بتقولى بلاش الفورد علشان كدة.ممكن تعطل منك وما تلاقيش حد بيفهم فيها

[LinuxMan]

السلام عليكم
طيب انا بتحل معايا طقة في الملف يبقي ايه .. ينفع اروح اقول للراجل اكشفلي علي الكبالن وهياخد كام ؟