فورد فوكس 2010 عليها خصم ::الكامله ب140 الف جنيه ليه مش منتشره واعادة بيع سىء؟؟؟

[dramir1]

فورد فوكس 2010 عليها خصم ::الكامله جنوط ومثبت سرعه ب140 الف جنيه ليه مش منتشره واعادة بيع سىء؟؟؟

ياريت نعرف ايه مميزاتها وعيوبها الفعليه
علما بان قطع غيارها في التوكيل ارخص من الهيونداي.

[MOUSTAFA_SAAD]

ممكن مايكونشى ليها عيوب بس هى سمعه وخلاصى لزقت عليها
زى اللى حصل مع رينو من غلطة الميجان 2005 ولزقت فيها من ساعتها

[dramir1]

ياريت اللي جربها وشاف منها مميزات او عيوب يقولنا
العربيه دي وزنها 1800 كج والتعليق الخلفي مالتي لنك وفرامل abs-ebd-ba يعني ثبات وامان طيب المشكله فين؟؟؟

[mahamedaraby]

احنا دوله لا ينطبق عليها اى معاير ابدا فى سوق السيارات العالمى
يعنى تلاقى موديل عربيه ناجح جدا ومكسر الدنيا بره وتلاقيه هنا فاشل وتلاقيه ماركه تانيه العكس تمام وده راجع سياسه توكيل

[MOUSTAFA_SAAD]

احنا دوله لا ينطبق عليها اى معاير ابدا فى سوق السيارات العالمى
يعنى تلاقى موديل عربيه ناجح جدا ومكسر الدنيا بره وتلاقيه هنا فاشل وتلاقيه ماركه تانيه العكس تمام وده راجع سياسه توكيل

[MOUSTAFA_SAAD]

وكمان عربيات كتيره مكسره الدنيا هنا
وهى فشلت فشل زريع فى الخارج علشان كده صعب تحكم على السوق بتاعنا وده حال دول العالم الثالث كلها ليهم اولويات تانيه بسبب الفقر

[ENG\AHMED]

عربية ممتازة , اسعار قطع غيارها معقولة جدا فى التوكيل ومش هقولك ارخص فئتها لأ ارخص من حاجات كتير اقل منها وقطع غيارها موجودة برة التوكيل يمكن اسوأ مافيها ملهاش استيراد .. دة بالنسبة لقطع الغيار

للعربية نفسها انا معايا 2006 هى هى نفس العربية بس فرق الكشافات والاكصدامات غير كدة العربية واحد
انا اللى معايا خليجى كمالياتها
1- طبعا زجاج كهربا اوتوماتيك للأربع ابواب
2- وحدات رفع وانزال للزجاج
3- تكييف
4- باور ستيرينج
5- ريموت كونترول ( فتح العربية وقفلها وفتح الشنطة)
6- ستيبترونيك
7- انذار
8- كشافات بخاصية follow me home
9- ABS , EBD , BA , TC , ESP
10- نور شبورة امامى وخلفى
11- كمبيوتر اعطال
12- dead lock
13- ايموبلايزر
14- نور الصالون thearte dimming
15- كمبيوتر رحلات لحساب استهلاك البنزين والمسافة المتبقية
16- انوار العربية بخاصية waiting
17- 2 ايرباج
18- نور العربية والصالون والكاسيت بيفصل اوتو بعد فترة علشان البطارية
19- احزمة الامان فيها pretensioners
20- فتحات تكييف للركاب الخلفيين

طبعا اللى فى الاعلان فيها اختلافات فى الاوبشنز يعنى هتلاقى حاجات زيادة زي مثبت السرعة ومالتى فانكشن واعتقد كمان فتحة سقف وبلوتوث لو دى موديل جيا
بس هتلاقى حاجات ناقصة اعتقد مفهاش انذار و ESP

مشكلة العربية سمعة فورد فى مصر الناس عندها حساسية من اسم فورد
العربية لو ركزت معاها شوية هتلاقى منتشرة طبعا مش لانسر ولا سيراتو بس العربية موجودة وفعلا التوكيل نجح انة يبدأ يرجع فورد تانى فى مصر

[dramir1]

ربنا يبارك لحضرتك في عربيتك
يعني المشكله كانت في التوكيل ....
طيب في اي حاجه فيها مشكله في العربيه ......

[dramir1]

ياريت لو تقولنا اخبار عفشتها ايه مع حضرتك في طرق مصرنا الحبيبه....هل بتحك في المطبات لو محمل ناس ورا؟؟
اخبار الثبات ايه في السرعات ؟

[mohaismail]

فورد بره عاملة ارقام جامدة جدا يعنى فورد فيستا مثلا من افضل العربيات فى اوروبا وملهاش عيوب نهائى تقريبا وكذلك فوكاس ومونديو وفى موديلات تانية كبيرة
واسعار قطع غيارها فى التوكيل رخيصة على اللى بشوفه فى الجرنان لما بتنزل اعلاناتها بس الناس فى مصر واخدة موقف من موديلات معينة
فورد-سيتروين مع انها تستاهل الصراحة بسبب توكيلها الاكتنر من سىء ولكن كعربية لا يمكن مقارنتها بغيرها -رينو ولو ان رينو وضعها اختلف كتير جدا دالوقتى مع توكيلها النشيط
فى مصر كله متجه للكورولا ولانسر وسيراتو وصنى وافيو واوبترا وهيونداى رغم ان مفيش ولا عربية فيهم افضل من السيارات السابقة كسيارة

[ENG\AHMED]

ياريت لو تقولنا اخبار عفشتها ايه مع حضرتك في طرق مصرنا الحبيبه....هل بتحك في المطبات لو محمل ناس ورا؟؟
اخبار الثبات ايه في السرعات ؟

محملتش فيها كتير ورا علشان اجرب بس العربية ارتفاعها معقول
المرة الوحيد اللى حكت منى كان مطب عالى ووراة على طول نقرة وانا مكنتش واخد بالى فالما العجل اللى اودام نزل فى النقرة حكت غير كدة لأ
عفشتها كويسة مش ناشفة بغبا ولا طرية تقعد تتنطط , محجمة العربية كويس بالرغم من وزنها , العربية ثابتة جدا
جبت بيها 180 والعربية ثابتة جدا وكمان انظمة الثبات والفرامل ليها دور وانا كمان مركب جنط 17 طبعا منشف العربية زيادة حبتين بس مزود الثبات
اعتقد العربية سرعتها مقفولة على 180 او 190 مش فاكر لأنها مبتجبش اكتر من كدة بالرغم من ان ال RPM لسة فية

من الحاجات الرخمة وتعتبر مشكلة فى الفوكاس ترس البندكس بتاع المارش بيبوظ كتير , نورها الواطى حاسة ضعيف ممكن يكون احساس بس دة امرة سهل زينون او لمبات اقوى ولكن النور العالى كويس , العربية لو البطارية مفصولة مش هتعرف تفتح الشنطة ممكن تفتح ضهر الكنبة وتدخل زحف لكن الشنطة مش هتفتح لأنها كهربة وملهاش مفتاح , طبعا من الحاجات اللى trade mark فى الفورد الكابوت بيفتح بمفتاح العربية بس ودة زيادة تأمين للعربية , العربية لو هقارنها كصاج بالفكترا باعتبار انها معايا صاجها اخف شوية بس كمقارنة بالفكترا الجديدة معرفش بس مش معنى كدة ان صاجها خفيف (ممكن تكون الفكترا هى اللى صاجها تقيل شويتين :) ) يعنى لو هتقارنها بأى عربية يابانى او كورى واعتقد كمان حاجات فى الاوروبى صاجها اتقل , طبعا مش عربية شد وجرى لأن العربية تقيلة فا طلعتها تقيلة ولكن ادائها كويس وخصوصا لو بتستخدم 95 ودة حسب توصية الكتالوج اقل اوكتان 95 ولكن ممكن تمشى 92 من بعض البنزينات النضيفة ودة حسب كلام التوكيل بس طبعا على حساب الاداء وشوية تسقيف , سمعت ناس اشتكوا من الفتيس ولكن شكاوى قليلة جدا واعتقد انها سوء استخدام وخصوصا انها مينفعش تتقطر لو فرضا حصل عطل

العربية واسعة من جوة وعريضة

فى عربيتى كاسيت شرايط ولكن لة وصلة AUX و CD CHANGER CONTROL ولكن اللى هنا بتنزل CD , الكاسيت صوتة كويس جدا , ممكن تظبطة صوتة يوطى ويعلى مع السرعة

عندى الفرامل اودام وورا سكاكين اللى بتنزل هنا اعتقد ورا طبلة

مفيش عندى مخدع يد امامى ولكن موجود فى عربيات التوكيل

تكييفها معقول كويس

العربية اول دوسة على الريموت تفتح باب السواق فقط والتانية تفتح باقى الابواب كنوع من التأمين

لو فى اى حاجة مفتوحة فى العربية هتظهرك رسالة فى التابلوة تقولك اية المفتوح بالظبط اذا كان شنطة ولا كابوت ولا باب وهتقولك انهى باب

العربية معقدة مش بتاعة اى حد يمد ايدة

الخامات والتقفيل محترم

التوكيل موجود فية كل حاجة لغاية دواسات الارضية فورد والمنظفات الاصلية بتاعة فورد وكل الاكسسوارات بتاعتها الاصلية

[dramir1]

مفيش حد معاه فوكاس 2010 يفيدنا اخبارها ايه؟؟؟

[Haitham10]

عجباني الفورد 2006 بصراحة بس مبلاقيش حد عارف حاجة عنها خالص ولا اسعارها في المستعمل فوق وتحت مفيش مقارنة فالواحد بيبقي مستعجب

[ENG\AHMED]

مفيش حد معاه فوكاس 2010 يفيدنا اخبارها ايه؟؟؟

الفوكاس من 2006 نفس العربية كل الفرق ان من اول 2009 عدلوا الواجهة الامامية ( كشافات واكصدام وشبكة ) والاكصدام الخلفى متعدل والكونصول اللى فى نص بين الكرسيين الاماميين فية تعديل بسيط (مجرد ترتيب للأماكن) ولون العدادات مختلف ومؤشرات السرعة وال rpm والمرايات الجانبية وفى خط طولى بجنب العربية بقى بارز شوية والمفتاح بقى folding
معظم الحاجات دى سهل انك تعملها فى الشكل القديم لأنها كلها حاجات ثانوية مش اساسية كلها مجرد عملية تجميل علشان يمدوها كام سنة عبال الشكل الجديد لما ينزل

والعربية كان فى منها 4 فئات كلها فروق اوبشنز (وسائل الامان واحدة فى كلة مفيش فيها فروق)
تريند مانيوال
تريند اوتو
سبورت اوتو
جيا اوتو

دلوقتى اعتقد الاسبورت والمانيوال اتشالوا


من ضمن الاوبشنز اللى نسيت اكتبها كمان
- اضاءة بدرج التابلوة
- فتحة تكييف لدرج التابلوة
- اوتو لوك لو فتحت اللوك ومفتحتش الباب بتقفل اوتوماتيك
- زجاج امامى عازل (اعتقد الامامى فقط مش متأكد من الباقى)

دول اللى فاكرهم دلقوتى وطبعا الجيا فيها حاجات اكتر بكتير

[ENG\AHMED]

عجباني الفورد 2006 بصراحة بس مبلاقيش حد عارف حاجة عنها خالص ولا اسعارها في المستعمل فوق وتحت مفيش مقارنة فالواحد بيبقي مستعجب

محدش عارف لأن محدش بيسأل كلة جسمة بيقشعر من اسم فورد ومعظم الناس ماشية على السمع والكلام وبس انما محدش جرب ولا سأل

لما تبقى عربية زى دى وب 140 الف وكاملة , شوف انت اية اللى ب 140 وانت تعرف صفقة رابحة ولا لأ