مراية يمين فورد اسكورت

[mido51eg]

مساء الخير ياشباب
يوم الخميس لما روحت البيت ببص على الفورداية وهي واقفة قدام البيت لقيت المراية اليمين مدلدلة!!!!!!!! واحد ابن تيييييييييت سند عليها وكسرها وطبعا الفاعل ابن ستين تييييييييت مجهول.
طلعت البيت واتصلت بالصيرفي ومينا بتاع جسر السويس اشوف الدنيا فيها ايه. الصيرفي قاللي انها بـ 110 جنيه صناعة تايواني (كنت عارف) لأني كنت مغيرها من سنة (اليمين برضه).
التايواني مش بطالة كشكل انما السوست بتاعتها ضعيفة يعني كل لما تتمسح لازم تظبطها تاني والأسكوب بتاعها مش زي الأصلية.
مينا قاللي انها مش عنده وانه هيبجيبها من التوكيل لأنه بيشتغل في الأصلي بس. السنة اللي فاتت كنت سألت على الأصلي وكانت تقريبا بـ 675 جنيه.
مابقاش قدامي غير الحرفيين. دخلت على المنتدى وجبت رقم تليفون اوتو ستار واتصلت بيه رد عليا عيل كتيان كده مش عارف كان نايم ولا مبلبع حاجة ، المهم قاللي انها موجودة بـ 125.
خدت العربية وروحت وطبعا مش عارف امشي لأني متعود على المراية اليمين المهم وصلت ودخلت شارع المرسيدس في الحرفيين وربنا اكرمني ولقيت حتة اركن فيها ، نزلت من العربية لقيت يافطة السكري قطع غيار فورد قدامي. سالته عليها قاللي موجودة وراني واحدة كان المثلث بتاعها مكسور مارضيتش اخدها طبعا ووراني الثانية كانت ممتازة انما كان لونها رصاصي. قولت له انا عاوزها سوداء قاللي ممكن ترشها قولت له هي عاملة كام فلوس قاللي 150 جنيه قولت له شكرا ومشيت.
سألت على اوتوستار قالوا لي في اخر الشارع وصلت عنده والحمد لله شفت العيل الكتيان اللي رد عليا في التليفون. سألته عليها قاللي موجودة بس اللي بتتضم ومش هتركب عندك علشان المثلث الداخلي بتاعها مش موجود ومش هينفع تركب على المثلث بتاعي.
سبته وروحت سألت على الفرسان (مصطفى ومدحت) طلعوا على بعد 50 متر من اوتوستار. الحقيقة شباب محترمين ، اللي كان موجود في المحل هو مدحت فرجني على كام واحدة كلهم نضاف الحقيقة وانا اخترت منهم واحدة وسالته بكام؟ قاللي بـ 120 جنيه ، انا قولت له 80 بس.
المهم فضل هو ينزل 5 جنيه وانا اطلع 5 جنيه لغاية لما وقفت بـ 100 جنيه وركبهالي كمان. فعلا فرق شاسع في الرؤية بين الأصلية وبين التايواني ولا اراكم الله مكروها في مراية لديكم.

[a4_han]

شكرا على الموضع

[meda2711]

طب هو الفرق بين الاصلى والتايوانى فى الرؤية علشان المراية نفسها اللى هو الكف ولا المراية ككل
اصل الاصليين عندى بتوع العربية اتكسروا من بره بس الكفوف والمرايات الاصلية معايا سلام ومركب حاليا تايوانى فهل بقى لو شلت الكفوف بتاعة التايوانى وركبت الاصليين هيفرقوا فى الرؤية ؟؟؟؟

[mido51eg]

طب هو الفرق بين الاصلى والتايوانى فى الرؤية علشان المراية نفسها اللى هو الكف ولا المراية ككل
اصل الاصليين عندى بتوع العربية اتكسروا من بره بس الكفوف والمرايات الاصلية معايا سلام ومركب حاليا تايوانى فهل بقى لو شلت الكفوف بتاعة التايوانى وركبت الاصليين هيفرقوا فى الرؤية ؟؟؟؟

اعتقد هيفرقوا في الرؤية فعلا لأن الأصليين الأسكوب بتاعهم اوسع يعني مدى الرؤية اكبر ، دي نقطة النقطة التانية الأصليين بيعتموا بالليل علشان العربيات اللي وراك ومنورين النور ، انما التايواني مش بيعتموا. لو فيه طريقة تنقل بيها الكفوف الأصليين للمرايات التايواني يبقى كويس.

[shekossd]

اولا تسلم على المعلومات الجامده دى بس السؤال هى المرايا بتضم واصلى ب 120 جنيه ولا ايه عشان انا مفهمتش ولو اه هو عنده اليمين والشمال ولا اليمين بس وتنفع على اسكورت 98 ولا لا وشكرا مقدما على الرد

[mido51eg]

اولا تسلم على المعلومات الجامده دى بس السؤال هى المرايا بتضم واصلى ب 120 جنيه ولا ايه عشان انا مفهمتش ولو اه هو عنده اليمين والشمال ولا اليمين بس وتنفع على اسكورت 98 ولا لا وشكرا مقدما على الرد

اللي كانت عند اوتوستار اصلي وبتتضم وانا سؤالي ليه كان على اليمين بس والحقيقة معرفش اذا كان عنده الشمال كمان ولا لأ. وهي تنفع على اسكورت 98 طبعا انما الفكرة كلها في المثلث الداخلي. لو عرفت تفصل مثلث فايبر مثلا وتركبهم يبقى هايل. لو انت بتتعامل مع حمدي فورد الميكانيكي اللي في مدينة نصر هتلاقيه مركب المرايات الضم على عربيته انما مجاش في بالي اسأله ركبهمازاي لأني مكنتش اعرف حكاية المثلث الداخلي دي.