تقرير عن فورد فوكاس 2012

[Mohamed Fawzy]

تقرير عن فورد فوكس الجديدة 2012




أولا : الشكل




الخارجي:





طبعا الشكل أولا وأخيرا مسألة أذواق انما انا شايف ان العربية شكلها الخارجي جيد جدا في نوع من الانسيابية الرياضية مع لمسة كلاسيكية في نفس الوقت يجمع بين العصرية في القسمات والزوايا كما في النيو النترا ولكن دون مبالغة مع البساطة والشياكة كما في الجيتا والاوكتافيا ولكن بطابع أكثر شبابية وكمان الفاميه في الزجاج الخلفي الجانبي والخلفي الاساسي مديها شياكة ونوع من الغموض والخصوصية (الدرجة 9/ 10)

الداخلي:






مقصورة السيارة من الداخل شبابية وعصرية جدا مع خامات معظمها من الجلد الطبيعي جيد الصنع والتقفيل



شكل الطارة شيك جدا وتوزيع أزرار التحكم فيها جيد للغاية وسهل وسلس في التعامل



سواء مع النظام الصوتي يمين التارة أو كوميوتر الرحلات يسارها وأيضا أزرار مثبت ومحدد السرعة في اليسار السفلي مع سهولة في الضغط على الكلاكس اسفل التارة يمينا ويسارا والعدادات واضحة الرؤية ومضيئة دائما مع شاشة في منتصف العدادات تعرض بيانات كومبيوتر الرحلات من استهلاك البنزين او الكيلو متر او مثبت ومحدد السرعة الخ و اعلى الشاشة يوجد بيانات نقلات الفتيس ودرجة الحرارة الخارجية



كما يوجد اعلى مشغل السي دي شاشة اخرى تبين بيانات النظام الصوتي والساعة والتاريخ وتحذيرات الامان (حزام الامان - الابواب - المفتوحة - وضع الفتيس عند تبطيل المحرك - الاضاءة - وهكذا)
أزرار التحكم في النظام الصوتي توجد اسفل شاشة المنتصف مقسمة الى صفين جانبيين على شكل افرع شجرة يفصل بينهم زر التشغيل والايقاف ومستوى الصوت كما تقوم باقي الازرار بالتنقل بين السي دي والراديو واليو اس بي وضبط مؤثرات الصوت




اماكن التخزين الداخلية جيدة تتمثل في درج التابلوه الواسع وصندوق اسفل المسند الايمن للسائق واسع ايضا



وجيوب في الابواب ودرج جانبي في اقصى يسار التابلوه اسفل فتحة التكييف





النظام الصوتي جيد للغاية مع وجود ست سماعات ويرتبط مستوى الصوت بسرعة السيارة كلما زادت زاد مستوى الصوت ويقل عند انخفاض السرعة



الصالون الداخلي متوسط المساحة ( مش واسع ومش ضيق في نفس الوقت ) قعدة السائق والراكب الجانبي مريحة جدا بس في ضيق بسيط بالنسبة لركاب الكنبة الخلفية




مساحة الشنطة معقولة جدا وفتحها وغلقها مرتبك بالسنتر لوك وممكن تتفتح من الريموت كنترول
طبعا العربية فيها وحدة رفع وانزال للزجاج وفتحة السقف عن طريق الريموت (الدرجة 9 / 10)

ثانيا: الثبات



ثبات العربية مثال يحتذى به يعني ممكن يكون مقياس نقيس عليه ثبات العربيات التانية خصوصا طبعا اني كنت راكب قبلها النترا 2007 طبعا مش هانتكلم عن الفرق مع وجود ال esp والكاوتش الكونتننتال المحترم مقاس 16-55-215 طبعا فحدث ولا حرج ( الدرجة 10 / 10)

ثالثا: الفرامل

طبعا abs , ebd استجابة ممتازة تحس انك تقدر توقف العربية في اي لحظة وعند اي سرعة وبمنتهى السلاسة والبساطة وانت مش قلقان من حاجة ( الدرجة 9/ 10)

رابعا: الموتور

موتور قوي 1600 سي سي 125 حصان مالوش صوت تقريبا وعزمه كويس على تقل العربية بس يعيبه انه مالوش غطاء من فوقه يعني تفتح الكبوت تشوف الموتور بتفاصيله بوجيهات وخراطيم واسطوانات يعني مخلي شكل مكونات الكبوت من جوه مش حلو الدرجة (8 / 10)

خامسا: الفتيس

الفتيس طبعا جديد اسمه باور شيفت شكله شيك له مجرى واحد موزع عليه 5 اوضاع ترتيبهم من اعلى الى اسفل S-D-N-R-P ال S هنا مش السبورت انما الاستب ترونيك عند وضعه على ال S يتم النقل عن طريق زرارين في جانب زراع الغتيس نفسه زائد وناقص
اما بالنسبة لأداؤه فبيدي عزم كويس وتسارع معقول انما حاسس انه بيتردد في النقلات خصوصا في الزحمة عند السرعات القليلة بحس انه بينتش يمكن اكون لسة ما اتعودتش عليه انما ده اللي انا حاسسه كمان أوضاعه قريبه من بعض ومقاومة التحريك بينهم ضعيفة يعني ممكن تبقى عايز ال N تجيب ال R أو ال D تجيب ال S والعكس (الدرجة 7 / 10)

سادسا: الباور

نقدر نقول عليه تقيل صحيح بيحسسك بالامان وان العربية مش خفيفة انما هو اتقل ما انا كنت متوقع خصوصا مع مقارنته بالالنترا طبعا شتان الفارق (الدرجة 7/ 10)

سابعا العزل

جيد جدا لو قفلت الزجاج وفتحة السقف وشغلت التكييف خلاص انت اتعزلت عن العالم الخارجي لا صوت يعلو على صوت السكون او طبعا السي دي لو مشغله (الدرجة 9 / 10)

ثامنا: العفشة

نقدر نخلصها في المقولة الشهيرة لمناديل فلورا (ناعمة وقوية وكلها حنية) العفشة تحس فيها بالنعومة الشديدة في المطبات مع القوة في نفس الوقت وبيبان الكلام ده مع عين القطة اللي على الطرق السريعة بردو وكمان العربية مع ان شكلها يبان واطي وقريب من الارض انما قوة العفشة ما بتخليهاش تحك خالص في المطبات العالية انا جربت ده في كذا مطب كنت بحك فيهم بالالنترا عموما انا شايف ان العفشة ممتازة ( الدرجة 9 / 10 )

تاسعا: التكييف

على الرغم ان في ناس كتير حذرتني من التكييف الاوروبي وان اداؤه مش ولا بد انما انا شايفه جيد يعني نقدر نقول انه في مستوى الالنترا مثلا طبعا مع وجود نظام الدويل كوول يعني ظبط درجتين حرارة مختلفتين للسائق والراكب الجانبي من خلال شاشة ديجيتال اسفل منتصف التابلوه ومفيش فتحات تكييف خلفية (الدرجة 8 / 10 )

عاشرا: الرؤيا





الرؤيا جيدة جدا مع امكانية ضبط كرسي السائق للامام وللخلف ولأعلى و لأسفل ووضوح المرايات الجانبية ومرآة التعتيم في المنتصف وسهولة ضبط المرايات الجانبية كهربائيا لتعطي افضل رؤيا اثناء السير او الركن مع وجود السنسور بارك في الاكصدام الخلفي ( الدرجة 8 / 10)

الحادي عشر: الاضاءة



الاضاءة ممتازة ومن اجمل الاشياء في العربية بمجرد ما تفتح العربية خصوصا بالليل اكتر من 12 لمبة بتنور لمبتين صغريتين في المصابيح الامامية واسفل المرايات





وثلات لمبات داخلية و لمبات خلفيتان ومع صغر هذه اللمبات انما اضاءتها قوية جدا بتفكرني باللمبات اللي في السينما وطبعا فيها فوانيس شبورة امامية ممكن تغنيك عن النور الواطي




وشبورة خلفية عشان الضباب والنور الواطي يمكن ضبط ارتفاعه وبيعطي وضوح جميل للطريق في الظلام والنور العالي كمان معقول جدا ( الدرجة 9 / 10 )



الثاني عشر: استهلاك البنزين

انا فولت مرتين لحد دلوقتي وحطيت بنزين 95 في المرتين استهلاك البنزين سيء من وجهة نظري معرفش ده عيب في العربية ولا في سواقتي مع اني مش بقرص عليها خالص عشان التليين ما بزودش عن 3000 RPM بس مش عارف المشكلة فين انا عموما هاقولهم على الكلام ده في صيانة ال 1000 لما اروح التوكيل لأن الاستهلاك حوالي 150 كم في الصفيحة يعني لكل 20 لتر (الدرجة 4 / 10)


في النهاية أحب أوضح ان طبعا التقرير ده انا عامله بعد 3 ايام سواقه بس صحيح انا عملت فيهم 400 كم عشان سافرت من القاهرة لاسكندرية انما بردو الفترة تعتبر بسيطة يعني نقدر نقول ان ده هو الانطباع الاول عن العربية انما ان شاء الله لو اكتشفت حاجة جديدة هاقولكم
ولو حد عنده سؤال عن اي تفاصيل تانية يسأل وانا اجاوبه ان شاء الله

تحياتى
محمد فوزى
خاص جدا وحصرى لنايل موتورز

[ahmad--ezzat]

ربنا يباركلك فيها
ناقص الصور

[mody3on]

الف مبروك وتقرير ممتاز
ليا تعليق عالفتيس , ال s ده وضع سبورت وهو بينقل لوحده ولكن على rpm اعلى والستيبترونيك تقدر تستخدمها في ال s وال d
استهلاك البنزين في الاول طبيعي ميكونش كويس وان شاء الله يظبط بعد كده , بس اعتقد بتستهلك اكتر من الالنترا شوية
والنتشة دي عادية في الدوال كلتش بس بيديك اداء كويس عالطريق السريع
بس اخبار التسارع ايه ؟
ارفع الصور على Imageshack.us

[mody3on]

بالنسبة للعفشة , هل شايفها انعم ولا عفشة الالنترا ؟ او الكورولا او الكروز لو كنت جربتهم في المطبات او الطرق المكسرة

[mohaismail]

الف مبروك عليك العربية الجديدة وربنا يباركلك فيها ويبعد عنك شرها

[lanos2004]

الفوكاس طول عمرها مش بتحس بالارض تحتك وكمان ثبات وهمى وتحكم خرافى --

[S O P H O S]

الف مبروك

[Mohamed Fawzy]

ربنا يبارك فيكو كلكو يا جماعة ويرزقكو باحسن منها ان شاء الله

[mody3on]

ربنا يبارك فيكو كلكو يا جماعة ويرزقكو باحسن منها ان شاء الله

مش ناوي تنزل الصور بقى ؟ :d

[Mohamed Fawzy]

مش ناوي تنزل الصور بقى ؟ :d

أولا خليني أرد عليك الاول في الاسئلة بتاعتك

بالنسبة للعفشة انت عارف طبعا ان عفشة الالنترا تعتبر من انعم العفشات انما الفورد فيها نفس النعومة تقريبا بس مع احساس بقوة العفشة وانها صعبة الانضغاط بعكس الالنترا كنت بحس فيها رغم النعومة انها ضعيفة ولو العربية محملة بتبقى مضغوطة قوي وقربت تلمس الارض وانا جربت فعلا الكرولا والكروز هي الكرولا حلوة بردو بس مش زي الفورد انما الكروز انا بشوفها ناشفة شوية وتحس برزعة المطبات فيها

اما تسارع العربية فهو جيد يعني تقدر تقول انه اقل شوية من الالنترا لحد 60 كم بعد الستين تسارعها احسن من الانترا شوية بعد ال 100 مفيش مقارنة مع الالنترا في صالح الفورد ومش عارف ليه مع ان الالنترا نفس عدد الاحصنة تقريبا واخف انما تسارع الفورد بداية من التالت يفوق الالنترا بفرق واضح

بالنسبة للصور انت قولتلي ارفعها على Imageshack.us طيب وبعدين احك الليننك يعني في المشاركة كوبي وبيست ولا أعمل ايه؟

[mody3on]

في ايقونة عليها جبل وشمس في الرد دوس عليها وحط اللينك

[Mohamed Fawzy]

على فكرة حصلي النهاردة موقف حبيت اقولكو عليه

كنت متاخر على الشغل ومستعجل شوية فقولت اجري شوية رغم ان انا ملتزم جدا بالتليين المهم ما جريتش قوي يعني جيبت 140 وانا ماشي في الشمال لقيت ميكروباص كان ماشي في النص كسر عليا فقولت اخد غرزة من يمينه واسيبه هو يكمل في الشمال واول ما طلعت منه لقيت في وشي عربية نقل ماشية في اليمين وهو كان بيفاديها وانا مش شايفها طبعا المهم العربية دي من العربيات بتاعة النضافة اللي بترش مية وراها وهي ماشية على سرعة 20 مثلا فلقيتها قدامي والميكروباص بقى على شمالي جنبي بالظبط وانا ماشي 140 والارض كلها مية من العربية النقل طبعا قولت خلاص هي دي النهاية وطبيعي فرملت على الاخر واستنين العربية بقى تعوم وتعرض في الطريق وتلبس في العربية النقل او الميكروباص

انما بفضل الله كل ده ما حصلش العربية وقفت عادي جدا كان مفيش مية وكاني ماشي على 40 مش 140 ومن غير متحدف سنتي يمين او شمال طبعا احترمت العربية جدا وقلت لو كانت الالنترا هي اللي معايا في الموقف ده رغم احترامي الشديد للالنترا كان زمان الناش قشرتني من على العربية النقل

الحمد لله قدر ولطف

[Mohamed Fawzy]

الصور بقى




































بس كده يا رب تظهر بقى

[Mohamed Fawzy]

الصور ما ظهرتش طيب نجرب كده تاني في صورة واحدة

[Mohamed Fawzy]

هايل نحط الباقي بقى