مشكله في جير فورد فوكس ٢٠١٢

[egfire]

من كام يوم كنت ماشي في امان الله و فاجئه الجير بقي بيعمل صوت غريب في النقلات العاليه كائنك جيبت غيار غلط في المانوال ولما رحت التوكيل قالي حضرتك لازم تسيب العربيه وطبعا كله ف الضمان بس جربت عربيه واحد في التوكيل لاقتها حاجه تانيه خالص واضح ان عربيتي انا بس اللي فيها حاجه غلط. اعمل ايه انا بقي.

[yehiaseg]

ازيك يا باشا وايه اخر اخبار الفورد معاك؟ اسمحلي هوه حضرتك استلمت العربيه امتي ولو تعرف ايه اخر سوفت وير نازل عندك؟! وطمنا علي العربيه!

[egfire]

لا انا لسه مش سبت العربيه ان شاء الله يوم التلات الصبح. اخر تحديث للسوفت كان يوم الاربع بس مش سائلت عنه ولا الاصدار بتاعه بس التحديث دا هوه اللي بوظ الجير خالص كل مابقف في اشاره العربيه تفضل تتنطط و يظهر transmission malfunction service now وغير كده انا حاسس ان توكيل ٦ اكتوبر مش قد كده و اللي عرفته في الاخر ان الجير عباره عن ديسك و اسطوانه. بس خير ان شاء الله.

[egfire]

هي عربيه حضرتك فيها voice command

[yehiaseg]

ايوه فيها الاوامر الصوتيه هيا بقالها معايا حوالي ٤ شهور، والحمد لله معنديش اي مشكله مع الفتيس لحد دلوقتي ، بس انا متابع موقع اسمه focusfans بيتكلموا فعلا ان احدث سوفتوير عامل مشكله علشان بيكون في فتره ال learning التجريبيه في الاول والموتور بيكون متبرجل شويه بس بعد ١٠٠٠ كيلوا بيبتدي يتحسن، ممكن تروح فرع العبور وتجيب من الاخر، بس العربيه التسارع بتعها ماشاء الله مع التكيف ، ياريت تقولنا وتشرح المشكله بتعتك بالضبط علشان نستفيد ونتابع مع حضرتك، ملاك العربيه دي قليل ودي ميزه وعيب في نفس الوقت، ياريت المهندس م. فوزي لو عنده اضافه.......

[egfire]

انا كنت مخنوق من العربيه لولا حضرتك و المهندس م.فوزي حبيبتوني فيها. بص حضرتك من الاول خالص كانت شكوتي لما بكون ماشي بسرعه و بهدي السرعه و لما ازود السرعه تاني و اعمل كيك دون كان صوت الموتور يعلي و rpm يوصل ل ٦ مثلا و العربيه مش بتتحرك و لما انزل الغيار من الزاير تمشي و لما ال rpm يوصل ل ٥ و اشيل رجلي من علي البنزين ال rpm ينزل عادي و يجي عند ٤ يوقف ثانيتين و ينزل بس صوت العربيه بيفضل عالي كائنك لسه بدوس بنزين .رحت التوكيل و شايكت علي الموضوع دا قالي هاعملك تحديث للسوفت بتاع الجير الكلام دا من ٣٠/٩/٢٠١٢ الاسبوع اللي فات حصل نفس الموقف قولت عادي تاني يوم ماشي عادي بقيت اسمع صوت غريب في النقله خصوصه ف النقله الرابعه رحت التوكيل ٢/١/٢٠١٣ و مهندس الاستقبال ركب معايا و مشي بالعربيه قالي في حاجه ف الجير ولازم تسيب العربيه هانعمل عليها ابحاث و نبعت لشركه فورد نشوف المشكله دي ايه بعد كده واحد تاني ركب العربيه و قاعد يلف بيها ف التوكيل و حدث السوفت تاني مره وهنا المصيبه حصلت ساعات العربيه مش ترجع و لما امشي بسرعه فتره طويله و اقف في اشاره يظهر علامه تعجب و تقول transmission malfunction service now لما انزل الجير للs مش بتظهر علامه الs في العداد و ستيبترونك مش بيشتغل ولما بطفي العربيه و اشيل المفتاح و اجرب تاني الانذار يختفي و ترجع عادي

[egfire]

بس في واحد صحبي معاه bmw 2008 cupe manual قالي مشكله فصلان العربيه و rpm يعلي و العربيه مش بتتحرك دا بيكون في الاسطوانه بتاعت الجير و الموضوع دا حصل معاه قبل كده بس الفرق ان عربيته مش رضيت تمشي خالص و عاندي تفصل و اسقط الغيار تمشي تاني و برضه مش مشكله استخدام عشان كان معاياه في الاول اسكودا فانتازيا وكان استخدامي ليها اوحش من الفورد. بس في الاخير انا مش بفهم في ميكانيكا العربيات خالص انا دكتور صيدلي علي قدي

[yehiaseg]

حوارك ده بالضبط حصل مع بعض الناس في المنتدي focusfans, وافتكر ان فورد غيرت لهم الاسطوانه بس كانت ناس عامله كيلوا متر معدي ال 35000 مش لسه في الاول، وبعدين هوه فعلا فتيس كويس جدا في التسارع بس محتاج شويه. ممارسه من وجهه نظري، بس انشاء الله متقلقش العربيه هترجع افضل وابقي قولنا التوكيل هيعمل ايه علشان حوارك ده مهم جدا باللنسبه للناس اللي بتفكر تشتريها

[egfire]

ان شاء الله هاودي العربيه التلات الصبح اخليهم يشتغلو فيها بس يارب استلمها في نفس اليوم

[egytamer]

ربنا معاك والحمد لله ان العربية في الضمان حتي لو في اي شيء هيتغير يكون متغطي لكن لو خليجي كانت هتبقي تقيلة اوي
ياريت تقلنا علي التطورات اول باول وان شاء الله المشكلة تتحل والعربية تبقي احسن من الاول.

[egfire]

داخلت العربيه التوكيل الصبح و اقعد يجرب حاجات فيها و برضه مش عرف المشكله فين المهم سبتها في الاخر و قالي هايتصلوا بيا لما تتصالح وكله علي الضمان و لما جيت اسئله ايه اسم السوفت الجديد قالي اسف مش اقدر اقول لحضرتك علي الحاجات دي و دي حاجات تخص الشركه و مش ينفع تطلع بره

[egfire]

الحمد لله استلمت العربيه انهارده و العربيه رجعت احسن من الاول و المهندس قال ان كان فيه حاجه غلط في البرمجه بس الحمدلله العربيه معايا بس مش راضا يقولي اي حاجه ولا رضا يطلع اي معلومه. المهم انها جوه الضمان

[lanos2004]

ماله المانيوال والدبرياج-او الاتوماتيك العادي
احنا بيتجرب فينا

[yehiaseg]

مبروووك وحمدالله بالسلامه، جربها كده كام يوم في كل الحالات وقولنا ايه رايك, وايه التوب سبيد اللي انت جبتها بالعربيه وبلاش تهور وربنا يسترها علي الكل.

[egfire]

المشكله اني عملت فيهم شكوه جامده وكانوا مخنوقين مني اوي بس مش كانوا هايخلصوها في ٢٤ ساعه لدرجه ان رئيس المهندسين كان واقف يشرف عليهم. انا بقول ابعت إيميل شكر و تقدير ليهم عشان مش يحصل ليهم مشاكل و انا مش احب الازيه لحد