عفشة الفوكاس

[TOOLA]

اخباركوا ايه يا أهل الفورد,

بقالى مدة مشغول حبتين تلاتة و مبدخلش المنتدى كتير, المهم هدخل فى الموضوع علطول.

اخر حاجة كنت قولتهالكوا انى اشتريت مساعدين كونى من سامى فخرى, و ركبتها و طلعت على الاسكندرية, و شوارع الاسكندرية طلعت متبهدلة خالص ايامها (من شهرين تقريبا), و يا عينى المساعدين اتبهدلت من اولها, المهم بعد التركيب مباشرة حسيت بنعومة فى العفشة مع العلم انى طبعا ربطت العفشة و رشينا حاجة زى ال w40 لتطرية العفشة.

بينى و بينكم حصل تحسن كبير فى الثبات ايامها, بس مع الوقت و كتر النقر الخدتها للاسف حسيت ان العفشة اخشنت تانى. و فيه حاجة مهمة باه, لما بمشى على شارع اسفلته خشن بحس بخشونة فى الطارة و كأن البارات تعبت, لكن المشكلة ن رحت ل 2 متخصصين (فرج بتاع الجراح و حمدى الفى مدينة نصر) و ال 2 قالوا ايامها ان بس المساعدين المش كويسة و باقى العفشة تمام.

انا طبعا عندى الجنط 16, و الكاوتش 205\55, و واضحان ده ليه تأثير مش ظريف و متهيالى ان سمك الكاوتش محتاج يكون على 60 على الأقل مش 55.

انا كده كده هكشف تانى, بس كنت كلمت حد معاه فورد جنط 16 و كان عندو بردو نفس العوارض, هل انا محسوك, هل ده طبيعى, يعنى هيا ديه عفشة الفوكاس؟

مفيش حد باه معاه فوكاس فى انحاء مصر الجديدة او مدينة نصر؟؟ نجرب العربيات مع بعض و نقارن.

هل من متطوع

[TOOLA]

مع العلم انى طالع الغردقة الأثنين الصبح ان شاء الله, و مفروض خلال اليومين دول هطلع على فرج أير السيور و زيت الموتور, جبت زيت جديد من سامى فخرى مخصص للفورد

Meguin oil

و بعدين مفروض اكشف على الجنوط عشان عاملالى تقريبا رجة بسيطة على سرعات عالية

[ENG\AHMED]

العفشة اصلا مش ناعمة
موضوع مقاس الكاوتش التزم باللى مكتوب فى الكتالوج
انا عندى 17 فا مش فاكر ال 16 المفروض يكون كام

[vooooo]

أنا برضه لسه مغير المساعدين الأمامى بس جبت الاصلى من عند يافا
فرقت كتير طبعآ و ثبات أحلى و فى الأول ماكنتش بحب بالطريق ولا المطبات
ده طبعآ أول لما ركبتهم لكن لما مشيت شويه و سافرت بقيت بحس بكل دبه فى العربيه يمكن برضه انا محسوك و كنت منتظر من المساعدين الأصلى يبقوا احسن من كده. بس عمومآ العفشه بتاعه العربيه ناشفه و برضه عندى الكاوتش 205/55R16 و ناوى أغيرهم ب 215/55R16 و هجيب فرده مش ناشفه علشان انا مركب البردجستون التورانزا و زباله بصراحه عايز أرميهم بس هستنى شويه

نصيحه ماتغيرش الزيت اللى عند سامى فخرى
Meguin oil
انا غيرته مره من احمد فرج و حسيت بعد كده ان صوت الموتور بقى عالى
غيرت بعد كده لفالفولين و احسن من الزين ده بكتير

[ibrahiiimooo]

بص يا سيدي
لو اللي معاك فوكس٢ يبقى مفروض مقاس الكاوتش هو ٢٠٥/١٦/٦٠ فعلا و ليس ٥٥ و بالتالي فالكاوتش عندك low profile شوية و ده ممكن يزود احساسك بنشوفية العفشة شوية
الحاجة التانية خلي العفشجي بتاعك يبص على جلب المقصات اللي قدام الجلب لو ناشفة حتعمل نفس الاحساس اللي انتا بتوصفه بالضبط

[TOOLA]

أنا برضه لسه مغير المساعدين الأمامى بس جبت الاصلى من عند يافا
فرقت كتير طبعآ و ثبات أحلى و فى الأول ماكنتش بحب بالطريق ولا المطبات
ده طبعآ أول لما ركبتهم لكن لما مشيت شويه و سافرت بقيت بحس بكل دبه فى العربيه يمكن برضه انا محسوك و كنت منتظر من المساعدين الأصلى يبقوا احسن من كده. بس عمومآ العفشه بتاعه العربيه ناشفه و برضه عندى الكاوتش 205/55r16 و ناوى أغيرهم ب 215/55r16 و هجيب فرده مش ناشفه علشان انا مركب البردجستون التورانزا و زباله بصراحه عايز أرميهم بس هستنى شويه

نصيحه ماتغيرش الزيت اللى عند سامى فخرى
meguin oil
انا غيرته مره من احمد فرج و حسيت بعد كده ان صوت الموتور بقى عالى
غيرت بعد كده لفالفولين و احسن من الزين ده بكتير

بص نفس الحصلك هوا الحصلى بزبط, الأول زبطت و بعديت رجعت نشفت تانى.

و بردوا الكاوتش العندى تورانزا و مخنوق منو بردو, نفس الاحساس يا معلم.

بالنسبة للزيت انا غيرتوا فعلن و ادينى هشوف ايه النظام.

نصيحة خليتوا النهارده ربطلى العفشة و حسيت بتحسن بسيط, و متهيالى العربية ديه بتحتاج فعلن تربيط عفشة كل مدة, و خليت فرج يسوقها (هوا عندو اختها على فكرة) و قالى هيا عفشة العربية ديه كده, فيها سنة نشوفية و قالى عفشتك تمام مفيهاش حاجة ولو فيها شغل كنت هقولك, و قالى عموما البيتعب كتير كاوتش الميزان و هوا الممكن يعمل دبدبة, بس قالى العندك سليم.

[TOOLA]

بص يا سيدي
لو اللي معاك فوكس٢ يبقى مفروض مقاس الكاوتش هو ٢٠٥/١٦/٦٠ فعلا و ليس ٥٥ و بالتالي فالكاوتش عندك low profile شوية و ده ممكن يزود احساسك بنشوفية العفشة شوية
الحاجة التانية خلي العفشجي بتاعك يبص على جلب المقصات اللي قدام الجلب لو ناشفة حتعمل نفس الاحساس اللي انتا بتوصفه بالضبط

بص بالنسبة للكاوتش, انا اتأكدت من الكارت العلى القايم, الفوكاس فى الجنط ال 16 بتبقى 205\55.

انا العاوز لو هغير فى المستقبل, اغير بمقاس 60 عشان يقلل النشوفية, بس عموما لسه قدامى مثلا بتاع سنة على الكلام ده.

بالنسبة لجلب المقصات فديه اول حاجة جت على بالى بالفعل, و طلعوا سلام, و تربيط العفشة و استعدال اللوحان الفى الجنوط زبط الدنيا شوية.

و خلوا بالكوا يا جماعة من موضوع الجنوط ده, من كتر النقر و الحفر بتحس ان فى خشونة فى الجنوط و رجه فى الطارة خصوصا على سرعات عالية, 140 و 160, و ساعتها مفروض الجنوط تتحط عند متخصص استعدال جنوط عشان يضبطها, عموما انا عاملت الموضوع ده النهارده و رسست الكاوتش و هبقى اجربها اليومين الجايين و اقلوكوا النتيجة, و لو تمام هبقى اقولكوا على تفاصيل الراجل بتاع استعدال الجنوط, و ده فى الحرفيين و مزته انه بيزبطها على البارد من غير تسخين على اجهزة الخراطة.

[samyyousef]

طول عمري اسمع ان الفوكاس عفشتها الخلفية مالتي لينك و انها من انعم العربيات...انا مستغرب جدا !!

[ENG\AHMED]

جرب اغسل الشاسية