تقيم فورد فوكاس 2014

[محمود عاد]

لو سمحتوا يا جماعة , انا حاليا بفكر اشترب عربية جديدة , فيالاول كنت بفكر في الرينو فلوانس الفئة التانية اتوماتيك و الاوبل استرا .
بس دلوقتي و بعض التخفيضات اللي نزلت علي الفورد فوكاس الجديدة فبافكر في الفور فوكاس الترند بلس 2014 خصوصا انها الماني ... فياريت تقولولي ايه رايكم فيها و في توكيلها و هلي فيها عيوب معروفة خصوصا اني سمعت اني فيها مشكلة فتيس .

و لكم جزيل الشكر

[mostafa magdy]

توكيلها السئ سبب عدم إنتشارها .. إنما هي عربيه روعه

[محمود عاد]

طب يا تري اخبار وكيلها الجديد ايه ؟؟!! , حد اتعامل معاه ؟؟!!

[mr_green]

قد إيه التخفيضات إللى نزلت عليها ؟؟

[vooooo]

امتى نزلوا عليها تخفيضات؟
عمومآ الفوكس عربيه تحفه و انا مجربها طبعآ
الأوبل استرا عربيه أكيد ممتازه بس للأسف ماجربتهاش
مانصحش بالفلوانس لو بتقارنها بالفوكاس و الأسترا

[eng wael]

سعرها كام
وبعدين حضرتك متأكد من معلومه انها المانى

[K.Ossama]

سعرها كام
وبعدين حضرتك متأكد من معلومه انها المانى

الفوكاس والفييستا حالياً بيتجمعوا فى ألمانيا فعلاً

[eng wael]

الفوكاس والفييستا حالياً بيتجمعوا فى ألمانيا فعلاً

تسلم على الافاده بس الكلام ده فى موديلات 2014

[Moathe]

ربنا يوفقك للخير ان اشترتيت العربية فور فوكاس تياتينوم من شهر مارس وممتازة وفعلا 100% الماني بس بالاول ماكنتش مرتاحلها عشان السحب والكلام ده الان بقالها 3 شهور وعامله 3500 كيلو العربيه تحس انها فاقت وبقت زي الفل الامانه العيب اللي مضايقني منها انها ضيقه من الخلف يعنى مش لاسره كبيرة والملاحظة كمان انها من غير تكييف خلفي. سيارتي موديل 2013 واخدت التيتانيوم فى عرض تبع شركة مباشرة اللي هيه الوكيل الان اوتو جميل كان العائد 2.7% سنويا على ثلاث سنوات استخير وربنا يهيئ لك الخير إن شاء الله

[Mohammad mosta]

الف مبروك ياباشا على العربيه هو ياريت حضرتك تفيدنا اخبار التكييف في الحر الجامد اليومين اللي فاتوا

[M.Elwan]

التوكيل الجديد حسب ما سالتهم بيوقلو ان كل الموديلات الجديدة نازلة ب esp و الكاسيت ford sync touch كتجهيز اساسى فى كل الموديلات

[Moathe]

ألتكييف ممتاز والحمد لله بس فيه مشكلة تصميم ان فتحه التهويه اللى امام السائق اغلب الهواء بتاعها بيخبط فى عجله القيادة مش مباشرة دي ملحوظة وكانت موجودة فى السيراتو برضه بس بصورة عامة التكييف جيد العيب الحقيقي عدم وجود تكلييف خلفي

[Mohammad mosta]

انا شاكر لحضرتك على الرد بس كنت عاوز بس أتأكد من التكييف هل تلاجه ولامش آوي لآني بتعب من اي شويه حر وأخبار الفتيس في الموديل الجديد هل لسه فيه نفس الملاحظات القديمة وآسف على الاطاله

[mohamed_rhem]

العربية محترمة ما شاء الله عليها

وتوكيلها عامل عليها عروض حلوه

اخويا كان حاجز واحده من عندهم يدفع النص ويقسط النص علي 3 سنين بفائدة 2.9

بس البنك اللي فلوسه فيه طلب 2700 جنيه في السنة الاولي مصاريف علشان يديله خطاب ضمان

اللي هما اصلا هيحجزه فلوسه وطبعا مفيش فوائد لان الحساب جاري

والموضوع اتلغي

بس العربية تقيمي ليها تحفة ما شاء الله عليها

الماني تصنيع وخامات (التويوتا مش تقفيل ياباني)
قطع غيار معقولة مقارنة بالسيراتو والتويوتا
ارتفاع عن الارض 17.6 سم
محرك 1600 سي سي 125 حصان
ضمان 8 سنوات ضد الصدأ مناسبة جدا للمناطق الساحلية زي اسكندرية

وانتريور رائع وخامات ممتازة عكس التويوتا والسيراتو

عيوبها في رأيي

الضمان سنتين بس

الكنبة الخلفية ضيقه

مفيش تكييف خلفي

مفيش زينون فقط لمبة h4 في كل الفئات حتي التايتنيوم وطبعا مفيش اضاءة نهارية

مفيش سمارت كي ولا موضوع السيارة تركن نفسها زي التويوتا والسيراتو

هو مش فارق مع اخويا بس دلع برضه

وفي النهاية العربية تستاهل فعلا والتوكيل بيراهن عليها انها هتحقق مبيعات عالية الفترة اللي جايه

لان فكري جروب كان موقعها

واخيرا استخير ربنا

تحياتي من قسم الديهاتسو

طبعا اعادة سعر البيع علي المدي القصير مش في صالحها خالص

مفيش غطاء للمحرك اعلي غطاء التاكيهات

[Moathe]

أستاذ محمد كل ملاحظاتك تمام وفى محلها وانا معايا ومشكلة الكنبه ضيقه وحشه جدا وفعلا غطا الموتور مش موجود دى عفانه وكيل اكيد كالعادة