سعر شورت بلوك اسكوت 1300 ضرورى

[sa3dmohamed80]

السلام عليكم ورحمة الله وبركاته
انا عربيتى اسكورت 1300 موديل 1998 بقلها معايا حوالى 3سنين
العربية بتاكل زيت كتير بنزل الزيت لما بغير الزيت كل 2000كيلو حوالى 2لتر فقط
وكمان صوت العربية عالى جدا مش عارف من الماتور ولا من الفتيس ولا من الكاتينة الجنزير انا كنت وديتها لميكانيكى عندنا فى الاسكندرية فى الحرفيين متخصص فورد اسمه اسلام وقالى الماتور عايز عمرة عشان فى دخانه بيضة بتطلع من فتحة اضافة الزيت بقلها حوالى سنتين بتطلع الدخنة دى بس الجكمان مبيطلعش دخانه خالص لغاية دلوقتى وعلى فكرة العربية كسحب ممتازة جدا ومن اول لمسه للدواسه
عايز اعرف سعر الماتور 1300 عامل كام بلوك بس عشان باقى الماتور عندى حلتها تعتبر كويسة واجيبه منين ولو حد يعرف مكان موثوق فية اشترى منه البلوك يبقى شاكرا افضاله
فى كمان سؤال الفتيس بياخد كام لتر وايه نوع الزيت اللى المفروض يتحطلها عشان الميكانيكى قالى حط زيت ماتور فى الفتيس بس يستحسن احادى الدرجة.
معلش يا جماعه طولت عليكم بس كنت عايز حل للموضوع دة وشكرا

[mido51eg]

الفورد ال 1300 بتاخد 3.25 زيت بدون تغيير الفلتر
و 3.5 كيلو زيت لو غيرت الفلتر
الفتيس ليه زيت مخصوص درجة لزوجته عالية ، ماتسمعش تهجيص الميكانيكية اللي بيقولوا حط زيت موتور للفتيس ، هتبقى درجة لزوجته اقل طبعا من زيت الفتيس هيخلي الفتيس في ايدك زي الميه لكن هيسرع بتدمير تروس الفتيس ، الميكانيكي اللي يفتي فتوى زي دي يبقى حمار حصاوي بدون كلام.

[sa3dmohamed80]

شكرا ليك يا ميدو باشا على الاهتمام وكنت عايز اعرف اجيب منين زيت الفتيس بتاع العربية ودرجة لزوجته كام بالظبط والنوع اية
وبالنسبة لبلوك الماتور عندك فكرة اجيبه من عند مين
معلش يا باشا ان اتقلت عليك شوية وياريت الفردوية كمان يشاركه معانا

[mido51eg]

بص ياسيدي ، عايز اوضحلك حاجة مهمة بخصوص الزيوت
الزيت الخام بيتم استخراجه عن طريق مصر للبترول والتعاون للبترول والإضافات اللي بتغير خواص الزيوت زي درجة اللزوجة ومدى الاعتمادية كلها بتيجي من فرنسا تحديدا وبيتم خلط الاضافات في مصر للبترول والتعاون
وجميع الشركات (موبيل ، امارات مصر ، توتال .... الخ) بيروحوا يعبوا الجراكن في مصر للبترول والتعاون
اللي عايز اقوله ان الزيوت جميعا مصدرها واحد وخواصها واحدة وبالتالي اللي انت بشتوفه ده والتفاوت الرهيب في اسعار الزيوت بين الشركات وبعضها ما هو الا ضحك على الدقون وشغل دعاية وخلاص
انا شخصيا بحط زيت مصر 7500 ممتاز وزي الفل ودرجة لزوجته عاليه وبيهدى صوت الموتور وب 64 جنيه بس
دايما لما تغير الزيت يبقى في محطة البنزين ، ماتغيرش الزيت في محلات الزيوت اللي مالية الشوارع لأن الزيت ده مستعمل وتمت تنقيته ومعاد تعبئته يعني خواصه اتغيرت بالكامل .... بكرر تاني الزيت تغيره في البنزينة وطبعا هتلاقي عندهم زيت فتيس من نفس انتاجهم

بالنسبة لبلوك الموتور انا معرفش عندك مين بيبيعوا قطع غيار استيراد في اسكندرية لكن ممكن ترجع لدليل الصيانة وقطع الغيار في الموضوعات المثبتة في القسم ، لكن لو عايز تعرف مين بيبيع الحاجات دي في القاهرة ممكن اساعدك طبعا.

[sa3dmohamed80]

شكرا على سرعة الرد يا ميدو باشا انا عرفت ان فى واحد فى الوكالة اسمه مصطفى البطاح بيقوله انه امين فى البيع ومهاود فى الاسعار يعنى ممكن بلوك الماتور عنده يعمل حوالى 2800 جنيه.
هل كدة السعر دة يعتبر كويس لو حالة البلوك كويسة؟؟؟

[mido51eg]

انا عارف مصطفى بطاح واتعاملت معاه ، هو فعلا امين ومهاود لكن برضه لازم يكون معاك حد بيفهم في المواتير وانت بتشتري لأنك مش من القاهرة يعني لو الموتور طلع فيه حاجة هترجع تاني من اسكندرية يااما تشتري منه الموتور وتركبه عند ميكانيكي فورد في القاهرة وتقيس كبسه وتتأكد انه سليم وبعدين تسافر
ده رقم تليفون مصطفى بطاح :
01222844964
01090669063

[sa3dmohamed80]

شكرا ليك يا ميدو باشا على المعلومات دى وان شاء الله حروح القاهرة لمصطفى البطاح بعد العيد اشوف عنده بلوك يكون حالتة كويسة وربنا ان شاء الله يدلنى على الصح

[mido51eg]

وياريت تخليني معاك في الصورة علشان ابقى متابع معاك ولو احتجتني معاك عند مصطفى او اوصلك للميكانيكي اللي بتعامل معاه علشان التسقيط مفيش مشكلة ان شاء الله.

[sa3dmohamed80]

وياريت تخليني معاك في الصورة علشان ابقى متابع معاك ولو احتجتني معاك عند مصطفى او اوصلك للميكانيكي اللي بتعامل معاه علشان التسقيط مفيش مشكلة ان شاء الله.

شكرا جدا جدا يا باشا
وانا حتابع معاك قبل ما أروح القاهرة ان شاء الله
عشان لو وقتك يسمح تروح معايا عند البطاح
وشكرا مره تانية