فورد فوكاس من 2007 الي 2009 ارجو الرد سريعا

[eng_amg]

بالنسبة للفوكاس موديلات 2007:2009

أخي يريد شراء فوكاس ولا نعرف شيئ عنها.

انا شايف ان الموديلات دي أدائها رائع. ورفاهية عالية وشكل شيك خصوصا من الداخل بالنسبة للفئات المنافسة.

السؤال الاول: ليه ثمن إعادة البيع منخفض بالنسبة لسعر الجديد إذا ما قورنت بهيونداي أو ميتسوبيشي مثلا؟

السؤال الثاني: ياريت بعض ملاكها يقول نبذة عن أسعار قطع الغيار للموديلات دي وهل يصعب صيانتها خارج التوكيل؟

وشكرا.

[kiroo85]

كل سنة وانت طيب يا بشمهندس,

بالنسبة للسؤال الاول: عايز اقول لحضرتك ان الفورد فوكاس من العربيات المظلومة في السوق وسعر اعادة البيع منخفض نظرا لان الناس بتخاف من الاسم لانه اسم كبير وكمان امريكي وللأسف مش واخد انتشار كبير زي اي عربية من العربيات اللي مرطرطة في السوق امثال الكيا والهيونداي والفولكس والسكودا ولخوف الناس منها ومن تفاصيلها فمفيش اقبال كبير عليها.

بالنسبة للسؤال التاني: لا يصعب صيانتها خارج التوكيل في حال العثور علي مركز صيانة محترم (موجود بالفعل) وبالنسبة لقطع الغيار متواجدة في التوفيقية جديد وفي الحرفيين والوكالة استيراد ولكن ليست بمثل انتشار العربيات المذكورة سابقا
ومثال لقطع الغيار مثلا طلمبة المياه عاملة من 500-600 الماني وطقم السيرفس الاصلي حوالي 1600 (سر كاتينة وبلي شداد وسير ادارة وبكر) .. كباس تكييف 1800 جنيه .. تابلوه استيراد 10000 لوجود 2 ايرباج به.

وبالنسبة للعربية فيها وسائل امان عالية من ايرباج واي بي اس واي بي دي (حسب الفئة) .. بالنسبة للصالون الداخلي انيق وعصري ولكن ليس بالوسع المطلوب مثل الكيا او الانسر ويرجع الي وسائل الامان وحجم التابلوه .. مساحة تخزين الشنطة معقولة .. الثبات عالي علي السرعات وتسارع السيارة جيد بالنسبة لحجمها.

تمنياتي بالتوفيق في الاختيار لأن العربيات المستعملة حالات ممكن تجيب واحدة تشقيك وراها وممكن تجيب واحدة تدعي لصاحبها بسببها.

[amr011111]

الفورد فوكاس صناعة المانى ولو ناوى عليها يبقى اكشف فى التوكيل وهى عربيه رائعه

[eng_amg]

الف شكر علي الردود ..
طيب بالنسبة لأسعار قطع الغيار الاستهلاكية مثل تيل الفرامل. الطنابير. المساعدين. الفوانيس. الفلاتر وخصوصا فلتر البنزين. وهكذا.
لاني من الأسعار الي حضرتك ذكرتها شايف انها زي أسعار اللانسر ويمكن أقل.

[kiroo85]

الف شكر علي الردود ..
طيب بالنسبة لأسعار قطع الغيار الاستهلاكية مثل تيل الفرامل. الطنابير. المساعدين. الفوانيس. الفلاتر وخصوصا فلتر البنزين. وهكذا.
لاني من الأسعار الي حضرتك ذكرتها شايف انها زي أسعار اللانسر ويمكن أقل.

تيل فرامل امامي 350 وطنابير امامي 700 للجوز وفوانيس امامي 500 جنيه للواحد ومساعدين من 1400 - 1800 للجوز وكل قطع الغيار دي ما بين الماني وايطالي وتركي وبالنسبة لفلتر البنزين بييجي مع الطلمبة وسعرها تركي حوالي 300 جنيه والماني تقريبا 550 جنيه

ملحوظة مفيش حاجة من قطع الغيار المذكورة صناعة فورد لأنك لو دورت علي فورد الاصلي عليك وعلي التوكيل وهديك مثال لحاجة انا جبتها من التوفيقية جوز رلمان بلي عجل امامي الماني او ايطالي ب 750 الواحدة وكانت الفورد الاصلي ب 1100 جنيه الواحدة.

وبالتوفيق ان شاء الله

[eng_amg]

الف شكر علي المعلومات .
سؤال اخير بعد اذنكم.
* معدل استهلاك البنزين.
* معدل التسارع.
* الوسع الداخلي للصالون اذا ما قورنت بلانسر مثلا.

[Maghraby1987]

https://www.facebook.com/groups/656288324402683/

[osha966]

فوكس

العربية محترمة وموفرة فى البنزين لكن قطع غيارها غالية الاصلى طبعا مش التركى والمضروب