سؤال عن الFord Taurus

[vooooo]

كنت عايز اعرف شويه معلومات عن ال Ford taurus
لأنى فكرت اشتريها و ابعد عن الفولفو شويه
اللى اعرفه انها 3000 cc
6 سلندر أعتقد انها جر خلفى و الله اعلم

بس عايز أعرف اسعار المستعمل ايه و استهلاكها للبنزين و قطع الغيار و التوكيل
و هل تنفه تتصلح خارج التوكيل و هكذا

العربيه عاجبانى من فتره لأنى من محبى السيارات الكبيره

[vooooo]

ايه يا شباب
محدش عنده معلومات عن العربيه دى؟

سؤال صعب ولا ايه؟

[hazem_khidr]

هو السؤال مش صعب.
خد عندك يا سيدي :
فورد تورس الاخت الشقيقه لميركوري سايبل لكن ميركوري هي الفرع الفخم لشركه فورد(مثال تويوتا و لكزس )
موتور 6 سلندر علي شكل حرف 3000V سي سي 24 صباب :| بقوه 200 حصان(يعني مزرعه خيول مش اسطبل كمان :) )
السياره جر امااااااااااااااامي مش خلفي
عربيه تصنف ضمن السيارات الكبيره امثال البي ام الفئه الخامسه و المرسيدس فئه E
ظهرت عام 1985 و تم تعديلها عام 95
ما انصحكش علشان زي ما بيقولو حتقوم من نقره تقع في دحديره .قطع غيارها نادره و ان وجدت حتلاقيها غاليه نار (ما تنساش انها امريكي مش اوربي) و كمان الفولفو ممكن تلاقي حد بيفهم فيها دي ليها صنايعيه محدودين و طبعا اسعارهم نار

[vooooo]

شكرآ يا حازم
ربنا يكرمك . كلامك مقنع
و خلينى فى اللى اعرفه بس للأسف لقيت أسعار الفولفو المستعمل بتزيد قوى قوى

شكرآ مره تانيه يا حازم

[hazem_khidr]

و ليه عاوز تنزل برضه من فولفو تجيب فولفو تاني!!!!!!!!!
ممكن تركب عربيه في نفس المستوي و برضه كبيره و تستحمل و حتلاقي قطع غيارها علي طول جديد و استعمال.؟
عارف هيا ايه؟؟؟
مرسيدس التمساحه مثلا موديل من 77 لحد 84 عربيه جميله جدا و ركوبها روعه و اسعارها حتلاقيها معقوله و كفايه بس انك راكب جواها و مرتاح و نجمه مرسيدي باينه في وسط الكابود :lol: احساس وهمي بصراحه.
ولو معاك فلوس ازيد هاتلك زلموكه و برضه حتعيش في عربيه كبيره زي ما انت عاوز.

[vooooo]

انت محسسنى انى بنزل من كارو و بركب كارو تانى :P
طيب ماهو فيه كارو احدث شويه

بص يا سيدى الفاضل
فيه 3 انواع عربيات مابحبهومش
المردسيدس و البيجو و الفيات
طبعآ هتسأل السبب
اسعار العربيات دى فى المستعمل خرافيه و مش عارف ليه
مش ده موضوعنا
يهمنى ان تكون العربيه مش منتشره و كبيره و موتور جامد و هكذا
مايهمنيش الأوبشن قوى قد مايهمنى الموتور و العفشه و الثبات

على فكره انا فكرت فى فورد مونديو برضه
بس ليه صديق اشترى مونديو موديل 99 تقريبآ و ب 53000 عامله 250000
و عايز يجيبلها موتور استيراد
غير انى بسمع ان عربيات موديلات اواخر التسعينات و موتورها بيفوت و كده
مش بتستحمل يعنى

[hazem_khidr]

لا كارو ولا حاجه انا مش قصدي طبعا اوعي تكون زعلت.
الفولفو عربيه محترمه اوي لكن مش منتشره و تغلبك في التصليح و قطع الغيار.
اسعار المرسيدس و الفيات و البيجو غاليه علشان ليها سوق و قطع غيارها متوفره و فيه ناس بيفهمو في تصليحها و دا سر اللي مخليها غاليه.
يعني هيا معادله:
تركب عربيه جميله و رخيصه لكن تدوخك في قطع الغيار و التصليح و باسعار وهميه
ولا تركب عربيه نفس الفئه جميله و غاليه برضه لكن قطع غيارها موجوده و اسعارها مناسبه و اي حد يصلحهالك و تبقي زي الفل؟؟؟؟؟؟

[vooooo]

تركب عربيه جميله و رخيصه لكن تدوخك في قطع الغيار و التصليح و باسعار وهميه
ولا تركب عربيه نفس الفئه جميله و غاليه برضه لكن قطع غيارها موجوده و اسعارها مناسبه و اي حد يصلحهالك و تبقي زي الفل؟؟؟؟؟؟

طبعآ عربيه جميله و محترمه و جامده و اسعار قطع الغيار غاليه
قطع غيار الفولفو غاليه فعلآ بس معمره جدآ
هى فعلآ مش اى حد يفهم فيها بس خلاص عرفت ايه مشاكل العربيه و اجيب قطع الغيار من فين و كده يعنى

لا كارو ولا حاجه انا مش قصدي طبعا اوعي تكون زعلت

طبعآ مش زعلان