عايز اوبل بس تكون نضيفة جدا

[ahmedmaklad]

يا جماعه انا قررت اجيب اوبل نضيفة اوي يا جماعة يعني تكون حالتها درجة اولي لو حد يعرف حاجة كويسة يا ريت يقولي و شكرا ليكوا جدا

[Ahmad Allawy]

بس يا باشا انتت محددتش اوبل ايه بالظبط..؟؟
كورسا..
استرا
ولا حتي فيكترا..
ممكن حتي لو انت مش محدد موديل..
قوبنا عايز تدفع لحد كام..
واكيد هتلاقينا كلنا في خدمتك و تحت امرك..

[ahmedmaklad]

سوري يا جماعة

انا عايز اوبل فكترا من 97 - 2000 و يا ريت 99 او 2000 بس تكون حالتها حلوة مش عارف انا بحب الفكترا انتوا اية رايكو

[Ahmad Allawy]

شوف يا باشا..
انا هاقول لحضرتك المعلومات اللي اعرفها عن الفيكترا..
علي فكرة انا معابا كورسا هاتش باك 1200
نعلوماتي عن الفيكترا محدودة شوية..
المهم هاقولك علي موديلات الفيكترا و رينجات اسعارها.. انا هاتكلم عن الشكل الجديد.. ماعرفش عن الشكل القيدم حاجة بصراحة..
ال 1600 مانيوال.. سعرها من 60 لحد 65 الف حسب حالتها و
غالبا اللي فيها هيكون الاتي:
زجاج كهربا امامي فقط.. مرايات كهربا.. سنتر.. اكيد باور و تكييف
في منها اوتو تقريبا سعرها في حدود 70 الي 75 الف..
وبعدين نيجي بقي للكبير.. 2000 سي سي..
وتقريبا في منها 2 موديل.. و كلها بتبقي اوتوماتيك تقريبا..
واحد فيهم سعرها بيبقي لحد 80 الف..او 85 كمان.,.
وفقي بقي السي دي اكس.. وغالبا الموديل ده قوي جدا و الناس بتتكلم عنه كتير..
ودي اشد عربية في الفيكترا.. و سعرها ممكن يعدي ال85 الف بشوية..
معلومة.. الاسعار دي مش دقيقة قوي.. واللي قالهالي المهندس اللي باعمل عربيتي عنده..

هي عموما قطع غيارها تعتبر غالية شوية.. مقارنة بالكورسا زي بتاعتي..
ودي تعتبر ارخص قطع غيار اوبل عموما..
وانت بقي حسب فلوسك..
معاك كام دلوقتي.. و هتقدر تصرف علي انهي موديل عشان قطع الغيار..
فكر و فكر معانا بصوت عالي..

[ahmedmaklad]

حوالي 65000

انا معايا حوالي 65000 و زي ما قلت انا كنت بفكر في فكترا 99 او 2000 انا شايف ان الموديلات دي احسن من اي حاجة جديدة زي الافيو او النوبيرا عشان عايز اجيب حاجة نضيفة اوي عشان ما ارجعش اندم علي الزيرو

[Ahmad Allawy]

للأسف 65 مش هيجيبوا غير 1600 مانيوال
و بيتهيألي انت تستني شوية تحوش شوية كمان..
وكل ما تعلي شوية بالمبلغ..
كل ما تكون فرصة انك تجيب عربية حالتها احسن..
ومتصرفش عليها كتير..

[ahmedmaklad]

ال 1600 حلوة

انا شايف ال 1600 حلوة بردو مش وحشة يعني احسن من الجديد هو طبعا ال 2000 احلي بكتير بس المهم عندي حالة العربية

[Ahmad Allawy]

والله يابو حميد..
اسعار البنزين الحالية و اللي احتمال كبير انها تزيد.. تخلي الواحد يفكر في حاجة اقل كمان من 1600.. يعني ال2000 اكيد احسن بكتير جدا جدا.. لكن بنزين اكتر بكتييييير.. و مصاريف جامدة
ولو انت عاجباك دي.. يبقي برضه تحاول تستني شوية بحيث انك تعلي عن ال70..
وكده تجيب حاجة نضيفة فعلا 1600 مانيوال.. هتبقي نضيفة مزاج يعني.. مش من برة بس..
بس بيني وبينك.. اي عربية هتجيبها لازم تعمل فيها شغل..
يعني ابسط حاجة طقم سيرفيس.. سيور و زيوت و تيل و مية ردياتير و الحاجات دي..
هتصرف معاك في حدود 1000 جنيه.. ان مكانش اكتر من الفيكترا..
وده لو نضيفة.. يعني من غير ما تعمل فيها اي حاجة..
غير الحاجات العادية بقي.. يعني عفشة تتظبط.. بلية عجل.. مساعدين.. كاوتش.. كل دي حاجات بتصرف..

[ahmedmaklad]

عشان كدة انا هنا

عشان الاقي حاجة نضيفة يعني تكون مرفوعه او استعمال خفيف انا كان في واحد النهاردة معاه فكترا 96 1600cc و مرفوعة و عاملة 90000 كم بيقوا 70 الف انا لسة بفكر و بشوف

[Ahmad Allawy]

والله الكيلو متر مش مقياس..
يعني ممكن يكون 90 الف بس هلك العربية..
التوكيل و كفاءة الموتور هو اللي هيحكم صح..
كشف شامل في التوكيل.. هيكلفك 200 جنيه علي ما اعتقد..وهتعرف كل صغيرة و كبيرة عن العربية..
وبعدين في هنا معانا 2 كم عمالقة الفيكترا.. وليد بك عبد العزيز.. و محمد مختار باشا..
ناس خبرتها في العربيات دي.. و خدومة لأقصي درجة و ذوق و ادب ميتخيروش عن سعاتك..
اكيد لو اخدت رأيهم هيفيدوك اكتر مني..
ولو حبيت انا تحت امرك اخدك بالعربية دي لمركز الصيانة اللي انا باتعامل معاه في المعادي الجديدة.. يشوفهالك بس اكيد مش هيكون زي التوكيل..
وربنا يكرمك و يوفقك ان شاء الله..

[ahmedmaklad]

طب هما فين؟؟؟؟؟؟

يا باشا شكرا ربنا يخليك انا عارف ان الناس اللي هنا كلها ناس كويسة و خدومة بس يمكن مطنشني شوية :) بس عادي انا مش مستعجل (يعني مش اوي) انا المهم ان ربنا يوفقني في حاجة كويسة و من ناس كويسة عشان كدة بجد انا جيت هنا عشان حسيت الناس كلها هنا كويسة

[Ahmad Allawy]

لا والله ابدا..
محدش مطنش ولا حاجة..
بس انت عارف بقي النهاردة الخميس.. هتلاقي النانس بتخرج و تسهر برة..
او انا متأكد ان بكرة قبل صلاة العصلا هتلاقي بدل الرد 10 من الناس الجمدة بتوع الفيكترا اللي حدانا ف المنتدي هنا.. و هتتبسط من كلامهم..
انا عارف انك اكيد مستعجل.. و نفسك تخلص بقي و تركب عربية كويسة.. (عارف و مجرب والله.. بس الحمد لله ربنا اكرمني و لم انتظر كتير..)
هو فعلا ما شاء الله الناس هنا في المنتدي في منتهي الذوق و الادب و التعاون و الود.. و الحمد لله اني اتعلمت حاجات كتير قوي هنا.. واستفدت حاجات كتير قوي عملة و حتي علي المستوي الشخصي منن المنتدي هنا..
ربنا يكرمهم جميعا.. و يوفقك للخير ان شاء الله..

[farahat]

بص يا أحمد باشا ، بالنسبة للفيكترا ، العربية دي ابتدت في مصر من 94 و كنت فيكترا A ، اللي هي احنا بنقول عليها الشكل القديم ، و دي موجودة لحد 96
و في منها 1600 و 2000 , و دي مكنتش بتتجمع في مصر خالص

من اواخر 96 ابتدى الشكل الجديد اللي هو فيكترا B ، و د اللي كان بيتجمع في مصر عند منصور (لو تفتكر إعلانات Clark بتاع the bold and the beautiful لم كان بيأل بحب منصور أبل :) ) ،
المهم .. الشكل دة نزل من 1600 و 2000 , ال-1600 في منها مانوال و أوتوماتيك لكن ال-2000 أوتوماتيك بس ، و فضل الشكل دة لحد 99 , و هو دة الموديل اللي بين 63 و 65 ألف (لل-1600 مانوال وال 2000 بتزيد من 3 لحد 5 الأف ) ،

و بعدين من أول سنة 2000 عملو تعديل شوية في الشكل بس، يعني غيرو شكل الفوانيس ورا و قدام والإكصدام بقى حتة واحدة مش حتتين و كلو بلون العربية ، زائد إن بقى فيها مرايات كهربا (مكنتش موجودة في الشكل القديم في ال-1600 ) , و دي في منها موديلات 2000 و 2001 و 2002 , و دي بتبقى في حدود 70 ألف جنيه لل-1600 , و 80 أو أكتر لل- 2000 اللي هي أوتوماتيك فقط

بعد كدة بقى نزلوا موديل 2003 و دي كانت ال-1600 و 2000 أوتوماتيك فقط و فيها كل حاجة ، 4 إزاز كهربا ، و مرايات كهربا و كان أول مرة ينزل الموتور ال-ecotec ١٠٠ حصان لل-1600 و 136 حصان لل-2000 و أعتقد د MPI مش SPI إنجكشين (ال-SPI اللي الناس بتقول عليه نص إنجكشين ) ، بس العربية دي مش موجودة كتير و لو لقيتها هتلاقيها غالية يعني فوق ال 80 لل- 1600 ، و بتوصل 90 و 100 ألف كمان لل 2000

و بعد 2003 نزل الفيكترا C ، و دي منزلتش مصر من ساعتها لحد لما رجعت تاني في 2007

و أي إستفسار أنا تحت أمرك

[Ahmad Allawy]

الله عليك يا فرحات بك..
كلام موزون وزي الفل..
انا فعلا عارف ان الشكل ده اسمه فيكترا بي بس انا مش باقول الاسم ده عشان في ناس كتير متعرفوش..و مش هتاخد بالها انا باتكلم علي انهي شكل..
وفاكر الاعلان اللي بتقول عليه ده كويس.. وكان بيعجبني قوي.. اصلي كنت ساعتها لسة صغير.. :)
بالنسبة بموضوع شكل الموديل من اول 2000 انا عارف الشكل بس مكنتش عارف ده من اول سنة كام..
كلام سعاتك تمام.. و عرفت منه كتير عن الفيكترا.. معلوماتي كانت ناقصة كتير وسعاتك كملتهالي كويس جدا..
وفي المقابل.. احب اقول لسعاتك المعلومتين اللي انا عارفهم عن عربيتي..
كورسا بي.. 1200 موديل 97 موتورها اس بي اي.. اللي هي سنجل بوينت انجيكشن (نص اننجيكشن علي رأي الناس..) نزل اول موديل من الشكل ده سنة 94 و كان علي ما اعتقد الماني 100% و بعده 95 وبعدين نزل موديل 97 وده غالبا كان تجميع اسباني..وكله نفس الموتور ونفس الامكانيات تقريبا عدا الايموبيلازر..(المفتاح المشفر..) فيها زجاج كهربا مرايات كهربا بدون تكييف بدون باور و فيها فتحة سقف..
نزل بعد كده موديل من اول 98 لحد 2000 هاتش باك برضه تكييف و باور و زجاج كهربا مش كله.. في عادي وفيها كهربا..(ملحوظة.. كلها الزجاج الكهربا امامي فقط)
وبدون فتحة سقف.. ومفيهاش ايموبيلايزر..مفتاح عادي يعني..
وبعدين نزل السيدان.. من اول 2003 لحد 2005 تقريبا.. علي ما اعتقد اسمها برة كورسا دي..
ودي برازيلي من الالف للياء الا الموتور و بعض الاجزاء..
في خلال الفترة بين بي و دي كان في كورسا سي وكانت هاتش باك لكن منزلتش مصر خالص.. وكانت فيها شبه من الاتنين بي ودي.. ومش عارف امكانياتها..
الدي بقي.. تقريبا كل الكماليات من تكييف و باور و 4 زجاج كهربا ومرايات كهربا و ووحدات رفع و سنتر و انذار بس مانيوال بس و بدون فتحة سقف..(مع العلم ان نزل منها برة فتيس ايزي ترونيك زي بتاع الاسترا حاليا و سمعت انه بيتباع استيراد للي عايز يركبه ومش غالي و كويس قوي....)
المفروض ان في كورسا شكل جديد نزلت برة مش عارف الحرف بتاعها ايه.. يمكن اي ولا حاجة..
وهي برضه هاتش باك و حلوة جدا.. وعاملة مبيعات كويسة قوي برة.. واحتمال كبير انها تنزل مصر في الفترة الجاية دي..
اتمني اني اكون افدتك و عرفتك معلومات جديدة زي ما انت افدتني جدا وعرفتني معلومات قيمة جدا بخصوصو الفيكترا..

[ahmedmaklad]

اية ده كلة؟

يا جماعة شكرا جدا علي الكلام الكبيييييييييير ده فعلا كلام مفيد جدا و عرفني حاجات انا ماكنتش عارفها فعلا كلام مفيد و الواحد يعرف حاجة عن العربية اللي عايز يجيبها بس ممكن تفيدوني لو تعرف حد عنده حاجة حلوة