عايز اوبل بس تكون نضيفة جدا

[Ahmad Allawy]

سيبك م التكييف..
اهم حاجة الموتور واهم من الموتور كمان الكونترول يونيت بتاعت الموتور..
والسمكري مش هيعمل حاجة.. مش هيبان..
انت بعينك ممكن تعرف الشاسيه فيه حاجة ولا لأ.. ده من قدام ..
لكن ورا ماعرفش..
و الصاج وكده اكيد هيبان..
ممكن لو ميكانيكي اوبل متخصص هيقولك علي شكل الحوض كده و الموتور هيقولك تقدير معقول..
بس لازم تدور الموتور و تشوف..
عموما قولي العربية فين..؟؟ و انت مواعيدك ايه..؟؟
ولو كده هاحاول اشوفلك حد يظبط معاك الموضوع ده..
قول يا رب..

[ahmedmaklad]

ميدان الحجاز

العربية في ميدان الحجاز و انا في اكتوبر بس عادي ممكن اروح انا يمكن انزل السوق يوم الجمعه انشاء ألله مش عارف استنى للجمعة و لا هي لقطة

[Ahmad Allawy]

سيبك من موضوع السوق ده..
الطبيعي انك تشتري عربية من اصحابها و يفضل انها تكون عربية بيتي..
ودي علي كلامك عربية بيتي..
السوق بيكون كله تجار.. واللي بيبيع بيضرب سعر عالي عشان اللي يشتري يفاصل براحته و يحس بانه بيفاصل..
متوجعش دماغك.. العربية علي كلامك كويسة قوي.. و سعرها يعتبر حلو قوي..
يعني لو زي ما قولتلك اتصرف عليها 5 ولا 6 هتبقي عروسه.. وكده انت هتبقي كسبت عربية نضيفة..
الحاجات دي فرص..
لو حبيت ممكن اسأل المهندس اللي باتعامل معاه ولو حبيت.. ممكن اخليه يقابلنا و نروح نشوفها..
بس اكيد هو هياخد فلوس ف الموضوع ده.. الله اعلم..
انا عن نفسي متحمس اني اقابلك واجي معاك نشوفها..

[ahmedmaklad]

ربنا يخليك

انا مش عايز اتعبك معايا انت اصلا بجد راجل محترم انا جاهز اي وقت و ممكن نشوف المهندس ده لو عايز عادي شوف هو ممكن ياخد كام و شوف الوقت و لو زي ما انت بتقول كدة يبقى هي لقطة و ياريت لو رحنا بدري

[Ahmad Allawy]

انا عن نفسي ممكن نتقابل الجمعه الصبح و نروح..
بس هو المهندس انا مش عارف ظروفه ايه..
تحب نروح سوا مرة الاول وبعدين نشوف ولا اشوف ايه ظروفه لو ييجي معانا..؟؟
بس هو لو هييجي هيبقي يوم الجمعه بعد الصلاة.. متأخر شوية يعني..

[ahmedmaklad]

ممكن تليفونك

بص اديني تليفونك و انا هكلمك دلوقتي و ممكن نكلم المهندس مع بعض

[Ahmad Allawy]

0103712299
بس اديني كده ربع ساعة..
وبعدين كلمني..
انا هاحاول اتصل بيه واشوف ايه النظام..

[ahmedmaklad]

انا كلمتك

كلمتك و ما ردتش عليا

[ahmedmaklad]

انا جبت اوبل

لحمد لله ربنا وفقني و جبت اوبل امبارح من السوق طبعا انتوا هترتاحوا مني عشان كل شوية كنت بسال اجيب اية و اعمل اية على العموم انا مش هسيبكوا برده :) انتوا بجد كل الناس هنا كويسة جدا جدا و احمد باشا تعبته معايا جدا
العربية اللي جبتها هي اوبل 96 1600 Cc لونها ازرق في كده كام حاجة
1- العربية حلوة و الراجل بيقول مش رشة و لا برة و لا جوة و بتاع البنزينة قال كدة بس انا مش مصدق لان العربية نضيفة و حاسس انها بتلمع قوي يعني مش موديل 96
2- الحالة العامة جيده جدا الحمد لله
3- هي المفروض فيها Abs بس مش حاسس بيه
4- التكييف جيد جدا
5- البطارية جديده
6- مفيش اي خبطة فيها او حاجة
7- الدكتور اللي في البنزينة(هو حاسسني ان هو دكتور فعلا) بيقول حالة الموتور 80%
8- لما رفعناها بسم الله ما شاء الله شكلها حلو من تحت

يعني ده مجمل اللي في العربية (لحد دلوقتي) بفكر اوديها التوكيل عايز برده يبص عليها و يقولي لو فيها حاجة مش لسه هروح لمين يمكن اروح لمقار ده او احمد بيقول اللي في مدينة نصر كويس و انا في مدينة نصر النهارده فيمكن اروح النهارده يا ريت يا احمد تديني العنوان بالظبط
بس كده انا جبتها ب 57000 جنيه السعر ده كويس ولا ايه انا مستني رايكوا

[ahmedmaklad]

حاجه كمان

انا كنت عايز اركبلها مكن زجاج كهربا ورا و عايز اجيبلها مرايات كهربا حد يعرف السعر كام و ممكن اركبها فين و تقريبا انا مش فاكر مين بصراحه بس كان في حد هنا عنده موتور للمراية الكهربا

[Ahmad Allawy]

أولا..
مفيش تعب ولا اي حاجة.. وكلنا هنا اخوات و الحمد لله وكلنا تحت امرك في اي حاجة..
ثانيا..الف مبروك علي العربية و ربنا يباركلك فيها و يكفيبك شرها ان شاء الله وتبقي قدم خير عليك..
ثالثا.. اهم حاجة في التوكيل انك تكشف علي الكومبيوتر.. وده اللي مش هتلاقيه برة التوكيل غير عند ناس محدودين جدا انا نفسي ماعرفش حد فيهم..
رابعا.. بالنسبة للزجاج الكهربا و المرايات.. وليد بك مشكورا تفضل و كان حاطط بيانات واحد بتاع قطع غيار مستعمل في مدينة نصر ممكن حضرتك تسأل عنده و تكلمه او تروحله.. اكيد هتلاقي كل حاجة.. اما لو حبيت تنزل الحرفيين.. اسأل علي العايدي وده اشهر اوبل هناك
بيانات الراجل بتاع مدينة نصر اهي..
انا اعرف واحد في الحي السادس متخصص في قطع غيار الأوبل المستعملة أو الاستراد واسعاره كويسة ده عنوانه ورقم تليفون

الأسم : محمد قشطة (الشيخ محمد)
اسم المحل : اوبل وان Opel one
العنوان : بلوك 102 شارع الخليفة - الحي السادس - مدينة نصر امام مستشفى جراحات اليوم الواحد
الرقم 0162916986

خامسا و اخيرا.. بالنسبة لصاحب موتور المراية.. فده كان محمد بك مختار..و كانت تقريبا مراية يمين بس.. مش الاتنين..
اتمني ان الرد يكون وافي.. و ربنا يباركلك في العروسة :)

[ENG\AHMED]

فى منصور فى مدينة نصر فى ميدان رابعة و فى اوتوماستر فى الحى السادس
المرايايت الكهرباء فى منهم بيقفلو بالريموت مع السنتر (زى ال Cdx) الواحدة استيراد فى الحرفيين=350
الزجاج معرفش بس اعتقد هيبقى سعرة حلو شوية :)) لانك هتغير حاجات كتير(يعنى الفرش+مكن الزجاج+زراير الزجاج اللى قدام عند الفتيس)

[ahmedmaklad]

الله يبارك فيكم

شكرا شكرا و معاكوا واحد جديد في النادي بس واحد مش بهدى الا ما تتطلع تمام جدا
المهم العربية الحمد لله حلوه بس فيها حاجات بيحصل رجة في العربية عند ال 120 كم كدا مش عارف يمكن ده ترصيص لسه هكشف و اشوف
مش عارف بقي اروح اول مرة للتوكيل و اصلح هناك اول مره و لا اكشف بس في التوكيل و اصلح بره انا رحت النهارده منصور اللي عند رابعه بس ما كشفتش جبت ميكانيكي من جوه عشان يبصلي على العربيه حاسسني اني جايب عربية خرده انا كنت بعديها هرمي العربية و اسيبها قالي عايزه طنابير و تيل و ترمبة باور عشان الباور تقيل (هو فعلا تقيل) حاجات كده بفلوس كتير
و بعدين رحت الحرفيين عند واحد ميكانيكي هناك بتاع الماني و كهربائي وقالولي اجيلهم و هيعملولي كل حاجة في العربية مش عارف اكمل معاهم و لا اروح للمهندس اللي احمد بيعمل عنده هو كده كده كله بعيد عني انا في 6 اكتوبر قصدي محافظة 6 اكتوبر :) انا مش عايز اروح للمصطفى بيروح عنده في مصر اسكندرية الصحراوي مصطفى حاسسني بصراحه اني هدفع تمن العربية تاني مش عارف قولولي رايكوا يا جماعه

[Ahmad Allawy]

الكلام اللي الراجل قاللك عليه مش خطير قوي يعني..
يعني تغيير طنابير و تيل.. مش ازمة..
ومش محتاج التوكيل يعني في رأيي..
موضوع طلمبة الباور ده مش عارف اي حد برة هيعملها كويس ولا ايه النظام..
بس برضه بيتهيألي مش ازمة حاجة هتتفك و يتركب غيرها..
بس لو علي كده بس ده العادي يا باشا.. التيل طبيعي انك زي ما قولتلك تغير كل السيور
و الزيوت و الفلاتر و التيل و الطنابير حسب حالتها.. و يفضل سير و بلية كاتينة.. بس هتبقي غالية عندك شوية لو انت عارف من المالك السابق اخر مرة غيرها علي كام كيلو.. يبقي استني عليها شوية..
و كمان طلمبة المية نفس القصة.. لأن الحاجات دي اهم حاجات لازم تكون عارف تاريخها في عربيتك..
عشان تعرف تحافظ عليها و تغيرها علي الكيلو متر المظبوط بتاعها..
والله لو حبيت تيجي عند فادي اللي باتعامل معاه.. اهلا و سهلا بيك في اي وقت..
بس خلي بالك انك هتأجل الموضوع بتاع 10 ايام.. عشان هو مسيحي.. و الايام دي هما عندهم اعياد.. و ممكن ميكونش متاح.. لكن لو الامور مستعجلة يبقي اعملها في الحرفيين..
والناس المتخصصين هناك اكيد كويسين جدا.. و التوكيل طبعا نمرة واحد بس حجز و فلوس..
شوف انت بقي اولوياتك مادية ولا وقت ولا ايه بالظبط..
(ممكن اعدي عليك النهاردة عشان اشوف العروسة ان شاء الله..)

[ENG\AHMED]

يستحسن فى الاول توكيل لحد لما تعرف العربية و الناس اللى بتشتغل فيها ممكن بعد كدة تشترى قطع الغيار من التوكيل و تركب برة عند حد شغال فى الاوبل(دة على حسب اللى هتغيرة يعنى فى حاجات يستحسن توكيل)
طلمبة الباور معتقدش انها حاجة عاجلة اوى انها تتغير دلوقتى خصوصا ان انا سمعت من ناس غيروها قبل كدة ارقام كويسة بس مش فاكر كام بالضبط بس كانت من مضــــاعفات الالف او الالفين يمكن :))