كلام فى الأوبل

[refaei]

طنطاوي باشا انا احترمتك جدا ع الكلام ده
بس هارخم عليك
انا نويت خلاص اشتري Astra 2006 or 2007 ايه رايك تنصحني بايه

[refaei]

طناني باشا اسف على كتابة الاسم بالخطا اول مرة معلش بقى لسة جديد والله ما يعرفك يجهلك
المهم معلش هاتعبك معايا بس انا محتاج ضروري قايمة باسعار قطع الغيار والاكسسوار لعربيتين استرا البرازيلي واسترا انجوي وفيكترا سي 2008 لاني ان شاء نويت اجيب واحدة منهم وعلى فكرة انت السبب اني اخدت القرار ده وفرحت جدا انك كمان عندك مركز صيانة علشان كدة انا اطمنت ومش هاغلب..معلش طولت عليك بس محتاج اخد القرار النهائي
ـــــــــــــــــــــــــــــــــــــــــــــــ
اخوك رفاعي

[yoyhmh]

كلام جميل جدا
شوقتونى للاوبل بجد الواحد بجد محتاج عربية زى دى
انهى نوع صيانته رخيصة عن التانى(كورسا-استرا-فيكترا)
شكرااااااااااااااااااااااا

[D.R.Mahmoud]

ربنا يباركلك يا بشمهندس وفعلا موضوع رائع

[محمود بنيل]

بجد اللي بتقوله منطقي جدا بس انا للأسف لو ماجبتش زي اللي راكب في العربيه بالظبط ببقى متعقد
كان عندي فانوس اتشرخ خلفي روحت جيبت الديبو وجبت الأتنين يمين وشمال عشان اللون يبقى ماشي مع بعضه لكن بعد ماركبو حسيت بالفرق بينهم والأصلي كلون وفوقات في التقفيل قمت طبعا رايح جايب الأصلي ولقيت ان لونه نفس درجة اللون بتاعت اللي سليم فجبت واحد بس والأثنين الديبو عندي بكرتونتهم
نفسي ايتدي اعمل زي مانتا بتقول واطنش في الحاجات اللي زي دي

انا عضو جديد معاكم هنا واسمى محمود وبصراحة رأيى من رأيك إن الاصلى ما فيش احسن منه

[محمود بنيل]

انا عضو جديد معاكم هنا .... بصراحة انتم رجالة جادعة أوى ودمكم زى العسل وانا اشتركت فى المنتدى عشان انتم ناس جادعة جدا ... انا كان معايا عربية سكودا فيفوريت وطبعا مقتنع زيكم بالظبط ان الالمانى ما فيش احسن منه بس للأسف العربية اللى جبتها دى (فيفوريت) حالتها كانت تعبانة جدا لدرجة انى بعتها بعد ما اشتريتها ب 3 اسابيع وعلى الرغم من حالتها التعبانة دى الا انها كانت كويسة ومريحة وحمالة آسية .... أنا آسف إنى طولت عليكم بس واضح ان طنانى باشا من الناس الفعالة اوى وواضح كمان إن فى إجماع ان العربية الاوبل من العربيات الكويسة وانا معروض عليا عربية دلوقتى كورسا 95 1200 سى سى شركة برة وجوة وربنا يسهل حشوفها يوم الاربعاء او الخميس اللى جاى 1/8 أو 2014/1/9 وإدعولى إنها تبقى كويسة عشان انضم للجروب الجميل دة

[محمود بنيل]

فى بس سؤال بسيط حد عنده فكرة أسعار قطع غيار الاوبل كورسا 95 عاملة كام دلوقتى فى السوق؟؟

[محمد اح]

يا شباب لو سمحتوا انا عندي اوبيل استرا 2000 وعاوز ليها تيل فرامل خلفي عاوز اعرف سعرة كام وياريت لو فية نوع تركي مثلا يكون رخيص وعاوز كتينة جنزير سعرها كام ؟

[abdallah elsay]

لوسمحتم كنت بسال على الجلدة اللى بتركب فى وش الموبينة عشان البوجيهات بتعمل كام واجيبها منيين فى الاسكندريةبتاعت الكورسا 98

[omaratef]

احنا وصلنا لفين
اه لقطع الغيار صح
طيب ايه الخطوه اللى بعد كده
7. الفرش و الكراسى و الأرضية و العزل و السقف
هو انا عن نفسى مشفتشى الفرش الأصلى بتاعى
عشان من ساعة ما جه و هو متغطى
بس اللى اسمعه ان خامات التنجيد حلوه قوى
طيب ما ده كلام عادى
سواء المصرى او الألمانى او اى ماركه التنجيد محدش بيبص ليه قوى
عشان لو فيه حاجة
تديله كسوه هيبقى زى الفل
امال انا هافتح فيه كلام ليه
عشان لما ركبت عربية زى التيجو و 516 و حتى اللى مش صينى بس موديل جديد
و ركبت تويوتات و نيسان قديمه شوية
لقيت القعده مش قد كده
يعنى تحس انها معموله على قد ناس ترانسزتور
مش غيلان زى المصريين
انا شفت ناس طويله حاطه الكرسى فى الكنبه عشان تعرف تسوق
لما ركبوا معايا محركوش الكرسى
اشمعنى
يقولك اصل اليابانين عاملين عربية ناعمه و عمليه
طيب ايه علاقة النعومه انى اقعد متكتف جوه العربية
و اللى قاعد على الكرسى اللى جنبى و انا سايق قاعد معايا على الكرسى
كل شوية اقوله ايدك
رجلك
ارجع ورا عشان اشوف المرايه
و لا لو حد قاعد وراك
يقولك اما تطلع الكرسى شوية قدام
مش عارف اقعد
لا حول و لا قوة الا بالله
غير انك قليل قوى لما تشوف عربية كورى - يابانى - صينى ماشى بالفرش الأصلى
و لو ماشى بيه هتلاقيه متهربد
و كل حاجة سليمه بس لوحده
و كراسى بتزيق
ليه
عشان التقل عليها جامد
ما احنا اوزان برضوا

طيب ما علينا
ده الفرش و نفس الوضع فى الأرضية
السقف بقى
تحس ان سقف العربيات اليابانى بالذات هيقع عليك
مش عارف ليه
ما عدا فى التويوتا 2003-2009 تحس ان السقف عالى
و الكرسى واطى

العزل الحرارى بتاع اليابانى احسن
اه احسن عزل حرارى بتاعهم
مش عزل صوتى و ازاز و الكلام الأهبل اللى مش بيعمل حاجة ده
لأ العزل الحرارى
اركب نيسان صنى و اركب المانى و الأتنين واقفين جنب بعض
فى الشموسه
النيسان تتركب الألمانى لأ
بس ده على حساب ايه
جودة خامات الأزاز
يعنى كام واحد شاف عربية يابانى او كورى او صينى و جديده ازازها مشروخ والله العظيم لوحده
يقولك عشان الأزاز ما يخزنشى حرارة العربية و تأثير الصوب الزجاجية و تأثير المحشى على المهلبية
تم تعديل الأزاز عشان يطلع درجة الحرارة لبره
يعنى لو ماشى فى طريق و ازازة خطت الأزاز تعديه
زى ما حصل معايا فى النيسان
زلطه دخلت من قدام طلعت من ورا
و برضو اليابانى احسن
و الكورى احسن
و الصينى احسن
و الماليزى احسن
انما البى ام و الفولفو و الأمريكانى و المرسيدس و الأوبل
الشركات مجهوله الهوية دى
هى اللى جايبه السوق ورا

طب سؤال يا باشا لو سمحت الكلام ده ينطبق على الاوبل الجديده ولا القديمة بس يعنى ايه رايك فى الاسترا الجديدة وتسلم

[Ayman Elmandoh]

كلام جميل خلاني حاسس اني اخترت صح
عربيتي استرا 2004 اتوماتيك

[عبدالرحمن شبل]

انقذتنى

باشا بصراحه انت لحقتنى قبل ما ابيع .. بصراحه كنت بفكر اغير وكنت هتجنن واجيب ايمجراند قال ايه زيرو وكده بس بصراحه انا كل ما اركب عربيه غير عربيتي احس بالفرق فرق الالمانى طبعا بس مشكلتنا الملل ، انا من فتره كان جايلى زبون للعربيه ولقيت نفسي بدور على اوبل تانى ... معايا فيكترا 98 مانيوال كامله كهربا . تحياتى ليك

[a7md 3amr]

الف شكر ليك
وكلام جميل
بجد الالماني لا يقارن

[tito32]

انا اركب المانى قديم ولا يابانى او كورى جديد الامان بفلوس

[محمود عادل222]

كلام جميل وحلو عن الاوبل بس انا مشكلتي معاها انها علي طول فيها اعطال ومفيش صنايعيه بتفهم فيها هنا في المنيا
بس طياره وثبات وامان واسعار قطع غيارها كويسه
اللي بيجنني انها ملهاش سوق ولا سعر وده بيخليني احس اني اتنصب عليا لما اشتريتها
عن الفيكترا a 1994 اتحدث