إصحاب الأوبل الإسكنرانية

[danash]

الأخوة أصحاب الأوبل الإسكندرانية عايزين نكون زى الجماعة فى القاهرة
المهندس وليد والمهندس محمد مختار بصراحة ناس محترمة جدا وبيساعدو كده كده
المهم عايزين نعرف بعض بأفضل الناس اللى بتشتغل فى الأوبل
وأفضل واحد بتاع قطع غيار عموما حأبتدى أنا
أنا عندى الفيكترا من حوالى أربع شهور أول ما إشتريتها كان فيها طقم شمبر وسبيكة
المهم ودينها عند واحد ميكانيكة مش وحش إسمه عبد العزيز فى السيوف ظبطها
وقطع الغيار من عند أيمن الصعيدى على جمال عبد الناصر
المهم عايز أعرف فين بتوع العفشة والكهربائى لأنى لسة جديد فى هذا الوضع
أخوكم أحمد دنش

[Mustafa_Farouk]

شكلك كدة حتكون المتحدث الرسمي عن إلاسكندرية. :)

[M.Mokhtar]

الأخوة أصحاب الأوبل الإسكندرانية عايزين نكون زى الجماعة فى القاهرة
المهندس وليد والمهندس محمد مختار بصراحة ناس محترمة جدا وبيساعدو كده كده

انا لا اقبل
قبل اسمى لازم تحط اسم المهندس احمد ده اكتر واحد بيفيدنا كلنا
واخبار اسكندريه ايه؟ انا قضيت فيها احلى سنتين فى حياتى

[Ahmad Allawy]

محمد بيه..
كده هتزعلني منك.. انت والله افدتنا كتير..
عموما.. احنا كده هنعمل زي الممثلين اللي بيتخانقوا علي الاسم علي افيش الفيلم.. :) :) :)
عموما ربنا يكرم كده و نكون كلنا بنعرف نفيد بعض ان شاء الله..
وربنا يسهل كده و الاوبلاوية الاسكندرانية يبقوا جروب جامد و متعاون..
و نتبادل الخبرات مع اوبل اليكس..و نعمل اوبل ايجبت ان شاء الله..

[abdelaziz-waleed]

الأخوة أصحاب الأوبل الإسكندرانية عايزين نكون زى الجماعة فى القاهرة
المهندس وليد والمهندس محمد مختار بصراحة ناس محترمة جدا وبيساعدو كده كده

يانهار ابيض ياعم ربنا يكرمك احنا هانروح فين جمب استاذ احمد واستاذ محمد مختار
دول الفطاحلة بتوع الاوبل في المنتدى يارب بس نبقى زيهم ووالله هما اللي مظبطين منتدى الاوبل بدون اي مجاملة
ان شاء الله على رأي استاذ احمد
يبقى في رابطة عشاق الاوبل اسكندرية والصعيد ويكونوا رابطة عشاق الاوبل مصر
ونفضل ورا المنتدى لغاية ما كله يركب الاوبل

[danash]

المهم يا جماعة كل الإخوة الأفاضل فى القاهرة هم اللى ردوا واللإسكندرانية مش فى دماغهم مع إنى شايف الأوبل فى إسكندرية كثير جدا لغاية ما إعتقدت إنها ببتوزع على البطاقة ولكم جزيل الشكر للرد من ساعة ما كنت عايز أغير الموتور من الأوبل لللإكوتك

[Ahmad Allawy]

دي ملحوظة هامة جدا والله.. انت عندك حق..
انا كنت في اليكس من كام يوم..
وفعلا لاحظت الكورسا اللي هي زي اللي معايا.. لقيتها منتشرة جدا جدا جدا جدا.. لدرجة اني في الباركينج بتاع ابراج القوات المسلحة اللي قبل كوبري ستانلي.. شوفت ما لا يقل عن 8 عربيات كده وانا ماشي..
واكيد لو دققت كنت هالاقي فيكترا كتير.. بس انا براحة كنت مركز ع الكورسا اكتر..
لأ شد يا مستر دنش شوية..
وهات كل الانوبلاوية الاسكندرانية هنا.. عايزين منتدي اوبل تشعلل م النشاط..

[volcano12]

أنا كان معايا كورسا 1000سىسى 98.. بس خلاص اتباعت ... و اعرف شوية حاجات اللى اتعاملت معاها فى الفتره اللى معايا... لو حد عايز مساعده يسأل يمكن أعرف أساعده


الكورسا فعلا منتشره أوى هنا... و لحد دلوقتى ندمان انى بعتها و مظبتهاش.. قولت اللى حصرفه عليها حركبه و مش حخده فلوس تانى.. فقلت أقدى بالاكسيل باقى عمرى فى الكليه :)

[danash]

من الواضح إن مشاكل العربيات دى قليلة واللى عنده أوبل مش شاغل باله بإصلاح
كل اللى شاغله يتاعة المعلومات اللى فى التابلوة اللى دايما بايظة والسنترلوك
بالمناسبة عندى ساعات الزجاج أتك عليه جامد وأرفع أيدى يطلع لوحدة ولو بالراحة على حسب التكة يطلع المهم ساعات وساعات لأ بس المهم بيطلع وينزل
يعنى يا جماعة المواضيع بسيطة الأسكندرانية مشغولين بموسم الصيف
أحمد دنش

[retagstudio]

بص ياباشا انا عندى واحد كهربائى تمام فى السيوف برضه ادام قريه عبد الوهاب اسمه على وربنا المستعان

[amir_ezzat]

على فكرة انت فعلا رايك صح انا كنت فى اسكندرية من فرتة ولاقيت كميه اوبل كتيرة قوى بس الظاهر ان مفيش انترنت نت فى اسكندرية المتس لأخيك الف عزر
وعموما اسكنردية القاهرة اهو كلة اوبل بلاش ن عمل احزاب حتى فى السيارت لأنك لو بدات احنا بتوع القاهرة هنجى اسكندرية ونوريكوا الاوبل بتكون شكلها اية ههههههههههههههههههه

[Ahmad Allawy]

انا اقصد موضوع الطوارئ بس والله..
عشان نلاقي حد يلحقنا لا قدر الله لو احتجنا حاجة هناك..

[danash]

واضح على رأى الأستاذ عزت النت لم يدخل إسكندرية ولا خايفين من الحسد
عموما خلينا كلنا مع بعض وخلاص

[ASKAFRAWY]

احب الفكرة اننا نكون جروب
على العموم انا من الاسكندرية و جديد فى المنتدي
املك سيارتين كورسا 2005 و1995
اتعامل من 10 سنوات مع ميكانيكى فى طريق المطار وتخصصه اوبل لانه بيشتغل فى توكيل مقار

احب ان اخدم حيث انى تعلمت كتير منذ امتلاكى الكورسا من حوالى 12 سنة

[Ahmad Allawy]

أهلا بيك يا باشا..
و الراجل ده عند المطار في اسكندرية اكيد مش كده..؟؟ :) :)
و هنحتاجك كتير قوي ان شاء الله بخصوص الكورسات..
انت هتبقي رجل الكورسا الاول في المنتدي هنا.. :)