شويه استفسارات على السريع

[Mr7mix]

السلام عليكم ورحمة الله وبركاته،،

ازيكو يا شباب يارب تكونو بخير .. عندى شويه اسئله كده فى تابلوه الفيكترا B

1- لمبات البيان فى التابلوه عندى مشفتش منهم حاجه بتنور غير
* لمبه البنزين و حرف S و البطاريه و فرامل اليد والنور العالى
* الاشارات والانتظار لمبه خضراء فقط ( مع ان المفروض يكون فى لمبه مختلفه مع الانتظار)
وبعدين لمبه الاشاره كتير جداً مش بتكون شغاله يعنى بفتح اشاره او انتظار بتنور خارج العربيه لكن على التابلوه مش بتنور و شويه الاقيها بتشتغل بمزاجها وتفصل بمزاجها

2- كنت عند الميكانيكى وبنظف الانجيكشن و فصل فيشه الماف تقريباً وقالى بص على لمبه الاتشيك انجين هتلاقيها منوره طبعاً ملقيتش اى نور على التابلوه ولا حتى اعرف شكلها ايه من ساعه لما جيبت العربيه ومش عارف بقى الاتشيك انجين دى الى هى حرف S ولا غيرها

3- شاشه الحراره الجو والساعه مش شغالين بالمره وبحاول اظبت الساعه ولا زرار شغال دى بتتغير ولا بتتصلح ؟؟

4- من يوم ما جيبت العربيه و لمبه البطاريه دايماً مسريه و الكهربائى قالى ده ممكن تكون جلب الدينامو او كتاوت ضعيف والحمد لله والدينامو قطع شحن من 4 ايام روحت بقيس شحن الدينامو مع الانوار والتكيف طلع بلحه يعنى مافيش شحن خالص

وان شاء الله فى الويك اند بتاعى هاقضيه عند الكهربائى هاعمل الدينامو و عاوز اشوف المشاكل التانيه دى تتحل ازاى وعاوز اعرف ايه المبات الى المفروض تكون شغاله وبتشتغل امتى علشان اعملها بالمره

[Mr7mix]

اه نسيت كمان حاجه لاقيت فيشه تحت كرسى السائق دى بتاعت ايه ؟؟

و لما بيكون فى باب مفتوح المفروض تنور على التابلوه ولا مافيهاش اصلا ؟؟

لمبه الصالون على طول مسريه حتى لو عامل لوك للعربيه بس شغاله ديلاى مظبوط وانا مغير لمبه الصالون مركب بورده 36 لمبه تلجى ده صح انها تبقى مسريه كده ؟؟

[forget]

بس كده,, أنت اقتصادى اوى فى اسئلتك بس والله تقريبا جمعتلى الحاجات اللى عوز اعرفها من زمان,منتظرين الردود

[forget]

مفيش حد بيرد علينا ليه

[magdyelshikh]

بص يا برنس لمبة الصالون كده صح لازم تبقى مسرية علشان دى لمبات ليزر على كارته فده العادى بتعها بقلها سنتين عندى مسرية كده والحمد لله مفيش مشكلة .
المفروض انها تنور مع فتح اى باب من الاربعة والا يبقى زراير نور الابواب محتاجة صيانه يتبص عليها من كهربائى كويس ..
الفيشة اللى تحت الكرسى دى فيشه مجهزة علشان لو ركبت كراسى متحركة زى كراسى البى ام دبليو .
بالنسبة للمبة الدينمو اللى مسرية ضعف شحن من الدينمو محتاج كتاوت شحن داخلى وللأسف مش بينجح الموضوع ده ناس جربته ميت مرة فاأنا رأى زى ما عملت عندى دينمو استراد وخد بالك من الحته دى بتاع فكترا بى 120 امبير بشرط التجربة على الاقل اسبوع .
بالنسبة للمبات التابلو محتاج انه يتحل من كهربائى محترم بتاع اوبل علشان فكه فيه صنعه واحتراف مش ساهل علشان ميكسر الفبرات ومكان المسامير اللى مثبتاه وبيتم تنضيفة بقماشة قطن نظيفة من الداخل وبيشيك على كل اللمبات المحروقه او المسوده بتتغير والناقص بيتكمل من الاستيراد مفيش منهم فى السوق جديد الا لمبتين فقط والباقى اللى فى الطابلو بيبقوا بكعب بلاستك ثابته فيه اللمبه وبالمرة تشيك على الفيوز المسؤل عن نور الطابلوه فى علبة الفيوزات ...
بعد كده كله يرجع فبريكه وتدعى لاخوك مجدى بالستر فى الدنيا والاخرة ومتنساش كلمة كهربائى محترم فهمان فى الاوبل

[ashrafnoby]

الله ينور عليك ياعم مجدى انت جبت المفيد اهم حاجه كهربائى فاهم وكويس علشان ميبخربش حاجه

[Mr7mix]

الله ينور عليك يا مجدى باشا بس لما بيكون فى باب مفتوح عندى نور الصالون بيفضل منور لكن ما فيش حاجه على التابلو

وبعدين طيب لو الدينامو طلع سليم من جوه ومحتاج كتاوت بس ممكن اغير الكتاوت ولا لازم دينامو استيراد
اصل بصراحه بقلق اوى من الحاجات الاستيراد دى وبعدين ملقيتش حد عندو ضمير بيبيع قطع غيار استيراد

والكهربائى الى بيفهم الحمد لله موجود :d

[tananybasha]

تمام زى ما مجدى ما قال
دينامو استيراد احسن
اللى فى السوق كتاوت مضروبة شهر و تعيش انت
و خد الدينامو على تجربة

[magdyelshikh]

الله ينور عليك يا مجدى باشا بس لما بيكون فى باب مفتوح عندى نور الصالون بيفضل منور لكن ما فيش حاجه على التابلو

وبعدين طيب لو الدينامو طلع سليم من جوه ومحتاج كتاوت بس ممكن اغير الكتاوت ولا لازم دينامو استيراد
اصل بصراحه بقلق اوى من الحاجات الاستيراد دى وبعدين ملقيتش حد عندو ضمير بيبيع قطع غيار استيراد

والكهربائى الى بيفهم الحمد لله موجود :d

نور الصالون بيستمر والع مشكلة فى التيمر اللى مشغله او فيوز التيمر راجع علبة الفيوزات
ومش فاهم قصدك بكلمة (ما فيش حاجة على التابلو )
الدينمو الاستيراد حيريحك من شغل الكتاوت علشان مش بينفع زى ما انا ما قلتلك من سابق وكمان كلام طنانى بيأكد كلامى .

[tananybasha]

للعلم اليليدات بتفضل مرية عشان لازم يكون كهربا استعداد 1.2 فولت واصله لدايرة الديلاى

[SYD]

علامة S في الطابلوه معناها Sport Drive الي هو الزرار الي في عصاية الفتيس الأوتوماتيك

لمبات الأشارة والفلاشر كلها لمبة واحدة مش زي باقي العربيات كل اتجاه ليه سهم منور

لمبة الأشارة بتهيس عندك ولو خدت مطب تشتغل وبعدين تفصل يا أما الدواية فيها لووز lose يا أما اللمبة نفسها مهيسة

اعتقد زراير الطابلوه لو باظت لازم تتغير

وفي انتظار الردود

والله المستعان
،
،

[Mr7mix]

نور الصالون بيستمر والع مشكلة فى التيمر اللى مشغله او فيوز التيمر راجع علبة الفيوزات
ومش فاهم قصدك بكلمة (ما فيش حاجة على التابلو )

اقصد يعنى اقولك ان مافيش اى لمبه بيان على التابلو ان فى باب مفتوح

تمام زى ما مجدى ما قال
دينامو استيراد احسن
اللى فى السوق كتاوت مضروبة شهر و تعيش انت
و خد الدينامو على تجربة

والله يا طنانى انا حالياً سايب العربيه عند الكهربائى لسه بيفكو وهايقولى فيه ايه بس بيقولى ممكن يكون شربون بس افكو الاول واشوف ايه الى بايظ

علامة S في الطابلوه معناها Sport Drive الي هو الزرار الي في عصاية الفتيس الأوتوماتيك

لمبات الأشارة والفلاشر كلها لمبة واحدة مش زي باقي العربيات كل اتجاه ليه سهم منور

لمبة الأشارة بتهيس عندك ولو خدت مطب تشتغل وبعدين تفصل يا أما الدواية فيها لووز lose يا أما اللمبة نفسها مهيسة

اعتقد زراير الطابلوه لو باظت لازم تتغير

وفي انتظار الردود

والله المستعان
،
،

اه هى لمبه S دى Sport Drive و بتنور لما بفتح كونتاك العربيه وبتفصل تانى

بالنسبه للاشارات اليمين والشمال على لمبه واحده عليها سهمين بس الى انا اقصدو ان لما بنور الانتظار المفروض يكون فيه اشاره حمرا تانى مع السهم الاخضر تكون موجودة زى باقى عربيات خلق الله ولا مش موجوده فى اوبل :D

[tananybasha]

عم سيد و اخوه بقوا خبرة فى الأوبل

[magdyelshikh]

بالنسبة للمبه الصالون مفيش لها اى لمبات فى التابلو
اما الانتظار فله زرار موجود جنب زرار التكيف والمروحة بتاعت التكيف بداخل الزرار لمبة اضائتها باللون الاحمر بتبقى شغاله مع الفيشر بتاع الانتظار وهى غلسه اللمبه دى بتبقى بسلكة ولحام بالمكوة عايز كهربائى يكون عملها قبل كده علشان يعرف يغيرها لما تتحرق .

[Mr7mix]

يبقى هى كده محروقه :d
الله المستعان بقى لما ابقى اعمل زياره تانيه للكهربائى ان شاء الله ابقى اعمل انوار التالبلو و رزار الانتظار علشان كده محروقه

نزلت النهارده عملت بنصيحتك يا استاذ مجدى وجيبت دينامو استيراد من صقر قريش عند واحد اسمو محمد امين
فكلى الدينامو قدامى من ماتور وحسبو على 250 ومرضاش ينزل فيه جنيه واحد روحت للكهربائى وركبو وبعد التركيب والتجربه طلع اشطه الحمد لله بس البطاريه بتفضى شحن بسرعه جداً هى بطاريه النسر الامانيه ميه مش جافه ،، وتاريخ الشراء بتاعها 24/6/2011 كده حد يفيدنى بقى اعمل فيها ايه ارجعها الضمان ولا ابيعها وادفع فرق فى واحده جديده جافه لان انا كده ماشى ببطاريه مش بتاعتى واخدها من عند الكهربائى :d