لولا طنانى كنت رحت فى داهيه

[AbuMohammed]

السلام عليكم جميعاً
القصة دى مش حتلاقوها عند حد تانى و بيتهيألى عمرها ما تكرر مع حد بالشكل دة
الخلاصة إن انا كنت ماشى على الدائرى و مرة واحدة لاقيت العربية مش عاوزة تزيد عن 3 rbm و الكيلو متر على 80 و مش بيزيد و لما اكبس بنزين صوت العربية يعلى و كأن الـrbm على 7 و لكنه على 3 .
رحت لواحد عنده كمبيوتر كشف و قاللى حساس الماف رحت جيبت واحد و ركبته مفيش فايده نفس العيب بس اللى حصل بتأمل و بعد تجارب مميته العربية تبقى ماشية على 80 و الـrbm يرقص من 2 لـ3 و لما ازود يرقص من 3 لـ4 و العربية تجرى عادى كلمت الباشا و هو باشا فعلاً طنانى قاللى دة حساس الشكمان و اسمع منى متلفش كتير .
رحت لبتاع الكمبيوتر كشف و قاللى حساس الشكمان سليم ، و كان فى واحد ميكانيكى من التوكيل بتاع اوبل عندة بيظبط عربية على الكمبيوتر قاللى ده فتيس
رحت للكهربائى بتاعى ساق العربية و قاللى ده فتيس و اتصل سأل على فتيس اوتوماتيك اكوتيك قاللى 3000 جنية اعمل حسابك .
كلمت طنانى قاللى حرام عليك اسمع كلامى دة حساس شكمان و متسمعش كلام الكهربائى
النهارده ماشى على الدائرى نفس المشكلة اعصابى باظت و كرهت الدنيا اتصلت بالميكانيكى قاللى الفتيس بيفوت يا حلو ، كلمت ميكانيكى تانى قاللى دة بلوف و ربنا يستر تعالى نجرب
و انا راجع بالليل متأخر و الدنيا برد و السكة مفتوحه العربية كانت ماشية ذى الحلاوة مكنتش مصدق نفسى و فجأة اتصل بيا ملاك الأوبل ( طنانى ) و سألنى العربية عاملة ايه معاك قولتلة على اتصالاتى اللى فاتت و فتاوى الفتيس غضب و قاللى انت مش عاوز تسمع الكلام ده حساس الشكمان قولتله استنى يا طنانى العربية مظبوطة دلوقتى قاللى صدقت دة مش فتيس دة حساس الشكمان و عشان دلوقتى الجو بارد و السكة مفتوحة الحساس بارد و شغال كويس و بكدة تبقى العربية مظيوطة
شفتوا بالله عليكو واحد محترم كدة زى طنانى لولا مكلاماته معايا لكنت زمانى دلوقتى بعمل جمعية عشان اشترى فتيس و تبقى الطمه الكبرى انى الاقى العربية زى ما هيه كنت حقلع ملط و اجرى فى الشوارع و ارمى طوب على ورش الميكانيكيا اكسرلهم دماغهم
بارك الله فيك يا طنانى .
و ربنا يسامح اللى اخترع حساس الفتيس .

[Khaled_Nowaihy]

صدق اللى قال إسأل مجرب ولا تسأل طبيب
أنا باسمع دايماً كل خير عن طنانى باشا .. ربنا يبارك فيه

[AbuMohammed]

طنانى قاللى يا جماعة اسألوا العليل و لا تسالوا التحاليل
و كمان قاللى دة أسمه تراكم خبرات

[mmamdouh73]

الحمد لله وبارك الله فى كل من يساعد اخوه

[تامر.محمد]

ربنا يجعله في ميزان حسناته

[ashrafnoby]

الخبره خبره وده ميزه المنتدى انك تلاقى ناس عندها خبره ممكن تساعد احسن من اى كهربائى او ميكانيكى وطبعا لازم نشكر اخونا طنانى شكرا خاص واى واحد ممكن يفيد الزملاء فى المنتدى

[فادى محمد]

مش غريب علي طناني باشا حبيب هارتي

[zizo50001]

دكتور والله يا طنانى استاذ بجد بسم الله ماشاء الله
وربنا يجعلة فى ميزان حسناته
و الحمد لله انها حاجة بسيطة وعلى فكرة اوعى تمشى ورا الناس دى(الفتاين ) ربنا يرحمنا منهم

[zizo50001]

و فتيس اية اللى ب 3000 دة كان عايز يعمل معاك شغل عالى اوى

[Angel_wolf]

انا معنديش اوبل ولا بدخل القسم هنا بس الراجل دة راجل محترم لانه بيخدم الناس

[markoky]

مية مية طناني باشا

[enghanyomar]

طنانى قاللى يا جماعة اسألوا العليل و لا تسالوا التحاليل
و كمان قاللى دة أسمه تراكم خبرات

يا جماعه بجد الراجل ده يستاهل كل خير انا فكرت ان كل واحد هنا فى قسم اوبل يدفع مبلغ معين ونساهم كلنا فى مركز الخدمه اللى طنانى نفسه فيه اقل حاجه انت لما تلاقى مشكله فى العربيه متتعبش نفسيا عشان عارف بأذن الله ان فيه واحد فاهم حيحلها من غير عك ووجع دماغ وتعب نفسى ربنا بجد يباركله

[AbuMohammed]

لو لاحظتم ان طنانى مشاركش فى الموضوع ده و السبب ان الراجل ده راجل بجد و مش مستنى آى رد فعل من حد
بس انا كتبت الموضوع ده اقل تعبير و شكر عن مواقفه معايا
انا عاجز عن الشكر و حاولت كتير اقابل طنانى بس هو مشغول الله يعينه
بس بجد يا جماعه لازم نتقابل مش حينفع كده اللمه الحلوة دى من غير ما نعرف بعض وجهاً لوجه
انا ممكن اقابل واحد من المنتدى و مش عارفه
دانا بخاف اشتم واحد يزنق عليا فى الطريق بأوبل ليكون عضو جدع من المنتدى

[kayson]

ياجماعة انا بطالب ادارة المنتدى تضيف صورة طنانى باشا الى لوجو منتدى نيل موتورز بجد ده راجل محترم الى ابعد الحدود.

[haitham2011]

ربنا يزيدك من علمه يا طناني باشا و ينفعنا بيك و يحبب فيك الناس كمان و كمان