العربية بتحتضر .. ياريت المساعدة .. استرا

[t4r3k]

السلام عليكم

باختصار كدا .. العربية بتبوظ مني خالص ومش عارف اعمل ايه ..
المهم انا مليش خبرة خالص فى الموضوع دا وياريت تقيدونا ..

بخصوص العربية استرا 2001 عاملة 113000 كيلو متر

لما بمشي بيها بحس اني ماشي من غير مساعدين خالص بحس بكل زلطة في الطريق وبتتهز وبسمع اصوات كتيرة تعباني نفسيا

الفرامل بتصفر كل ما افرمل ..

في صوت طبعا هزة فى الطارة لما السرعة تزيد .. بس الجديد شوية ان الموضوع دا بيحصل حاجة شبهه وهيا على سرعة عادية ان الطارة تنطر مني على الشمال وترجع تاني بسرعه مكانها ... بتتهز كدا

لما بفرمل العربية مش ثابتة خالص بحس انها بترقص مع الفرملة القوية

الاداء سئ .. مش متوازنة خالص .. مع اني عارف الاسترا كويس معايا من زمان .. بس مليش فى موضوع التصليح خالص .. مش عارف اعمل ايه فعلا ..

ياريت النصيحة ايه اللى محتاج يتغير ومنين وبكام وكدا .. وعايز اعرف تكلفة الموضوع كام عشان اعرف اقرر اعمل ايه ..

مستني ردكم جدا جدا جدا .. كل يوم بتاخر فيه عليها بتتعب اكتر .. ربنا يستر

في امان الله

[zrzr1]

العفشة شكلها ضايعه وبالتالي كل الحاجات اللي بتحكي فيها دي عادي شكلك مش
بتصينها كل فتره,مبدأياً محتاج تغير التيل وتشوف الطنابير لو ينفع يتعملها
مسح اعملها لو مش نافع غيرها ولازم تشوف عفشجي كويس يكشف عليها عشان باقي العيوب ووشوف هيقولك ايه
وعرفنا هنا وشوف مصنعيته والرجاله هنا هيقولولك ازا كان تمام تروح تشتغل مش تمام, تشوف حد غيره وبعد ما تخلص ف شغل هتظبط زوايا وترصص

[t4r3k]

اولا شكرا جدا .. دانت رديت فيا الروح .. :)

يعني الموضوع امره سهل ان شاء الله ولا ايه ؟
وياريت ترشحلنا حد .. يظبطلنا الاداء ان شاء الله ..
ولو عندك فكرة عن الاسعار يبقي فل اوي ..

[alnmr79]

يا باشا مدام انتى من الهرم احب اقوللك
مع منصور انتى فى ايد امينة ههههههههههههههههههه
قصدى طنانى باشا ---استنى بس لما يعرف انك من الهرم ومعاك استرا هتشوف التظبيط على حق
حاجات بسيطة اطمن -عفشة -كاوتش مش اكتر.

[haitham2011]

بس الجديد شوية ان الموضوع دا بيحصل حاجة شبهه وهيا على سرعة عادية ان الطارة تنطر مني على الشمال وترجع تاني بسرعه مكانها ... بتتهز كدا

لو بتتنتر و تحس انك مش قادر تثبتها و انت ماشي علي سرعه هاديه تقريبا كده الكوبلن هيملص و ده في الغالب من كاوتشه الكوبلن هتلاقيها مقطوعه و مدخله تراب جوه

[tananybasha]

كل الحوار عفشه
عايز تعملها قوللى و انا ابعتك او اروح معاك لبتاع العفشة بتاعى
و ان شاء الله بسيطه

[medo111]

وبردو شوف ممكن يكون عندك في فرده كوتش ضاربه سلك بتعمل الهزه علي السرعات

[t4r3k]

الف شكر ليكوا يا رجالة
بجد ريحتوني كتير ..

طيب العفشة ممكن تتكلف كام عشان تتظبط ان شاء الله ...

ان شاء الله هتصل بيك يا استاذ طناني عشان اروح حتي اعرف الموضوع ايه نظامة عشان اعمله ان شاء الله

ياريت بس حتي التكلفة المبدئية ..

[tananybasha]

الصح
تروح يكشف على العربية
يقولك فيها ايه
و تبتدى تشوف هتعمل ايه

[caboo_1]

حاجات هتتغير زى بيض مقصات وتيش وبارات وتيل ومس طنابير واحتمال بطاحات
على العموم حاجات بسيطة وعلى طول الواحد بيعملها ولما تخلص روح اعمل ترصيص واتزان

[t4r3k]

طيب يا باشا اروح اكشف فين عشان اعرف ؟

[tananybasha]

عارف شارع المدبح او شارع البحر الأعظم
بص
الأسهل اتصل بيا
01119995031

[t4r3k]

تمام يا باشا هتصل بيك ان شاء الله عشان انا ناوي فى اجازة الاسبوع دي اعمل حاجة
شكرا جدا يا باشا

[tananybasha]

الحاج يحى بيقفل الجمعه
ممكن السبت
بس تتصل بيا اوصفلك المكان و اقولك تعمل ايه

[t4r3k]

السلام عليكم ..

بصوا بقي يا رجالة .. انا روحت النهاردة طبعا بعد نصائح طناني باشا .. روحت للعفشجي وقالي ان العربية محتاجة الاتي بس بدون تريقة :

4 مساعدين
4 جلب مقصات امامي
2 زراع ميزان
2 بارة دركسيون
2 بيضة مقص

المهم روحت شمبليون والتوفيقية ..
روحت شامبليون عند امريكان ستارز - سرور - طارق حمودة
روحت التوفيقية عند الشيماء - المتحدة

الشيماء والمتحدة وطارق حمودة الحاجات اللى عندهم مش اد كدا .. معظمها تركي وايطالي والالماني اللى هناك فيبي فطناني كان بيقولي انه مش بيرجحة

المهم عند امريكان ستارز وسرور هما اللى عندهم المفيد

امريكان ستارز:
4 مساعدين = امامي 850 .. خلفي 700 (الماني gm)
4 جلب مقصات امامي = 175 (الماني gm)
2 زراع ميزان = حديد 145 (موج-اتحاد اوروبي) - 125 فبر (موج-اتحاد اوروبي)
2 بارة دركسيون = 250 (تركي)
2 بيضة مقص = 290 (الماني) - 150 (تركي)

سرور:
4 مساعدين = امامي 675 (الماني) .. خلفي 550 (الماني gm)
4 جلب مقصات امامي = 140 (الماني)
2 زراع ميزان = حديد 150 (اسباني)
2 بارة دركسيون = 130 (تركي) >> مش عارف نسي يكتب x2 ولا دا سعرهم عنده !
2 بيضة مقص = 170 (الماني) - 130 (تركي)

فا مش عارف بصراحة اعمل ايه .. انا كنت هشتريهم من اميريكان ستارز .. بس طناني باشا قالى نشوف رايى الناس برضة ..

فياريت تفيدونا عشان انا عايز الحق اجيبهم قبل ما العربية تنتحر !

مستني رايكم يا رجالة

وشكرا