الجو العام في منتدى أوبل حزين جدا

[mokhtarm]

أنا بقالي أكتر من اسبوع متابع منتدى أوبل - وبصراحة أنا شايف إن الجو العام حزين جدا
كل مالكي الاوبل مابين الشكوى من اعطل العربية - لسوء التوكيل وغلو قطع الغير وندرتها وغيره
فعلا جالي إحباط عم من الماركة

أي واحد بيفكر في حاجة أوبل - وييجي يقرأه علي مكتوب مايلاقيش أي حاجة تشجع

قلما إنك تلاقي موضوع بيتكلم عن قد إيه العربية معاه كويسه وينصح بيها - أو حركه جدعنة من وكيلها

وللاسف ده نفس الحل في منتدى السيتروين والبيجو والفورد على عكس الرينو مثلا لما تشوف كل أعضائها فرحانين بالفلوانس أو حتى منتدى بروتون وكيا ....

ليه الظاهرة دي يا شباب

[Amrgamal1]

القسم ناااااااايم
بس ماتخافش قريب هتلاقي مني مواضيع عن المارد الالماني اوبل فيكترا بي
وتعديلات في الشكل والاداء
انا اللي هرجع للعربيه دي شبابها ان شاء الله :)
اخلص بس مشروع التخرج بتاعي وهتشوف الاجرام

[abdelrahmanhamdy]

فى موضوع مثبت اسمه كلام فى الاوبل ممكن تقرأه

[AhmedBahgat]

فتش عن منصور

[medo111]

الاغلبيه العامه هنا في المنتدي معاها عربيات موديلات اوبل القديمه يعني من التسعينات فطبيعي يكون في مشاكل وبردو مشكله منصور هو انو مش قد اوبل ميقدرش عليها لانها فيها تكنولوجيا متقدمه فا بيتصرف علي كيفو وعشان كدا سمعتو زفت.
وسبب تاني اغلبيه اعضاء المنتدي مش صغيرين فا في الغالب مش فاضيين هي دي اسباب النوم بس بيجيلو وقت يفوق مفيش حاجه بتفضل علي حالها

[احمد فهمى]

منصور هو عيب اوبل الوحيد

[احمد فهمى]

ولازم توكيل اوبل يكون خاص لأوبل فقط مش دايو و نص نقل وكلام فاضى

[AbuMohammed]

الصراحة طنانى هو روح القسم و اليومين دول الله يعينه ضغط شغل تقفيل الميزانيات و هو محاسب قانونى عشان كدة الجو مغيم ، و الحقيقة الواحد نفسه فى حاجة جديدة تطلعه من اللى هو فيه ، و السبب الرئيسى قله الإستيراد من بعد الثورة و قطع الغيار بقت نار فى الاوبل بالذات على اساس ان اللى راكب اوبل دة حسين سالم و الجديد مضروب ، ربنا يعينا على جشع التجار ، انا عندى حاجات كتير عايزة تتعمل فى العربية و مكبر دماغى

[cayman69300]

الاوبل عربية كويسة بس اعطالها كتير
تسالنى ازاى ؟
هقولك معرفش
او ممكن اقولك انها عربية فعلا جامدة موووت بس عايزة اللى يفهم فيها و يكون صريف عليها
لكن الاسعار عامة بقيت احسن بكتير من العربيات التانية

تيل فرامل امامى او خلفى كورى 75 جنية
بوجيهات 80 جنية البوش
سير كهربا و هو هو البور و التكييف ( كلهم بسير واحد ) 75 جنية انجليزى ملهوش حل
و الاستيراد مغرق الدنيا
بس هى مشكلها فى سخونتها و فيها اجزاء كهربا كتيرة شوية
لكن اجماليا عربية كويسة طبعا و بتحمى اللى جواها
بس مش عايزة حد يبخل عليها

[Mostafa.Ismail]

تجربتى المتواضعة مع العربيات عامة والاوبل تحديدا اقدر اقولك انها عربية ممتازة وركوبة فعلا بس مشاكلها الماركة ملهاش ذنب فيها. مثلا:
1- ارتفاع سعر قطع الغيار الجديدة (منصور)
2- ارتفاع سعر الصيانات فى التوكيل (منصور)
3- معظم السيارات الموجودة فى الطرق قديم نسبيا يعنى الموديل قديم وشقيت.
4- ودة اهم حاجة ام الفتى من اشباة الصنايعية وتكنولوجيا العربية (العالية) بالنسبة لمعظم الفنين عندنا سواء منصور او الورش.

ورقم اربعة لوحدة كفيل انة يضيع اى ماركة تماما زى فورد وفولفو وسيتروين.

[medo111]

والاقسام الي بتتكلم عليها دول اساسا عربياتهم كلها جديده الاغلبيه هناك كدا الكيا والرينو القديم نادر لما تلاقي حد والبروتون مفيش منها قديم اساسا والكيا رغم كدا بردو في بعض المشاكل فا العربيات الي هنا في القسم كتر خيرها بأمانه

[tananybasha]

هو الجو مريح
انما خالة الحزن دى جديده
انا لظروف شغلى
و زاد عليها ظرف خاص
مخلينى مش باخش
انا فعلاً حاسس ان القسم مريح شوية
بس قريب قوى
هيرجع زى الأول و احسن

و يا باشا
واحد جايب عربية 2011 و لا 2012
و بيتعامل مع توكيل فى تغيير زيت و فلتر
عربية جديده زيرو
هيقول عليها ايه
استنى لما يضرب كارته كنترول
و لا يضيع مفتاح يروح يعمل غيره
و لا شحن التكييف هرب و عايزه قطعه غيار

استنى
كله باوانه
لما يكملوا 15 سنه