ركبت العداد الار بى ام فى الكورسا بى!

[SimplyM]

السلام عليكم

عربيتى كورسا 95 نازله بعداد سرعه و حراره و بنزين ..... و العربيه ديه ليها برضه طقم عدادات فيه ار بى ام

اشتريت الطقم من سوسو بالغالى ب 280 و انا عارف انه يادوب 200 بس مكانش فيه دماغ الصراحه ادور فى حتت تانيه

فكيت و ركبت (هحط التفاصيل ان شاء الله) و خلص الجزء الاول (العدادات سرعه و حراراه و بنزين و الانوار اشتغلوا تمام و الحمد لله) و حطيت اساس الجزء التانى (الار بى ام) بانى طلعت سلك من جاك العداد و جهزته عشان اوصله بال ecu

ان شاء الله اوافيكم بالصور و التفاصيل

[tananybasha]

الله ينور
ادينا تفاصيل قريب
و بالتوفيق ان شاء الله

[MoStAfA-StabS]

فى انتظار التفاصيل !

[alaamousa]

في انتظار التفاصيل ان شاء الله

[SimplyM]

التفاصيل:

كورسا بى نزلت من 1993 الى 2000 و فى منها نزل بعداد rpm و منها نزل بعداد سرعه فقط و فى التقرير التالى هشرح ان شاء الله كيف يمكن تركيب عداد ال ار بى ام للى معندووش زى ما عملت فى عربيتى

نقطتين اساسيتين فى شراء العداد الار بى ام

اولا عدادات الكورسا نوعين ... ميكانيكى و اليكترونى ... يعنى واحد شغال بواير حديد متصل بالجير بوكس و التانى شغال بسينسور ... ازاى نفرق ... سهله ... لو عداد السرعه عندك بيبدا من صفر يبقى اليكترونى و لو بيبدا من 20 يبقى كهربى ... المهم هنا هو انك تجيب هداد ار بى ام نفس النوع اللى عندك





ثانيا: عدادات الكورسا بتفرق حسب نوع الموتور و سعته و ده بيبان فى رقم كودى مكتوب فى عداد السرعه ...مثال : W1150 لازم برضه لما تجيب العداد اللى فيه ار بى ام يكون نفس الرقم و الا هيقرا سرعة العربيه غلط

اجراءات التبديل:

1- يجب وضع عداد الكيلو فى العداد الجديد على نفس قراءة العداد القديم ... لن استطيع كشف الطريقه لانها ممكن تستغل بشكل سىء فى تغيير قراءة العربيه لبيعها بسعر احسن



2- نفتح الكابوت و نفصل واير العداد من الجيربوكس... هو قلاوظ ماسل الكابل يتحل عادى باليد و يتسحب لبره و بعد كدهنرخى الكابل اللى داخل لصدر العربيه لانه قصير و لو مشدود العداد القديم مش هيطلع



3- نفك غطاء الدركسيون ... هنلفه يمين و نشيل غطا المسمار و نفكه و بعدين نلفه العكس و نفك المسمار التانى و بعد كده فيه 3 مسامير فى الغطاء من تحت نفكهم هما كمان



4- نلحلح الجزئين المكونين للغطاء و نطلعهم من مكانهم

5- نفك عمة العدادات و هى ممسوكه ب 3 مسامير ... 1 من جوه العمه فوق و 2 تحت كانوا متغطيين بغطاء الدركسيون

6- الان ممكن نسحب العدادات لبره و هما ممسوكين من ورا بحاجتين ... الواير و جاك ... الجاك هيفك لوحده مع سحب العدادات لكن الواير ممسوك بكليبس نمد ايدنا من ورا العدادات ونفكه

7- نبص على الجاك عشان نعرف اذا كان جاهز بوصلة الار بى ام و لا محتاجين نوصلها من ال ecu

8- اذا السلكه الخضراء المينه فى الصوره موجوده نركب العدادات الجديده على طول ونعكس كل الخطوات للتركيب




9- اذا مش موجوده هنركب سن و سلكه فى المكان المحدد فى الجاك و نسحبها من ورا الكونسول لمكان رجلين الراكب اللى جنب السواق ... وحدة الecu هناك ونركب العدادات عليها من غير منربط المسامير

10 هنفك الغطاء اللى على ال ecu و ده ناحية الباب و ماسكه مسمار واحد ... محتاج تفك الدرج المحطوط لانه ماسك فيه

11- تظهر وحدة ال ecu ... الوحده داخللها 2 جاك من تحت .... واحد صغير من بره ناحية الباب و واخد كبير من جوه ناحية الدواسه هنفك الجاك الكبير


12- هنقشر السلك الاخضر فاتح اللى داخل الجال فى المكان المبين و نلضم فيه السلك اللى سحبناه من العدادات و نرجع الجال مكانه بعد تغطية الاسلاك بعازل جيدا


14- سم الله و دور

15 لو كله تمام المفروض العداد يطلع للواحد و بعدين ينزل سنه...

16- قفل المسامير و بيت السلك و اعكس كل خطوات الفك للتركيب

17- مبروك

[SimplyM]

ماحوظه: الكثير من الصور هنا ليست خاصه بى لانى لم اصور كل التفاصيل و اقتبستها من مواقع اخرى ... لكننى اصف تجربتى الناجحه فى تركيب الار بى ام

[tananybasha]

الله ينور

[SimplyM]

تسلم يا كبير

[Scuderia.M]

مبروك! الله ينور
كنت عملت أنا الحوار ده لما سقطت الموتور الجديد بس مجاش في دماغي حكاية تغير عداد الكيلو و العداد الجديد كان ازيد من القديم بـ50 ألف كيلو!
شكلي هاحتاج من حضرتك أعرف طريقة التغير مع تقديم كافه الضمانات إني مش هبيع العربيه ولا انقص من القراءه :d

[elmo7areb]

طيب انا عندي مشكلة فى موضوع العداد
العربية كورسا 95 العداد الى راكب بدايته 20 ودة بيقرأ تقريبا بالميل مش بالكيلو متر وكمان واير سلك واصل للفتيس

لمبة التشيك بتنور كل فترة وعرفت ان الكود رقم 24 وهو حساس السرعة

غيرت السلك وترس السرعه ومفيش فايدة

اظن ان المشكلة فى العداد ممكن يكون محتاج عداد كيلو متر مش بالميل

ياريت الافادة