شويه مشاكل

[ehabsoft]

السلام عليكم ورحمه الله وبركاته اولا
تقبل الله منا ومنكم ثانيا
مشكله في العربية من ضمن المشاكل طبعا
المشكلة الاولى دي اللي مش لقي لها حل السخونه مع اني نظفت الردياتير وفعلا طلع منه بلاوي سوده والمراوح شغالة ومغير كوعة الميه وحاطت زيت شيل الاصفر ده كله والعربية بتولع لما التكييف يكون شغال مع العلم لما بكون مشغل التكييف وانا ماشي على سرعة يعني 100 بيكون صوت العربية عالي مش عارف ده طبيعي ولا ايه
ثانيا لما اكون ماشي بالعربية واديها مثلا الغير الثاني او الثالث او الرابع وادوس بنزين دوسه جمده الاقي العربية تقدر تقول مش بتسحب او نتشت نتشه واحدة او مكتومه بس بعد كده تطلع ولكن لما ادوس دوسه خفيفه العربية بتكون عادي
ثالثا الخرطمين اللي ريحين على تنك البنزين عايزين يتغييرو ازي يتغييرو علشان هما بقى شققو وباظو
رابعا اتجاه فلتر البنزين علشان انا فكته ومش فاكر انا ركبته صح ولا له
وجزاكم الله خير

[احمد فهمى]

هى عربيتك ١٦٠٠؟؟؟ والخراطيم عايزه واحد فاهم وعندو صبر يغيرهملك لأن التوكيل وناس كتير بتستسهل ويولو لازم التنك يتفك خلى بالك متفولش العربيه والا كل البنزين اللى فوق التنك هيتسرب بره العربيه

[ehabsoft]

العربية فكترا بي 97 1600 سي سي

[ehabsoft]

فين الرد يا جماعه

[فادى محمد]

السلام عليكم ورحمه الله وبركاته اولا
تقبل الله منا ومنكم ثانيا
مشكله في العربية من ضمن المشاكل طبعا
المشكلة الاولى دي اللي مش لقي لها حل السخونه مع اني نظفت الردياتير وفعلا طلع منه بلاوي سوده والمراوح شغالة ومغير كوعة الميه وحاطت زيت شيل الاصفر ده كله والعربية بتولع لما التكييف يكون شغال مع العلم لما بكون مشغل التكييف وانا ماشي على سرعة يعني 100 بيكون صوت العربية عالي مش عارف ده طبيعي ولا ايه
ثانيا لما اكون ماشي بالعربية واديها مثلا الغير الثاني او الثالث او الرابع وادوس بنزين دوسه جمده الاقي العربية تقدر تقول مش بتسحب او نتشت نتشه واحدة او مكتومه بس بعد كده تطلع ولكن لما ادوس دوسه خفيفه العربية بتكون عادي
ثالثا الخرطمين اللي ريحين على تنك البنزين عايزين يتغييرو ازي يتغييرو علشان هما بقى شققو وباظو
رابعا اتجاه فلتر البنزين علشان انا فكته ومش فاكر انا ركبته صح ولا له
وجزاكم الله خير

وعليكم السلام ورحمه الله وبركاته
كل سنه وانت بخير..
1- حراره مع تشغيل التكييف حاجه من 2 اما في سدد في دوره التبريد او مروحه التكييف مش بتشتغل ع السرعه التانيه مع المكيف وطبعا في حجات كتير هتتفرع من الرد ده يعني ممكن ترموستات الكوع تكون قافله علطول مش بتفتح وهل في العادي ميه التبريد بتنقص ولا لا؟ والحراره من غير تكييف اخبارها ايه؟
2-النتشه دي اما بنزين او كهربا يعني شيك علي فلتر البنزين ونظف البوابه كويس وبعد كده نشوف اللي بعده ,ابدا من السهل للاصعب
3-قصدك خراطيم الراجع اللي تحت...هما غاليين جداد , وهتفك التنك علشان تركبهم وحوارات..
عندي نفس المشكله مشققين ولما بملي التنك ع الاخر بينقطم,الحل..نظفت مكان الشقوق كويس وانت تحت العربيه طبعا وحط عليها سليكون حراري (انبوبه رمادي كده صناعه تايواني ب12ج) بعد السبيكون لف عليها شاش من بتاع الجروح وشد ايدك وانت بتلف علشان السليكون يتخلل نسيج الشاش وحط سليكون تاني ولف لفه وهكذا وانساه وادعيلي.
4-اتجاه الفلتر..بص وانت نايم تحت العربيه وفوقك الباب الشمال هتلاقي خرطومين اللي بيركبوا في الفلتر . اللي ناحيه ايدك الشمال ركبه في ناحيه الفلتر اللي مكتوب عليها )in( او احيانا بيبقي مرسوم سهم والخرطوم اللي ناحيه ايدك الشمال هو الoutاو راس السهم

[Amr_650]

انا غيرتهم من سنة و نص و كلة تمام ,, استريتهم اصلى جديد و كانو غالين , بس مفكتش التنك كلو , يدوب ريحتو شوية و خلص

[tananybasha]

1. نضفت الريادتير ازاى
2. بتجيب الزيت بتاعك منين
3. فلتر البنزين و نوع البنزين
4. سلوك البوجيهات اخبارها ايه