عظـــــــــــــــــــــمة الالماني

[medomoon35]

من تلت ايام كده نازل من البيت لقيت عربيه خالي المكوه اللي المفروض كنت ابدلها معاه " بس محصلش نصيب " الاكصدام الخلفي بتعاها من فوق الشكمان مكسور جامد وداخل لجوه وشكله كده لازم يتغير اللي حصل كان واحد راكن وراها وعايز يطلع وكسر العجل علي الاخر وكان فاكر نفسه ان الحته وسعه وهيعدي وحصل اللي حصل

انا امبارح كنت بعمل واجب لواحد صاحبي وماشي في زفه اخوه "اخوه اتجوز عقبال عندكم " ومشييين في الطريق عادي علي السرعه اللي هيه العديه " 50 تقريبا " والطريق وقف فوقفت قام البيه اللي ورايا داخل فيه بسرعته "الباين كان سرحان او الاغلب كان فيه واحده معديه من جنبه وكان بيبص عليها ولا حاجه " انا اطخبت من هنا ومن صوت الخبطه نازل علي اساس ان الشنطه بتاعتي ضاعت بصيت علي الاكصدام لقيته مفكوك من الجنب ومتخربش خربشه بسيطه جدا وانا واقف قمت ضارب فيه مسمار وخلصت علي كده

وفي الاخر بانلي الفرق بين الانسر والاوبل مع العلم ان الراجل اللي خبط المكواه كان علي سرعه بطيئه اما اللي البيه اللي خبطني مخطش رجله علي الفرامل اصلا داخل بسرعته

[shaddadfalcon1]

هي العربيه بتفرق طبعا بس دي نصيب ياباشا
مانا ياما خدت حبطات من ورا وكانت بتبقي العربيه اللي ورايا بسرعتها وانا واقف تماما واللي كان بيحصل خربوش او شرخ بسيط في الأكصدام زدي لانوس كمان مش الماني
بس ربك ا

[tananybasha]

العظمه لله وحده
هى ارزاق بس

[buddha]

قمة الخامات الرديئة موجودة فى متسوبيشى
الصاج لو عجلة دخلت فية يتبهدل
التابلوة متفهمش دة كارتون مقوى ولا اية بالظبط

بصراحة عربية واخدة فوق حقها بكتير جدا جدا

[tananybasha]

و برضوا ارزاق
هى ربنا اراد انك تلاقى 98 كريستاله 1300 مانيوال ب 55000 جنيه

[buddha]

فعلا مش عارف يا باشا اية التهريج فى الاسعار دة
يعنى صح عربية لانسر موديل 98 او 99 صاحبها يبيعها بــ 50 ولا 55 ولا اصلا بـــ45

دة لية يعنى هيا بقى افضل من الاوبل اســترا و الرينو ميجان

وبصراحة عربية ولا تستاهل ادنى الاسعار ... والله عن تجارب كتيير جدا فى لانسر
دى الفيرنا افضل منها بمراحل

[tananybasha]

السوق عايز كده

[tananybasha]

دى ثقافة شعب
ان فتنا اليابانى مش هيرجع تانى

[احمد فهمى]

زى ما وضحتلك قبل كده لو كنت جبت لانسر كنت هتحس انك نزلت مفيش علاقه بين حتى الانسر البومه والفيكترا بى اللى معاك ولا فيكترا a للأسف مصر مسيطر عليها شوية تجار مبعرفوش بقرأو او يكتبو عربى حتى اللى من جهلهم سمو العربيات زلموكه وتمساحه وبطه وعيون صفيه وكريستاله وشبح وبودره وقرش يعنى مش عارف اقول ايه غير انهم لو كامو شغاليين فى جنينة حيوانات مكنوش هيبقو بالجهل ده..

افتكر فى الثمنينات كانت البى ام دبليو فيها زراير كتير مكتوب عليها بالأنجليزى فقررو التجار المثقفين بدل ما يتعلمو انجليزي او حتى عربي انهم يحكمو على العربيه دى الى اليوم انها وحشه والاوتوماتيك كان زمان عيب مش ميزه والزجاج الكهربا ده احنا عشنا فى ايام سوداء بسبب الجهل وحالياً لانسر ١٩٩٨ والله فى نظرى متسواش ٣٠ الف جنيه وكربراتير وانسى صالج او امان تلاقى على رأى طنانى بتتباع ب٥٠ ل٥٥ وفيكترا نفس الموديل او حتى ٢٠٠٢ وتلاقى صاحبها مش عارف يبيعها ب٤٥ الف وتلاقى الكل يقولك دى فى ال٣٥ الف مع ان لو وزنت الفيكترا بس هتلاقيها وزن اللانسر كمان مره غير الabs والخامات وبجد انا مش عارف ينفع اقارن لانسر ٢٠٠٧ اصلاً بفيكترا ١٩٨٨ لان فيكترا هتكسب فى كل حاجه....

انا كان معايا فيكترا بى ١٩٩٨ وفى سنة ٢٠٠٠ عربيه هوندا سيفك قطعت عليا الطريق كنت ماشى ٨٠ حاولت افادى بس دخلت فى العجله الاماميه للهوندا بس اخدت معايا كل حاجه فى الهوندا من اول العجله لحد نمرة الاكصدام ايوا انا عربيتى اتكسر فنوس اشاره والكبير والرفرف والاكصدام بس كل حاجه فى مكانها والعربيه اتغير فيها قطع غيار بس ضيف على كده ان الهوندا طارت اصلا كأنها عملت خمسه بس من غير الروبع الامامى والعجله بالاكس و كل حاجه تتخيلها كانت متوزعه فى الشارع وهى مش محتاجه كلام صاج الاو بل يعمل فعلاً عربيتين لانسر.....
وفى ٢٠٠٦ لقيت شعب مصر فاضل شويه ويحطو الكرولا جنب الهرم الكبير مع انى مش فاهم شكلها غبي جداً فقررت اشتري واحده كان واحد قريبى مسافر وبيبعها والله عملت بيها ١٠٠ كيلو وقلت والله ده شعب مصر ده فعلاً ملوش فى العجل حتى مش العربيات وعملت اعلان وكانت المفجأه الناس كان فاضل شويه يقطعو بعض عليها لدرجة ان انا فضلت ازود فى السعر لحد ما بعتها ب١٠ الاف زياده عن ما اشتريتها وكانت لا abs ولا فرامل اصلاً مع انها كان عامله ٤٠ الف كيلو والفيكترا كانت لسه موجوده وعامله ١٩٠ الف كيلو قلت الحمد لله انى مبعتش الفيكترا ...

اختصار الفيكترا بالتحديد عربيه مش هتتكرر بكل موديلاتها وكل قرش بيتدفع فيها برجعها جديده فمن الاخر احمد ربنا انك مبدلتش معاه ووضب عربيتك والله المستعان

[SYD]

العظمة لله وحده
انا مرتين لانسر يخبطوا اكصدام اللادا الخلفي ويتنوه وهما مايجراش حاجة فيهم

العملية في الأول والأخر نصيب

اما بالنسبة للمقارنة بين اللانسر والأوبل
فهيهات

اللانسر فعلا لحد اوائل البومة كانت كربراتير (علي فكرة البومة هي المكواة والبومة مجرد فيس ليفت بس الجهال بيعتبروها موديل مختلف)
اللانسر عموما لا يستحق كل هذه الجلبة والصيت اللي معمولها
اقسم بالله واحد زميلي شاري الكريستالة سنة 99 زيرو ب 56 الف
النهاردة في 2012 بعد 13 سنة عجن في الشارع ومرمطة للعربية بتسوي 55 طب ازااااااااااااااااااااااي ؟؟؟
من اين لك هذا ؟

[maheralsisi]

الله ينور

بجد الله يبارك لكم و ينور عليكم
انا عارف انى مش هاضيف جديد بالنسبة للخبراء اللى زيكم لان انا كل علاقتى بالعربية انى اسوقها بسسسسسسس و ما افهمش اى حاجة تانى (بس يبدو كده ان الفورد هاتعلمنى الادب )
عموما انا ركبت عربيات كتير مختلفة المنشأ و فعلا فيه فرق كبيررررر
بس السوق عموما عرض و طلب و قطع الغيار هى اللى بتحكم سعر العربية يعنى العربية سعرها عالى عشان قطع غيارها رخيصة او هى رخيصة عشان قطع غيارها عالية (او مش موجودة )
ده طبعا من غير الكلام فى عمر قطعة الغيار يعنى قطعة الغيار الاوروبى المستوردة بتعيش اقل حاجة سنتين ده لو انت مفترى انما باسم الله ما شاء الله الكورى بتغيرها مرتين فى السنة لو انت من المحافظين (و حاليا فى الجديد قطع الغيار عالية برضه مش رخيصة زى القديم )
هى العبرة كلها لو هاتقدر على مصاريفها هاتها لانك فى الغالب مش هاتعرف تنزل منها الا لحاجة فى نفس المستوى اوروبى برضه ان لم يكن نفس النوع مهما كانت مشاكلها (الا لا قدر الله الظروف)
ما ينفعش تقارن الاوروبى عموما بالكورى حتى لو من نفس الفئة (ده رايى الشخصى)
يعنى لو قلنا الصاج احنا مش جايبينها عشان نخبطها ماشى طيب تعمل ايه لما تنزل فى امان الله من البيت تلاقى الباب اليمين حاضن الباب الشمال دى طبيعة البلد يا سيدى اللى بتخليك تفكر فى الصاج
لكن كله كوم و الفرامل كوم تانى حد فكر يجرب فرامل الانترا 2007 على 160 فجاة لاى ظرف ؟؟
(استثنى فرامل السيفيك اليابانى ) و جرب فرامل البى ام 92 على 220 ؟؟؟؟؟؟؟؟؟؟ ربنا ما يحكم عليكم ابداااااااا
حد يقول ان الماروتى تعمل total lost فى الانترا 2007 على 140 ؟؟؟ و البى ام تنزل من 220 ل 120 فى 6 متر و تاخد بيها غرزة نجاة و تعلى تانى ل 180 فى ما فيش ؟؟
مع العلم ان دى 2007 و دى 1992 ؟؟؟؟؟؟؟؟
و لا الثبات يا نهار اسود جرب كده تعدى بين مقطورتين بالفيرنا او اللانوس و احمد ربنا انك عديت ما فيش تحكم بالعربية و الهوا بيوديك زى ما هو عاوز اركب بقى الفكتر a 1995 تحس انك مكلبش فى الارض و تسمع صوت الكاوتش بينطر الاسفلت و يخلعه من مكانه و العربية بتروح زى ما انت عاوز (الحمد لله ) مش زى ما هى عاوزة
استثنى من ذلك الكورولا الجديدة و السيفيك فى الثبات و استثنى السيفيك فقط فى الفرامل
اما الصاج كله زى بعضه
و زى ما قال طنانى باشا قبل كده
كويس ان الناس مش عارفة قيمتها عشان اللى عارف قيمتها يعرف يركبها

[احمد فهمى]

والله يا سيد ماهر لسه فى ناس بتفهم زيك اعتقد فى امل فى اليلد بس يشتغل فى تجارة السيارات ناس مثقفه

[احمد فهمى]

العظمة لله وحده
انا مرتين لانسر يخبطوا اكصدام اللادا الخلفي ويتنوه وهما مايجراش حاجة فيهم

العملية في الأول والأخر نصيب

اما بالنسبة للمقارنة بين اللانسر والأوبل
فهيهات

اللانسر فعلا لحد اوائل البومة كانت كربراتير (علي فكرة البومة هي المكواة والبومة مجرد فيس ليفت بس الجهال بيعتبروها موديل مختلف)
اللانسر عموما لا يستحق كل هذه الجلبة والصيت اللي معمولها
اقسم بالله واحد زميلي شاري الكريستالة سنة 99 زيرو ب 56 الف
النهاردة في 2012 بعد 13 سنة عجن في الشارع ومرمطة للعربية بتسوي 55 طب ازااااااااااااااااااااااي ؟؟؟
من اين لك هذا ؟

هي الادا مش مصممه صح يعنى الناس قيمت قوة الادا عشان فتيسها ناشف ودركسيونها والصاج من بره تقيل بس ده مش مقياس القوه لا التصميم انا كنت فى الاسكندريه من ٨ سنين او اكتر وكان معايا فيكترا بى وقررت اخود ملف للطرق التانى على البحر والفيكترا مبيفرقش معاها الكلام ده بس كان فى لادا معرفش طلع منين المهم خبط بالرفرف الخلفى فى رفرفو الامامى عايز اقولك ان الادا بقنت انسيابيه من اودام زى السويفت لأن تصميم التربيعى ده مبيوزعش الخبطه وانا حصل تطبيقه بحكه عاديه جداً والاكتر ابن عمى معاه لانسر الشكل الجديد من سنه دخل فى لادا فى اكصدامو الخلفى والادا جابت روبع امامى ومش هتصدق ان الانسر كل اللى حصل الاكصدام خرج من مكانو ودخل لجوه شويه واستعدلناه تانى يوم فى ثانيه الادا مش مقياس وفعلاً العظمه لله بس الالمان عرفين يعنى ايه انسان ولازم يتحافظ عليه يعنى مثلاً اوبل فيكترا من٨٨ الى الان لو حصلت مصادمه اماميه عنيفه الدركسيوت بينفصل عن القطمه ودواسات الفرامل والدبرياج والبنزين بتفصل عن كل حاجه عشان ميكسروش رجلك وده مش موجود فى ايلانترا ٢٠٢٠ ولا سيراتو مثلاً وعايز اقولك عبط المصريين ان اول عربيتين اليابان تراعى فيهم الامان والسلامه هم الانسر الشكل الجديد اللى فشلت فى مصر والكرولا الجديده ده تستنتج منو كم الجهل المتقدم جداً فى مصر ويروحو يشترو الموديل القديم مستعمل اغلى من الشكل الجديد يعنى حاجه تكسف ده لو حد نشر الموضوع ده عالمياً هنتفضح والله المستعان

[karkor30]

قبل الاوبل كان معايا كريستالة 99 اتوماتيك كنت جايبها ب 52000 وبصراحة انا شايف انها عربية كويسة جدا وتستحمل السفر والمشاوير الحمد لله اللى كانت معايا كانت حالتها نضيفة جدا انا اسبوعيا المنصورة القاهرة مشوار رايح جاى وكفاية انها حافظت عليا فى الحادثة اللى عملتها - ده بعد ستر ربنا طبعا ولطفه بي - لو خيرونى بينها وبين الفيرنا او اللانوس هاختار الكريستالة لكن طبعا مقارنتها بالاوبل من حيث الثبات والقوة والسحب مش فى صالح اللانسر وبعدين هينفع نقارن 1300 ب 2000 مثلا؟؟؟؟ ولولا الحادثة كنت بعتهابنفس السعر او اكتر كمان بس الحمد لله على كل شيئ وبعدين العربيات ازواق وكل واحد له دماغة وكل عربية لها زبونها

[احمد فهمى]

باشا ارجوك عيزين نلغى كلمة كرستاله ومكوه وفرخه وتلاجه من لغة العربيات عشان تعبنا من اللغه دى اللى تجار مصر المثقفين مرضونا بيها محناجين نعمل حمله ضدهم فعلاً