محتار فى الاسترا بشتريها

[alzelafy]

عربيه استرا 2000 مانيوال 1200 سىسى

الموتور الكوستبانات ليها صوت لما الار بى ام بيعلى و العربيه بتسخن جوة البلد لكن فى السفر تمام (حنقول عايزة موتور او شورت بلوك يا ترى بكام)

الكاسيت بتاعها الاصلى مقفول بكود و صاحب العربيه بيقول مش عارفو ؟؟؟؟ المشكله تتحل ازاى و هل ينفع اركب كاسيت تانى غيرو

هل العربيه دى مشتركه مع الكورسا فى بعض قطع الغيار و يا ريت لو امثله لاسعار قطع الغيار فوانيس اكصدام سيور كبوت رفارف الخ

العربيه سعرها انا شايف انو حلو 35000 و فيها خبطه فى الرفرف الخلفى شمال و مردودة و التكييف مش شغال بس موجود يا ترى دا سعر مناسب و لا لا ............ و متنسوف تفيدونى عن الموتور و سعرة ضرورى ضرورى

[raed610]

بالنسبة للكاسيت عشان ده اللي اعرفه، شوف الموديل بتاعه وابحث على النت على طريقة عمل اعادة التشغيل وان شاء الله هاتلاقي
والحل التاني انك تروح لأي بتاع كاسيت وهايغيرك الاي سي بتاعة الكود وهايديلك كود جديد
بالنسبالي مالاقتش طريقة للموديل اللي كان عندي غير اني كان فاضل مرة واحدة لإدخال الكود فعمل waiting وده معناها انك تسيب الكاسيت شغال لمدة 12 ساعة تقريبا
فالصراحة الموضوع كان رخم بالنسبالي في الأول فروحت لبتاع الكاسيت عشان يعمله كود جديد وكلف 150 جنيه

حاجة تانية ، لو الكاسيت مافيهوش مخرج usb او SD يبقى نصيحة تشتري واحد جديد بـ 250 جنيه وتخلي القديم معاك في حالة اما تيجي تبيع العربية

[فادى محمد]

-صوت الكوستبانات بيبقي (تكتكتكتكتكتك) زي صوت مواتير اللادا (مع الاعتذار لمالكيها)
بس صوت الكوستبان بيبان الصبح بس والموتور بارد انما لما بيوصل لدرجه حراره التشغيل الطبيعيه بيقل قوي او بيختي
-مش محتاج شورت بلوك لان الكوستبانات فوق في بيت الكامه وبتتغير عادي جديده او استيراد حتي مش هتحتاج تفك وش السلندر
-الحراره ليها اسباب كتير جدا اتاكد ان ميه القربه مش بتنقص وان المراوح بتشتغل في ميعادها واخبار ميه الدوره ايه وحاله الرادياتير
-السعر انا شايفه قليل شويه وده اكيد له اسباب متعلقه بالحاله العامه للعربيه ,الموديل ده مايقلش عن 45 الف لو العربيه ايه وان

[احمد فهمى]

هو واضح ان العربيه صاحبها مهمل عمتاً اعمل حسابك فى ٥ الاف جنيه فوق السعر عشان تركب عربيه صح وممكن تركب اى كاسيت عادى او تروح التوكيل يفتحهولك بس مش مستاهل هم تقريباً بياخدو ١٥٠ جنيه لفتحو والتكيف هو المقلق اكتر من المتور الشورت بلوك هيعمل من ١٥٠٠ ل٢٠٠٠ تقريباً بس زى ما فادى وضحلك مش شرط يكون متور ممكن تغير الكوستبنات لوحدها والسخونه ممكن تكون مروحه او ترموستات اسباب كتير فحاول تكشف على كل ده عشان تحسب مصريفك وتشوف هتتناسب معاك والا لا والموديل ده تقطيع اكتر من اللى بعدو البرازيلى لأنها منزلتش اوربا يعنى متقلقش من قطع الغيار متوفره وبالتوفيق

[tananybasha]

لو سليمه
و عندك استعداد تصرف عشان توقفها على رجلها و تستحمل قرفها
اتكل على الله

[alzelafy]

مشكوريييين يا احلى رجاله و ان شاء الله لو خلصتها هعرفكو و هديكو تقرير بحاله العربيه انا لسه هجربها و يا رب ما يطلعش فى حاجه تانيه

[wama00]

انا شوفت الموديل ده فى السوق بس كانت عربية صح الصح بالظبط كانت زى الزيرو بس كان عايز 49 الف