للخبراء فقط : فيكترا 98 و لا كورسا 2005

[kar!m]

تقصد اني اصبر و سواء فيكترا او كورسا اصبر شوية لحد ما الاقي حاجة نضيفة و لا ترجح مثلا اني ادور علي موديل فيهم و ادور عليه بعينه ؟
و سؤال تاني بايخ : انت جبت الفيكترا بكام؟؟ لو منفعش تقول علي العام قول لي علي الخاص

قصدي تشوف انت هتستقر على مين فيهم و تبدأ تركز معاهم .. عاوز تدور على الاتنين لحد ما تلاقي حاجه نضيفه .. مافيش مشكلة .. في ناس كتير بتعمل كده .. بتدور مثلا على فيرنا أو لانوس أو أفيو .. كده يعني.

انا كنت جايب الفيكترا ب 64 ألف جنية .. مش سر ولا حاجة .. الناس كلها هنا عارفه .. و أنا كنت عامل موضوع لما اشتريت العربية كان فيه كل التفاصيل.

[MEDO84EG]

الف شكر يا عمنا
طب ايه رأيك اني اشتري لوجان زيرو
ادفع مثلا 40 الف مقدم و اقسط الباقي
مش هيبقي تعب مادي
بس من وجهه نظرك اللوجان دي عربية كويسة؟؟
خاصة اني اسمع ان توكيلها ممتاز و العربية الكل بيشكر فيها
ايه رأيك

[MohammedAladel]

هو الفيكترا طبعا مينفعش نقارنها باللوجان الفيكترا أعلى طبعا

بس لو إنت عايز عربية جديدة وعلى قد سعرها يبقى لوجان اختيار موفق

[MEDO84EG]

طب انا لو حابب اقارن ايهما افضل : اجيب فيكترا موديل 98 -99-او حتي 2000 المهم حاجه في حدود ال 60 الف
و لا اجيب رينو لوجان زيرو
لو افترضنا اني الاقي فيكترا كويسة و سليمة
ايه رأيكم و شكرا استاذ محمد و استاذ كريم

[MohammedAladel]

طب انا لو حابب اقارن ايهما افضل : اجيب فيكترا موديل 98 -99-او حتي 2000 المهم حاجه في حدود ال 60 الف
و لا اجيب رينو لوجان زيرو
لو افترضنا اني الاقي فيكترا كويسة و سليمة
ايه رأيكم و شكرا استاذ محمد و استاذ كريم

والله حسب ما حضرتك ترتاح بس هى مقارنة ظالمة

اللوجان عربية ع الزيرو ودى حاجة حلوة

الفيكترا عربية شكلا أفضل وثبات أعلى بالتأكيد ولكن بقالها سنين مستعملة


فأنا محتار أقولك أيه بس دى ترجع لإنت عايز إيه من العربية وبعدين لسة اللوجان الشكل الجديد هتنزل بس معرفش أمتى بالظبط

فإنت شوف إيه احتياجات حضرتك من السيارة وبناءا عليه قرر

الفيكترا مستعملة ولو حالتها مش حلوة هتقرفك جدا عن تجربة لصديق ليا كانت سيارة والده فيكترا وراكنها قدام البيت وهيبيعها حتى من غير ما يصلحها وسبق وشرحت ليه


وبعدين اللوجان زيرو مش ب 60 ألف بتبدأ زيرو من 68 المانيوال والفول أوبشن 72500 والأوتو 79500 راجع الأسعار على كونتاكت خد فكرة

وقبل دا كله حدد إنت عايز أيه من العربية يعنى لو إنت ميال للكورسا ومش هتدفع فيها المبلغ دا قدامك

على سبيل المثال فيات بونتو كيا بيكانتو طبعا فيات بونتو شكلها جميل جدا وعربية جميلة فى حد ذاتها وكثير من الأعضاء قالوا ثابتة ع الطريق ويكفى إنها من فيات وتستاهل كل قرش بتدفعه فيها

أنا أرشحها لك فى الفئة دى وتمنها 72 ألف ومحركها 1300 سى سى مانيوال
البيكانتو بتبدأ من 75 ألف ومحركها 1200 سى سى مانيوال معاك لحد 96 ألف الأوتو الفول أوبشن والعربية دى سعرها مبالغ فيه جدا
وأنا شايف إن البونتو أحسن منها
دا بالنسبة للمينى هاتش باك

فيه اختيارات تانى فى المستعمل دور هتلاقى عربيات كتير حلوة مع الفيكترا بالسعر دا إن شاء الله

بس لو لقيت فيكترا حلوة وواثق من حالتها اشتريها

وخد بالك إن فيه 1600 سى سى و 2000 سى سى عشان استهلاك البنزين وكدا وفرق السعر برضه

بس أنا معنديش خلفية عن أسعارها مستعملة

بس أنا أرشح ال 1600 مانيوال عشان استهلاك البنزين وأعتقد سعرها هيكون أقل وضرايب أقل خصوصا إنهم بيقولوا هيرفعوا الدعم عن السيارات ابتداءا من ال 1600 سى سى

[MEDO84EG]

و الله بجد الف شكر
يعني افهم من كده ان الفيات البونتو احسن من الرينو لوجان لو بنقارن الاتنين و انا اسرتي مش كبيرة و بفكر اقسط ( بس تقسيط ميكنش فيه حرمانية يعني )

[MoStAfA-StabS]

انا رأىى الكورسا .. الموديل الجديد له قيمته برده ! و بالأخص صعب تلاقى فكترا حالة حلوة !

[MohammedAladel]

ياباشا الفيات بونتو فئة واللوجان فئة تانية

البونتو عربية شيك جدا جدا بصراحة وصفقة رابحة

الأوبل كورسا غالية جديدة وحضرتك عايز عربية فى رينج ال 60 وا ل 70 عشان كدا رشحتلك البونتو أدخل قسم فيات واسألهم عليها وإن شاء الله هتلاقى كلام يعجبك عنها

ممكن تدخل رينو سانديرو معاهم فى المقارنة وتشوف متهيقلى السانديرو ممكن تكون أوسع شوية من البونتو بس أنا مركبتش لا دى ولا دى بس بالنظر من برا يعنى
هى تعتبر الهاتشباك بتاع اللوجان

وال 3 عربيات سواء لوجان أو سانديرو أو بونتو عربيات محترمة وإسمك راكب عربية زيرو وبالك مرتاح

وأى عربية مستعملة فى الدنيا كلها ممكن تاخد فيها مقلب عشان يكون فى علمك وممكن تشترى عربية مستعملة تريحك قوى برضه
وقل كل دا تدخل قسم المقارنات وتعمل موضوع عن العربيات اللى محتار بينها وإن شاء الله هتلاقى الإفادة

وتقارن مع نفسك فى الأوبشن بتاع العربيات اللى إنت وصلت ليها وتستخير ربنا وتختار الأفضل

بس طالما إنت قلت لوجان من الأول يبقى بلاش الفيكترا عارف ليه ياباشا ؟؟
لأن اللى بيشترى الفيكترا غاوى فيكترا ومش بسهولة هيغير رأيه للوجان
دى عملية نسبية طبعا تخ تلف من واحد للتانى

بس أنا ميال أكتر للبونتو :)

[MohammedAladel]

والسانديرو مانيوال نفس محرك اللوجان مانيوال بيطلع 90 حصان والسانديرو أوتو نفس اللوجان أوتو بيطلع 110 حصان سمعت إنه نفس محرك الميجان بس مش نفس سحب الميجان أقل برغم صغر حجم العربية عن الميجان !!!!!

طبعا دى محركات 1600 سى سى

الفيات بونتو محركها 1300 سى سى ودى ميزة فى توفير البنزين ومحركها 74 حصان وهى تقريبا سعتها اللترية الحقيقة 1248 سى سى وعزم العربية دى عالى عند عدد لفات قليلة أتوقع إن تسارعها هيكون جيد جدا

ولك حرية الأختيار وأبحث تانى مع نفسك وشوف يمكن تلاقى حاجات تانى تعجبك

[MEDO84EG]

شكرا يا باشا بس انا دخلت قسم الفيات و سألت علي البونتو و لقيت كلام ميطمنش زي مشكلة صوت التصفيق بتاع الموتور اللي التوكيل مش عارف يحلها

[MohammedAladel]

شكرا يا باشا بس انا دخلت قسم الفيات و سألت علي البونتو و لقيت كلام ميطمنش زي مشكلة صوت التصفيق بتاع الموتور اللي التوكيل مش عارف يحلها

والله مش عارف أقول لحضرتك إيه بس الأكيد العربية دى أثبتت نفسها

وأنا جبت لحضرتك كام خيار تانى معاها مش هى بس وإنت بتختار بناء على رغبتك واحتياجك

وأنا جبت لحضرتك العربيات اللى أعرفها فى الفئة السعرية اللى حضرتك عايزها

[MEDO84EG]

انا اسف اني ضايقتك استاذ محمد و اسف بجد لتعبك
الف شكر

[MohammedAladel]

ضايقتنى إيه بس أحنا كلنا مع بعض هنا للإفادة والمنفعة وأنا والله غرضى إنك تركب العربية المناسبة ليك وبالسعر المناسب وتركب أفضل حاجة مش من وجهة نظرى بس من وجهة نظر كل الناس

ونصيحة اصبر على مهلك خالص وانت بتختار عشان تختار الحاجة الصح وسط اختيارات عدة

أول حاجة تشوفها نوع السيارة ومدى رضاء العملاء من وكيلها

وشكل السيارة

ونوع فئة السيارة سواء هاشت أو سيدان وماشابه ذلك

وسع السيارة اللى إنت عايزه

نوع المحرك اللى غايزه عايز المحرك الأكبر

ولا عايز المحرك الاصغر وموفر فى البنزين

عايز محرك بيشتغل بأوكتان 95 ولا عايز محرك 90 و 9 يمشى زى الفل ؟

طبعا الثبات والفرامل لا غنى عنه بل أهم من قوة المحرك بالنسبة لى

وبعد كدا تقارن وتشوف الأفضل من كل الجوانب وتشاور عليه

وأعمل مواضيع هنا فى المنتدى فى أقسام المقارنات وإن شاء الله هتلاقى الأفادة

واستخير ربنا قبل كل شئ

[MEDO84EG]

و الله يا استاذ محمد الف شكر

[tananybasha]

رينو كلها منورنا
يا دى الهنا اللى احنا فيه